值得快樂的人

後來我發現，呢一種矛盾情緒係因為冇自信，唔相信自己配得快樂，唔相信自己值得好嘅事發生。

其實所有嘅恐懼，係嚟自自己嘅極度欠缺安全感，
覺得自己存在總係有一種虧欠，覺得自己仲係唔夠好，唔值得有好嘅事情發生。

如果你都相信有吸引力法則的話，你都會知道有murphy law，
即是你愈恐懼嘅事，愈唔想發生的你會吸引佢不斷再發生。所以你真正唔想發生的話，其實係要消滅恐懼，不要再想。

我唔記得咗呢一種情緒糾纏咗我幾耐，
我淨係記得係好耐好耐……
就算我經歷幾多都好，幾多人勸我都好…..
其實自己唔放開係冇人會幫到你。

我記得直到有一日，突然間叮一聲，
嗰一刻覺得好攰，唔明白點解成日都要咁驚，
好厭倦呢一種恐懼同埋冇自信…
或者呢啲就叫做物極必反，
總之就好厭倦這樣的自己…

其實每個人喺生命裡面，
都總有好多人想扶起你勸你，
提點你…..
但係其實作為牛角尖表表者的我，
好明白….
再多嘅聲音，最多嘅正能量都好，
一切改變只在自己。
每個人都有佢自己嘅時間表，

直到嗰刻自己真係覺得唞唔到氣，
好厭倦嘅嗰一刻，好想改變嗰刻開始，
人先會醒覺。

而就係嗰一日，
我好厭倦我自己嘅時候，
我同我自己講，
其實我仲有啲咩好怕呢？
我唔想後半生依然不能快樂。
忽然之間，
我唔再畀自己恐懼，
我覺得我己經有足夠嘅力量去應付就算係唔好嘅事，
我已經有足夠嘅智慧，經驗去面對同處理任何事。

從轉念的一刻起，
神奇的事開始發生了，
原來我一直以為好大件事嘅事 ，忽然之間發現其實係好小事，
甚至我開始覺得一啲都唔重要。
我一直好恐懼嘅人，我忽然之間覺得其實我一直都唔在乎佢，而佢都不能影響我甚麼，

我想問自己其實一直我驚佢咩呢？
再有任何事發生，我竟然唔覺得係唔好嘅事了，
對我嚟講所有嘅事都不過係一個經歷，
原來換個角度睇已經冇所謂嘅唔好嘅事了。

原來，真係觀點與角度而已…..

覺得快樂時應快樂，
興奮時又何必壓抑？
尊重自己嘅情緒，你才能活得像個人。

每一個人都係值得擁有快樂，問題係你唔畀你自己擁有。

當然，我明白的……
就要等自己叮的那一刻…..

Fb: maysumofficial
Website:wahahafactory.com