長洲為食一天遊

網誌

Janice Lam

Aug 23 2014

去旅行就個個都鍾意，
但香港人咁繁忙想拎番個長假都唔係話咁易架！
長旅行就話唔係成日都去到啦，
不過香港都仲有好多地方值得去既，
而離島都係個好選擇，
今次我就會分享長洲一天遊，
介紹下今次既短旅程有咩好玩好食啦。

一落船實在太肚餓，要衝去醫下個肚！
聽d長洲人講佢地經常都幫襯一間叫陳通記既茶餐廳，
話大件夾抵食，我梗係要去幫襯下啦。

我叫左佢地最出名既沙嗲牛通，
個湯底好濃，好香沙嗲味，
唔係好似出面咁整兩下沙嗲醬就算數架，
廿幾蚊大大碗，以呢個價係市區就食唔到啦！

食飽飽就周圍去行下啦，
其實長洲景色都好靚呀，
係海邊就見到好多特色漁船啦！

係街上面成日都會見到有人曬咸魚，魚乾咁
呢度有好多賣乾貨既舖頭，
好多遊客會買番去做手信架！

好多遊客去長洲都會租單車踩，
雖然市區都踩得單車，
不過就好少有得租呢種3輪單車啦，
仲可以載埋人添！
我呢d懶人梗係坐係後面等人載啦！
30蚊個鐘唔算貴，可以一路踩一路欣賞下長洲既景色啦。

踩到攰又周圍搵下有咩好野食先！
唔知大家知唔知長洲最出名既小食有d咩呢？
講到排頭位既一定係佢！
就係長洲大大粒魚蛋啦！
甘永泰呢間就最多人排隊，而且仲好早就關門，
想買就好早d去排隊啦。

睇相係咪唔覺有幾大呢？
其實就係同我手掌差唔多大呀！

除左魚蛋其實仲有好多好多選擇，
我就揀左炸墨魚丸，一樣係超好味架，
好彈牙又香口，真係會令人上癮 ……
唔怪得咁多人排隊啦!

食唔到呢間唔緊要，其實都仲有好多選擇既，
好似格離檔口就sell有不同口味選擇啦！
有咖哩，青咖哩，黑椒，沙嗲，燒汁，原味⋯⋯

承惠10蚊兩粒，不過一樣都好好味，
我揀左沙嗲味，都幾入味，
而且一樣係我手掌咁大粒添。

見到呢間店都幾多人排隊，
我又去八下有咩好野食，
我就買左炸雪榚同水果串（聽人講話係必食喎⋯⋯）

個炸雪榚就十蚊粒，外皮炸得好脆，
內面就帶溶溶地既雲呢嗱雪榚，
感覺好得意架！不過我建議食果陣真係要小心！
因為佢係即叫即炸，個皮真係好熱，
一唔小心就會燙傷個嘴啦！

而呢個水果串，望落去好多顏色好靚咁，
有西瓜，菠蘿，提子，桃，
不過味道就麻麻地…..
無咩味，有敏感牙齒既人就唔好食啦
凍到痺左佢都解唔到凍⋯⋯

洲啤工房既巨薯棒又係排曬長龍，
我當然唔會執輸啦！

買完要係格離自已落味粉，
都有好多口味揀，有長洲風味，黑椒，雞味，蒜味，鹽味等等…
我就揀左食蒜加黑椒味，
不過因為佢炸得好乾身，
其實d味粉係好難痴落去，
所以食果時其實都係無咩味！
不過就非常香脆啦。

係長洲除左食野都仲有好多特色小店，
會賣下手作仔咁，
可以買下手信比朋友啦!

棉花百貨可以話係長洲其中一個地標，
好多人去到都會係門前影番張相，
入面就會賣民族衫，袋，飾物咁，
不過就唔係好岩我style啦！
反而我係下面間店就買到野喎！

呢間叫賣藝既舖頭一樣係賣家品，隨身小物，手作仔….
而我就買左下面支驅蚊膏，
就因為比佢個名吸引左，叫克蟲露驅蚊膏，
佢可以驅蚊同止痕，好似好勁咁！

細細支成支潤唇膏咁，
呢啲手作仔都係全天然人手做，
連包裝都係自已逐支痴上去架，
唔理有無用都要支持下小商店啦！

咁岩行過見到有芝士焗生蠔，芝士焗龍蝦，仲有芝士焗帶子食！
個賣相好吸引，我又衝左入去試下啦

我就試左芝士焗生蠔同焗帶子，
每件$30蚊，一樣好似手掌咁大隻，
上面鋪住一層厚厚既芝士，
超濃芝士味，岩曬我呢d芝士精呀！
入面仲有洋蔥同薯仔添，個味好夾架。

食到咁上下飽，如果可以加埋個甜品就完美啦…..
講到長洲出名既甜品舖頭，
好多人都推介呢間允升甜品。

我試左佢呢度最馳名既芒果糯米滋，
我又係一個超級芒果迷，
對芒果做既所有甜品都抗拒唔到架！

大家見到張相都知有幾好食啦!
佢又係好大粒，(究竟長洲d野食係咪都鐘意鬥大架呢…..)
平時係出面就好少買到咁大SIZE，
而且入面唔係芒果粒黎架，
係成舊芒果係入面！
好多汁又好甜，
我每次黎都一定去排隊買，
但提提大家!想買都一定要早，
我試過5點去已經賣曬架啦。

到左晚飯時間，
好多旅客都會揀去海傍一排排既餐廳食海鮮，
因為望住個漁港食海鮮真係別有一番風味！
而且係呢度食海鮮好平，
大約二百幾蚊就食到四款海鮮架啦。