泰國遊記～泰舒適篇～
我以前一年起碼都去兩次泰國架，
宜家工作太忙就少左好多喇，
其實泰國除左飾物，都有唔少好物，
之前Christy都分享左一部分，
我都有一樣好物可以同大家分享下，
就係除臭spray喇！
夏天有時著鞋都會好焗腳同出汗，
如果長時間焗住就好容易滋生細菌同有異味。
之前我都有喺香港過一啲噴腳既spray，
但係效用就唔太大。
而呢一枝我買返黎試左一段時間架喇，
發覺呢枝spray真係好好用，
如果腳汗比較多既朋友可以試下。
噴出黎會有淡淡既爽身粉味，
噴完之後真係可以保持一整天乾爽，
之前試過其他噴完覺得隻腳有啲粉，感覺唔太舒服，
但呢枝就完全無呢個情況發生。
雖然佢價錢唔太平，50ml / 150bhat (約港紙$3x)，
不過英國製造，所以我覺得都ok，
如果大家喺香港試過好多款唔work就可以試呢枝。
以前我都有介紹去水門區行街，今次去到反而買唔到野，
雖然啲衫都偏韓feel，但好多手工都唔好，好似花園街果啲feel，
飾物方面都睇唔岩，可能花多眼亂，
喺terminal 21或翟道翟睇仲好，而且好行好多。
如果行程緊密既話，建議可以直接skip水門區唔使行。
而今次行程都係主要搭BTS鐵路多，
鐵路真係方便好多自由行既朋友，
不過要買鐵路車飛時真係唔夠user friendly，
有啲站到宜家都淨係可以入硬幣，
買飛條龍排勁耐，一係要去唱散紙買先得。
雖然我之前黎就通常係泰國朋友車我周圍去或者搭的士，
但我唔建議大家搭的士，除非係落機果時同拖篋回程，
可以call一早講好價錢既的士公司。
大家都知曼谷任何時候都係勁塞車，
有晚約左朋友食飯，佢預早出門口都塞左兩個鐘，原本只係半個鐘車程！
所以唔想耽誤行程，都係揀返BTS穩陣。
仲有一點就係泰國的士佬大多都會專登兜路呃車程，所以就要小心，
去近既地方搭TUK TUK都OK，
一係就搭酒店既TUK TUK，會比較安全。
去到泰國其實最正就係做spa做massage，
好可惜今次時間緊迫，又約左朋友食飯，
同唔班同事去做massage，
所以呢一part就交比同事講下o唔ok喇！
Yuki:
今次去做massage既地方喺Siam Square 1既6/F，
叫Let’s Relax，都係Janice帶我地去，
想做massage就要一早book定、揀定package，
(可以親身去book或者網上book定都得架。)
佢地最夜收11點，如果揀比較長時間既package，最遲就要7,8點去做。
我地就揀左個要做2hr45mins既package：
Full Spirit 2,600 THB
Aromatherapy Oil Massage
Body Scrub or Body Wrap
Foot Reflexology
呢間店地方都好大，仲有兩邊鋪面，
book左8點既我地行完街就趕返去做massage，
開始前，staff會比你揀massage oil 味道同邊款磨砂，
同埋會問你同邊一個同房，無錯！係兩個人一間房！
好在大家都係女仔，唔怕啦～
揀好就可以跟治療師入房，先沖涼後做massage。
房間都算大，幾企理，有埋沖涼房，
經過兩個鐘既揼揼鬆之後，就出返一個落地玻璃位按腳，
真係所有疲勞一掃而空！
幫我按既治療師力度岩岩好，feel到佢用力但又唔會太痛，
不過聽返Christy同Karen講佢地果兩個好hea，
我諗都係一個個，無得比你指定揀邊個都無辦法，
同埋可能佢地趕收工，因為我地做完之後連個商場大閘都閂埋～
所以大家去做既話，可能真係要預多時間去呀。
另外不得不提既係，做完massage之後，
原來佢地會送芒果糯米飯比每位客人，
等客人放鬆晒之後再嘆一嘆美食，呢個service真係要比個讚！
如欲取得更多第一手美容及扮靚資訊
可瀏覽Girls Talk Main Blog：Girlstalk Blog
或 Like我們的Facebook專頁：
Janice Lam Makeup Workshop Facebook
（版權所有，未經同意不得轉載。)
