東京遊必掃平價大眼妝恩物

網誌

入行多年,家裏的化妝護膚品,如果沒有期限的問題,根本多到一世都唔會用得完,年終慳番唔少買化妝品及護膚品嘅錢,但有咩產品我仍會自掏荷包,唔買唔得嘅呢?答案當然係要「平、靚、正!」的產品。

 

今次跟各位推介的,是我上月底從東京買回來的必掃眼部妝物,價錢平唔使講,仲要勁防水兼持久耐用。每次我去日本,(其實台灣都有)都一定狂掃它的眼線筆,講咗咁耐,究竟係何方神姓咁吸引我呢?就是資生堂旗下的上架品牌INTEGRATE。

我本身眼形深,眼油又多,試過坊間許多不同品牌,無論平貴,都會很易溶妝,不到半天便變成熊貓眼,多年前經朋友介紹試用後,即愛上它的眼線液筆(最右邊的心形包裝及黑色那兩支,各1026円已連稅,即約港幣$66),以前只有黑色及啡色,今次我見佢推出升級特幼筆頭版,即時黑啡色各掃兩支,仲買埋佢秋冬限量的棗紅色。

 

有圖有真相,稍為吊起隻手輕輕畫,線條可以好幼好順暢,稍用力地畫,眼線又可成粗線條。我用咗兩星期,真係喊都唔會溶妝,我開住水龍頭下影相俾大家睇,畫完幾乎即乾,在流動的水沖洗下都唔甩色溶化,如果用手指用力捽先會有少少化開。所以落妝一定要用水油合一眼部專用的卸妝產品,才可以落得乾淨。但個人測試過,即使是同一產品,防水持久度以黑色最強,其次是啡色,相對最易捽甩的是限量版的棗紅色。

今次另一新發現就係佢哋新出的睫毛液,簡直重現當初第一代MJ (Majolica Majorca)淺黃色梳形睫毛液(現在已停產)的完美效果!!!

我一向對梳形睫毛液有情意結,因為愛佢易梳唔打結,可以掃出條條分明纖長的睫毛。呢款梳形設計我俾10個讚,稍微的弧度,配合兩邊梳形設計,很貼眼形,很易梳之餘,纖維份量恰到好處,梳上下睫毛都超順暢,梳兩下,整排睫毛即又長又濃黑,感覺仲好輕盈,唔會拉直或令睫毛下垂。我最關注的當然還有搽足一日,一啲都唔甩唔溶,防水度極強!(1296円連稅 約港幣$84)簡直物超所值,我後悔只買了一支,我必定托朋友再入貨!

INTEGRATE基本上喺東京各大小藥房都可以輕易搵到。香港暫時未有,去開台北的朋友,都可在屈臣氏買到,有興趣一試的,不妨留意吓。

另一推介必掃的,是KAI同人氣靚女化妝師中野明海(Akemi Nakano)聯乘的電熱睫毛器,我行咗好多間藥房都搵佢唔到,最終竟然俾我喺新宿近歌舞技町的激安店見到,見餘下最後兩支,二話不說即搶!

金屬棗紅色,摺得埋的輕巧設計,單係外表已經贏晒,微弧的梳形掃頭好貼眼形之餘,正面及背面兩邊都可發熱。(2376円連稅 約港幣$154)

 

包裝背面圖文並茂,教你點用可以輕易塑造完美勁翹的睫毛。收起來如一把輕巧的瑞士軍刀仔,非常有型,打開左下蓋掩,按下上方的圓形小按扭,睫毛捧隨即彈開,同時亦表示已開啟,開後30秒即夠熱,推幾推,啲睫毛真係好快鬈。

用咗INTEGRATE啡色的眼線液筆輕輕畫了上眼線,自然唔誇張,最啱日常返工的淡妝用。但未搽睫毛液對眼都係未夠精靈。

 

 

用咗INTEGRATE的睫毛液,加埋使用電熱睫毛棒,睫毛明顯又長又翹,仲keep到成日唔會塌番落嚟。呢個眼妝的組合簡直係我近期最愛,完全附合我要自掏荷包買化妝品的「平、靚、正」大原則!

小貼士:唔少東京的藥房都有退稅優惠,大多是買滿5000円,即有8%即場退稅優惠,所以記住要帶埋passport去掃貨呀!

如果買化妝品買唔夠數,我推介各位可以買埋DHC出品的維他命C(圖左),大包裝60日份量抵好多,香港冇得賣之餘,計起嚟平過香港其他牌子的維他命C supplement。而藍色盒的傷風感冒藥(圖右)都係超正推介,對初起感冒藥到病除,止鼻水一流呀!掃定幾盒在家看門口吧。

查詢:

INTEGRATE: http://www.shiseido.co.jp/ie/index.html

KAI beauty care: http://www.kai-group.com/store/products/list/724

你可能也喜歡