少林足球之深水埗藍山咖啡專門店

咖啡來說, 我較喜歡飲虹吸或蒸漏咖啡, 不過在香港一杯好的虹吸及蒸漏咖啡很貴, 我唔捨得飲, 因為我飲嘢的速度太快, 五六十蚊細細杯的虹吸咖啡幾十秒內飲哂, 實在太奢侈吧!
昨天同樣喜歡飲咖啡的朋友, 推介我去一間深水埗一間店, 他說: 「啲咖啡好得, 但呢間店只得三張枱, 你哋都係外飲好啲, 因為平時下午佢係賣蒸飯和公仔麵的。
佢有好多種類咖啡, 仲要係虹吸既, 即使係藍山都係廿幾蚊杯, 其實的單品咖啡如巴西山度士, 萬特靈這些只係十幾蚊杯, 質素好過現在的Pokka。平時這區的人好小買咖啡, 店員係三個阿姐, 佢哋見我買藍山咖啡, 都會好心, 因為有人欣賞佢哋啲咖啡。」

佢講到呢間店咁搞笑又隱世, 今天忍唔住要去試吓，門口係寫住藍山咖啡專門店, 但格局就係類似一間良友的小食店, 牆上啲污漬應該十年無清洗過即使清洗都應該抺不掉這種。

看看牆上餐牌, 好老餅的老少平安、梅子醬蒸排骨和炸鮮魚, 又有好多阿姐店主同劉華的合照, 她們大概是劉華的fans吧!

單品咖啡有14款, 除了熱和凍, 仲有泡沬和沙雪, 另外, 亦有特色咖啡如朱古力咖啡、榛子咖啡連低因咖啡都有。

我們點了一杯藍山咖啡, 一杯巴西山度士, 再加一件芝士餅及一個脆朱包。我不懂用好多花巧的字眼來形容咖啡, 不過這杯我卻喜歡, 咖啡的味道調配得剛好又夠香, 因為我係真係好怕這些落好多咖啡豆, 弄到杯咖啡只得個苦字的咖啡, 用幾靚的豆都係浪費咗, 而這杯調配得剛好, 咖啡豆是即叫即磨的 (因為我估平時都唔係好多人飲, 磨定應該會浪費咗)。

以十幾廿蚊可以飲到如此質素的虹吸咖啡, 真係物超所值。