幸福是，放假去重拾少女夢

由拍拖、結婚至到個仔兩歲，轉眼踏入十一個年頭，由二人行變成三人行，學做媽媽兩年，每天不離湊仔、返工、家務，忙忙碌碌時間過得特別快，原來青春已經流逝，尤其得知我最迷戀的Taeyang (老公大人你好大方嘅 ^^”)開巡迴演唱首爾有加場，仿佛好似唔關我事，因為直覺湊仔要緊，誰知今次好運當頭，一位朋友的韓國朋友的韓國朋友可以幫到手買飛，而且不另收費純粹打人情牌，機會千載難逢，兩位知心好友提議『四日三夜食買玩+演唱會旅程』，情緒一時高漲當然立即叫好，回到家思前想後才敢向老公提出，

就在我只說了句：『哈……真係有人幫到手買演唱會飛……』之際
老公已經答：『去啦，去玩吓啦，當抖吓，都只是星期五去星期一返，個仔我搞得掂嘅』
嗚呀~~~~~~~好感動

如是者，發夢都冇諗過，我竟然三十幾歲人走去追星，而且可以放下阿媽角色 (雖然都忍不住whtapp問老公阿仔有冇食菜、有冇poo poo、有冇曳……)，短短幾天旅程鍾意食就食、想飲就飲、隨意行街買嘢、跟朋友邊傾邊看韓國綜藝節目直至瞓，還有睇演唱會hyper整晚，感覺當堂年輕幾歲充滿活力，輕鬆幾日比任何護膚品更能逆轉肌齡。(當然，放任狂食之後回來在跑步機上還卡路里債還得死去活來)

一行三位熟女，好處係─永遠都會對甜品投贊成票。

旅程中基本上每隔一小時食一次甜品。

我最緊張的環節─演唱會~~~鍾意Bigbang太陽/Taeyang嘅你自然明白我當時的心情，(唔識又唔鍾意的話可以不理)，由排隊爭企位企最前至完場，跳足全晚成身汗臭之後再去食韓燒……

在此想多謝兩位志同道合好朋友帶我去食好買好兼不厭其煩翻譯俾我知太陽講乜，我真係好開心。