東京奧運｜無線主持5大「不專業主持」陳約臨訪問張家朗冇質素、李靄璣狂讚法國隊

Jul 26 2021

今屆東京奧運會進行得如火如荼，無綫奧運以大堆頭主持出擊，不過唔係個個主持都係專業評述員，昨天張家朗奪金後訪問，直播訪問卻出現一把女聲不停講自己「我好鍾意你呀，點算？」又表示代表香港市民向張家朗送飛吻，令氣氛尷尬﹗訪問完結鏡頭轉回記者真身，呢把女聲原來是無綫派去採訪東京奧運的藝員陳約臨。而早前J2播放混雙乒乓球賽事期間，港隊面對法國隊爭入四強爭奪獎牌，主持之一的李靄璣(歌手林奕匡太太)，竟然長法國隊志氣，滅香港隊威風，頻頻「劖亂歌柄」，網民發覺唔對路，在社交網狂數她完全唔專業，直斥她簡直不知所謂。

原文刊於：東方新地｜圖片：無綫影片截圖、李靄璣IG、陳貝兒IG、朱智賢IG

東京奧運｜無線主持5大「不專業」

1. 陳約臨訪問張家朗：我好鍾意你

東京奧運張家朗為香港奪金，全城歡呼，無綫派出陳約臨採訪張家朗奪金的歷史性一刻，整個訪問陳約臨表現出極度仰慕張家朗，不停講出個人感受，採訪變成示愛同送飛吻，令睇住電視直播的觀眾愈睇愈火﹗

陳約臨訪問張家朗近乎失控興奮問：「你係香港人嘅驕傲，有咩想同香港人講，所有人都睇住Live，我我…我我真係好鍾意你，點算呀？」，陳約臨講個人感受多過發問：「嘩！你呢一刻攞獎牌呀！好激動！我已經流淚，我直頭喺觀眾席流淚，要喊﹗」令張家朗一臉愕然﹗

東京奧運張家朗陳約臨 — 張家朗為港爭光，在訪問中大談奪金感受表現謙虛﹗（圖片來源：無綫奧運直播截圖）

2. 陳約臨不停插嘴打斷張家朗訪問

對陳約臨的機關槍式發表個人感受，張家朗仍保持禮貌表示多謝：「我唔敢相信，一直打得唔係太好…諗住打好第一場先，全場都係冠軍，我唔係啲咩，所以放開去打…」呢個時候陳約臨插嘴：「你點樣做到㗎？由今朝八點打到依家，中間做過啲乜，食過啲乜，陣間你想做啲乜？」其他記者問問題期間，陳約臨再硬插嘴：「可唔可以喺直播度同屋企人講多謝？」張家朗被突如其來一問，邊抺汗邊婉拒：「吓﹗好尷尬喎﹗」

3. 陳約臨話代表香港市民送飛吻嚇呆張家朗

記者正在問賽事問題，陳約臨再出擊搶問：「我要改口叫你金家朗呀﹗」張家朗滴晒汗話：「唔好呀﹗」陳約臨拉高八度話：「唔得呀，唔得呀，你真係香港人嘅驕傲，真係proud of you﹗頭先做直播香港市民叫我送個飛吻畀你，但因為有social distancing呀﹗所以哈哈哈﹗支持你﹗」張家朗不知所措不停抹汗﹗

網民鬧爆陳約臨唔專業

陳約臨被網民洗版鬧爆，指她霸道搶問方式令整個訪問變得不專業，留言「我以為睇緊東張西望」、「冇人想聽你講感受，想聽張家朗講嘢﹗」、「成個東京奧運被佢搞彎晒」、「開電視李麗珊直播訪問張家朗，呢啲先叫專業」、「把聲好煩好討厭」。

陳約臨究後死撐自己冇問題

陳約臨被洗版鬧爆問題廢又不專業，她接受傳媒訪問時硬撐自己冇問題，更指唔覺得問題唔夠專業，陳約臨指自己由早上一直在現場睇賽事，張家朗由早打到晚，觀眾會想知佢做過乜，食咩去維持體力，強調自己只係問題比較細膩﹗被網民指欠缺體育主持常識，她指自己在17年主持體育節目主持，當時已好留意張家朗，並指自己採訪完仍然覺得自己的問題好重要﹗不過其後陳約臨把採訪東京奧運劍撃的post刪走﹗

選美出身陳約臨新聞系畢業任客席講師

25歲的陳約臨上海出世，在珠海學院新聞與傳播學系畢業，2016年經澳門選美連盟選為2016年度國際小姐選美活動的香港代表，並贏得「亞洲皇后」獎項。2017為無綫電視基本藝人合約藝員，曾主持《丁酉年沙田龍舟競渡》、《體育世界》，2018年曾主持《3日2夜》旅遊節目，不時性感出鏡。陳約臨現正在珠海學院修讀「環球傳播」碩士課程，同時為學院兼職講師，教授主持技巧﹗陳約臨一夜成名，被網民起底後指她「教壞細路」。

另外無綫電視台都有大班人馬齊做旁述講解賽事，當中除了鍾志光有多年經驗外，其他的幾乎都是新丁，在TVB廠內講解賽事期間都有不少「甩碌」事件，惹網民評擊。

無綫奧運 — 無綫連月為宣傳東京奧運搞了不少大龍鳳，更由Do姐帶領眾主持造勢。（圖片來源：陳貝兒IG）

4. 直播混雙乒乓球李靄璣狂讚法國隊手指拗出唔拗入

日前無綫J2播放混雙乒乓球賽事期間，港隊面對法國隊爭入四強爭奪獎牌，當日負責的主持有李靄璣(歌手林奕匡太太)、鄭衍峰、吳卓衡和「後生仔」黃紫恩擔任主持，現場雖然有教練兼旁述鄧國基，但最終都出事。

有香港隊出賽的賽事，觀眾都會特別著緊，眾主持都為港隊打氣的同時，過去有不少主持體育節目經驗的李靄璣竟然頻頻「劖亂歌柄」，睇比賽期間，她總會突然講球例或者個人感受，在場的旁述們都接不上她的說話。最離譜是港隊打緊逆境波時，李靄璣竟於港隊接連失球時說：「法國隊心理質素好好，打逆境波都打出幾好質量。我都幾欣賞法國隊嗰邊，鍾意體育嘅人係兩邊都支持嘅，最緊要打出一場好波。」

李靄璣手指拗出唔拗入，身旁的鄭衍峰當然感受到，他亦忍不住出聲：「唔准，唔可以欣賞法國隊。我哋唔要精彩賽事，我哋要贏！」李靄璣愈講愈亂，其他旁述都不禁說：「好難唔Bias（偏愛），要支持香港隊！」最終港隊黃鎮廷、杜凱琹在乒乓球混雙，不敵法國組合列比臣（Lebesson Emmanuel）及袁嘉楠，力戰七局後遭淘汰，八強止步。李靄璣仲未知衰，總結賽事時，竟然講多句：「我哋法國隊就勝出咗啦……」

5. 陳貝兒朱智賢都甩碌

除了李靄璣，無綫奧運主持中的陳貝兒及朱智賢都被指甩晒碌，陳貝兒在開幕禮上講錯話係「閉幕」，一時口快快，而朱智賢就識少少扮代表，被指「九唔搭八」。

無綫奧運｜是是但但女主持林奕匡太太李靄璣唔幫香港隊網民群起鬧爆：唔專業、不知所謂！ — （圖片來源：FB截圖）

朱智賢被安排做直播評述，唔識扮識仲大件事。（圖片來源：朱智賢IG） — 朱智賢被安排做直播評述，被網民指唔識扮識仲大件事。（圖片來源：朱智賢IG）

網民狠批唔專業

李靄璣是歌手林奕匡的太太，她在加拿大溫哥華讀書成長，08年來港後參加無綫「08奧運主持專業進修課程」招募而順利獲得追訪奧運火炬傳遞的機會；後來更主持《體育世界》及《創富坊》，甚至成為無綫第一位NBA總決賽直播賽事的女評述員。有主持經驗的李靄璣今次老貓燒鬚，除了狂讚法國隊，亦講錯唔少嘢，網民反應極大，狂轟她唔專業。