原文刊於：東方新地｜圖片來源：東方新地、張寶兒Instagram、袁偉豪Instagram

袁偉豪張寶兒有共識婚後即造人？

張寶兒與家人愛買磚頭作為長線投資，家族手持超過3億物業，但始終不及袁偉豪眼光獨到，長揸張寶兒等同中六合彩，由租屋住變豪宅業主只是第一步，據知他有晒全盤結婚生仔計劃，而且早已獲未來岳父岳母首肯，於年底娶張寶兒，坐定粒六做硬豪門駙馬。

袁偉豪入豪門做三億駙馬

於疫市下藝人收入大受影響，袁偉豪與張寶兒卻在這個非常時期以7千萬入市，對於從未買過樓的袁偉豪來說，是次行動非常大膽，如果沒有張寶兒娘家作為後盾，單靠男方的資金，應該唔敢行出這一步，袁偉豪日前回應是否買定豪宅做新愛巢時說：「人生有好多唔同嘅路要行，有時候係要勇敢去面對未來，多謝。」

其實袁偉豪早前接受訪問已洩好事近，他自覺是時間進入人生另一階段，揚言希望於40歲前結婚。上周一（11日）踏入39歲的袁偉豪，收工後約齊友人在家開派對慶祝，獲女友張寶兒送上一比一的結他造型蛋糕做驚喜，壽星仔在社交網大晒甜蜜咀嘴相，並留言：「一個女伴」。對袁偉豪來說，張寶兒點止女伴咁簡單，要改口做「終身伴侶」啦！

兩公婆一條心搵錢供樓

與袁偉豪拍拖三年，張寶兒人前人後都是個100分女友，今次被踢爆聯名以7千萬買豪宅，她仍極力維護男友並非不勞而獲。袁偉豪生日當天，張寶兒收工後到將軍澳的超市為當晚生日會入貨，對於被指女家負責多過一半樓價（約4千萬）首期，她避重就輕表示是一起投資：「我哋一齊投資一齊供，付出都even㗎！今次係以兩個人名去投資，會分配好，我哋要繼續工作減輕負擔，條數一早計好係可行嘅！（但你出嚟做嘢冇幾耐，係咪屋企畀你？）我正職係藝人，但我都有買股票同做其他投資，我好感恩喺呢個時候都可以買樓，總之好難一次過好詳細咁話你知條數點計啦！」張寶兒強調與袁偉豪兩個人一條心，會不分你我一齊努力賺錢供樓。

張家投資有道

現年28歲的張寶兒內外兼備，曾修讀工商管理的她，雖然有個做內衣生意的父親張煌煌，但她大學畢業後先後在盛世廣告數碼做項目經理及李錦記健康產品集團產品發展經理，外出見過世面吸取經驗，當選港姐後她閒時會協助父親打理生意，身為長女的張寶兒或許會是內衣生意的繼承人。據知張寶兒與弟妹自小已被灌輸理財及投資觀念，其父親投資有道，除在跑馬地豪宅禮頓山持有三個物業外，前年一口氣掃入清水灣傲瀧四個單位，部分以子女名義買入，合共手持市值超過3億元的物業。張寶兒廿歲出頭已有樓揸手，早於17年她獲父親打本以736萬購入傲瀧一個實用460平方呎的單位，上月以原價內部轉售給母親招惠鳳，再以袁偉豪的首置身份聯名入市7千萬的同屋苑單位，可節省約700萬元辣稅。

肯捱茶記的貼地千金

袁偉豪屋邨仔出身，學歷只有中五程度，但他肯捱肯博，07年勇奪《香港先生》冠軍簽無綫入行，奮鬥十三年終成為當家小生，三年前遇上富家女張寶兒，家庭背景雖迥異年紀亦相差十年，但女友的貼地親和早已令袁偉豪認定對方。張寶兒待人有禮，每次見記者都笑臉迎人，千金小姐亦絕不嬌生慣養，不時見她與袁偉豪去茶記醫肚，前年袁偉豪帶當時病重的父親外出飲茶，張寶兒一直跟在後面，協助袁母一起收輪椅，可見她愛屋及烏，是個孝順女。古時「女子無才便是德」，張寶兒有財又有德，袁偉豪幾生修到。