Una 的沖繩蜜月旅行

今次會同大家分享下我上個月嘅沖繩蜜月旅行

當日一落飛機我地就由那霸機場坐單軌列車去我地第一晚坐嘅地方－安里
好好彩，落機前一日颱風’黃蜂’已經離開咗一段距離，
落機當日仲係好大風，但就完全無落過雨喇！

第一日

擺低咗d行李就隨即去隔離車站-牧志駅

原定計劃今晚會去牧志市場食海鮮，見時間仲早就行下附近嘅’國際通’喇！
不過去到日本周街咁多雪糕機同飲品機邊會真係行街唔食嘢架？

晚餐前就先食街邊雪糕機，後食沖繩隨街都見到嘅海鹽雪糕。
佢地嘅紫薯味雪糕真係食完日日都要食先安落！
邊行邊食終於去咗牧志市場二樓食晚餐！

上到去周圍都日文，所以都隨意選擇一間望落地道ｄ嘅食店坐低叫嘢食喇！

今餐試咗聽講去沖繩就一定要試嘅海葡萄同苦瓜炒蛋，
再加一個三枚肉湯麵。
海葡萄第一次食，感覺似蟹籽，
苦瓜炒蛋…..其實我覺得苦瓜好苦, 但食開苦瓜嘅就覺得佢地D苦瓜好味喇!
至於三枚肉湯麵，麵質彈得嚟又有少少韌度，真係好好味，
去沖繩真係要試下佢嘅湯麵！

食完返酒店中途　仲去國際通附近嘅超級市場買嘢食

即場食咗八爪魚丸，日本嘅同香港平時街邊小食檔好唔同，
日本嘅八爪魚丸表皮嘅粉無香港咁厚同硬！

另外，仲係超級市場買咗刺身同巨蜂提子，
意外地兩樣都唔好食，提子貪佢夠大粒，
點知真係只係貴字，味道完全無特別。刺身好腥…

第二日

第二日朝早轉地方，係附近食吉野家

食完去坐列車打算去拎車先知道往後原定嘅行程亂晒喇!
我地只帶咗國際車牌，無帶香港車牌！
就算打返香港叫人快遞個車牌過日本都要兩日!

就係咁整個旅程靠坐巴士同列車喇。

坐巴士坐咗一個鐘頭左右車程，終於去到第二晚住嘅‘猿人の湯’
因為溫泉旅館係山上面，一出房露台就望住山下一堆堆小屋同海 …真係好舒服!

“順面一提，房入面無沖涼地方，如果要沖涼就要去旅館出名嘅天然溫泉喇，
邊浸溫泉邊望住山下嘅夜景，真係好享受!
但溫泉地方唔方便影相所以無影相喇！”

欣賞一大輪就行落山搵下剛才中途見到嘅食店喇!
落山行咗好幾公里，幾經辛苦終於見到有一間食店，
唔理咁多，入去坐低食嘢先喇!

我睇圖叫咗一個牛肉飯，本來以為上面係蛋絲，
原來係芝士，芝士味好香好濃，
但一個人食太易滯喇!

第三日

呢日出發去第三日嘅住宿地方，
我地坐巴士坐去美國村方向嘅‘航空隊入口’站落車
點知司機先生以為我地去美國村…
早咗三個站叫我地落車喇!

因為一路上都見唔到的士，
所以醫醫肚先喇!

叫咗個拉麵，湯底好濃，個人認為濃到太杰喇 ..
湯底杰到好似忌廉湯。
至於個炭火燒餃子，層皮好薄，少少脆得嚟又唔會脆到好似炸物咁，
而入面嘅味道都唔錯!!

食完好彩地一出門口有的士經過車我地去住宿嘅地方喇!
呢晚我地住嘅係海邊，除咗可以聽到好大海水聲之外，
因為附近係美軍基地，經常會睇到頭頂有一排幾架戰機飛過!

房窗同露台一望就係一望無際嘅海，
同堆一條海濱長廊，朝早落樓下邊跑步邊望海，真係超舒服!

海邊除咗間唔中見到外國人練跑，仲好多人嚟潛水，滑浪，
附近可能有幼兒園，仲見到一班小朋友比老師推住BB床嚟海邊添!

欣賞完呢個咁靚嘅海景就向美國村方向邊行邊截的士，
結果行到美國村都未截到的士喇！

去到美國村就先去SEGA 夾下公仔先

夾公仔嘅地方真係好似賭錢咁….
我地係呢個地方為咗幾隻公仔洗咗幾百蚊喇….
夾完公仔行過見到對面馬路有間回轉壽司市場就決定今日嘅晚餐就係解決！

呢度嘅壽司真係超好味，就連普通嘅蛋壽司都整到同香港好唔同，
最值得一讚佢地嘅帶子壽司，大粒得嚟鮮甜爽滑！
好味到掛住食相都無影！
兩個人食咗接近廿碟壽司埋單都唔洗三百蚊！仲抵過香港！

食完周圍行下附近嘅商場，順面又試間小丸子！
又大粒又好味！

食完周圍行下附近之後，一出戶外就見到著晒燈喇，
感覺成個主題公園咁真係好靚！

第四日

呢日執好行李就起身邊行邊截的士喇…
好好彩行咗一百米都無就有當地人車我地出美國村嗰邊轉巴士喇!
因為巴士距離到站時間仲有一段時間,
所以就係巴士站格離嘅吉野家食早餐喇!

食完過條馬路等巴士，等咗十幾分鐘終於等到喇！

經過５０分鐘左右嘅車程，我地又返到那覇市

去到列車站就鎖低行李，買條雪條就出發去首里城公園喇!

去到感覺幾似歷史博物館，臨走仲撞正當地中學生嚟旅行影相添!
之後就係附近搵嘢食，近住列車站有間麵店就入去食喇！

坐低叫咗個冷麵，真係超好味，
麵質有幾好食唔洗多講喇！好味到就算唔食筍嘅我都照食！

食完就坐列車返去拎行李返酒店，
係香港好耐都無試過坐車時有呢種咁平靜嘅感覺喇！

第五日

之前一晚住嘅酒店又係係海邊，
樓下就係波の上公園
朝早望住咁靚嘅景跑步真係好舒服！

之後就去最後一晚住嘅酒店擺低行李喇
因為酒店附近好近Mainplace,
所以搞好酒店嘅事就去食喇!

日本同韓國嘅冬甩真係又好味又抵食，每次去呢Ｄ地方旅行真係總要食食冬甩
食完仲係樓上food court 食冷麵同魚生飯!
食完嘢仲係樓上再挑戰下夾公仔機…
一路都無落場玩只係旁觀嘅我，一夾就夾到部遙控直升機喇！哈哈

食完嘢夾完公仔就出發去’波上宮!
中途見到有間外型比較有日本風味嘅麵舖就入去試試喇

試嘅係第一日試過嘅沖繩三枚肉湯麵，
好味係好味，但叫咗細碗兩個人一齊食，唔夠食呀！
坐完列車再行咗２０分鐘左右路程終於去到目的地。

玩完晒返國際通食芒果雪糕，
都係好味嘅，不過覺得普通咗ｄ..

行到入黑就去原定今晚食晚飯嘅地方－牧志市場喇，
第一日嚟到沖繩都係呢度食晚飯，
當日食飯時見到有人叫刺身船就決定最後一晚一定要試試喇！

我地先係牧志市場地下一層買好海鮮，
我地買咗龍蝦，夜光貝，三文魚，帶子同埋甜蝦
之後海鮮舖職員就會帶我地上樓上飯堂，
食店就會幫我地切好刺身，龍蝦頭煮湯，夜光貝有部份會炒上碟，
其餘都會做刺身！
呢一餐我地用咗七百幾蚊港幣，相比香港真係抵喇！

去沖繩之前聽到身邊唔少人都話係一個鄉下地方，好悶嘅地方，
但呢次去完我真係覺得呢個地方好舒服。
的確，佢唔會係一個滿足好多人購買慾嘅購物天堂，
但呢個地方就可以帶比人平靜，舒服嘅感覺。

希望嚟緊去完旅行又有機會同大家分享喇！

如欲取得更多第一手美容及扮靚資訊
可瀏覽Girls Talk Main Blog：
Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)