Taiwan Trip 1
因為仲要周圍去搵景，
所以已經用咗行程一半嘅時間，
當然我地寓工作於娛樂，當工作完成晒之後，
我就會周圍搵嘢食同行街買嘢，
呢個都係我最大嘅興趣黎！
今次想同大家分享返今次去台灣買嘅一D特別嘢，
首先，我地從家品講起！
最近屋企裝修緊，都想添置返一Ｄ得意嘅家品，
香港都會有一Ｄ靚嘅家品，但可惜我覺得價錢真係太貴啦，
因為價錢問題我睇完之後都係無買到！
近年台灣開咗ｄ叫生活館嘅舖頭，
呢ｄ舖頭入面小至沖涼產品, 餐具，
大至傢俬, 擺設通通都有。
今次去到台灣去咗呢Ｄ舖頭，
買一Ｄ我地平時用到嘅野，價錢平之餘，仲有好多款式揀，
今次想同大家介紹西門町入面有一幢賣家品嘅地方，
叫做 WORKING HOUSE。
地址係台北市萬華區昆明街98-1號。
佢係西門町入面其中一幢大廈，入舖頭已經全間賣家品野,
呢D就係佢地今季最新出既家品CATALOG
影得好靚, 好似一本家居雜誌咁
咁點解咁吸引我入去睇呢？
因為入面所有都係Ｄ好細碼嘅傢俬擺設嚟嘅！
要知道香港Ｄ屋唔係好大，
外國果Ｄ係好靚，
但家品同傢俬太大嘅話我地間屋都擺唔到。
所以就吸引咗我入去睇啦！
間舖頭入面差唔多所有屋企用到嘅嘢都有，
小至沖涼物品, 香薰…
大至傢俬, 擺設, 盆栽都有晒！
但係香港呢類梳都比較貴Ｄ，
而且自己平時無咩時間去睇，
所以見到呢把梳就覺得好似我平時想買嗰類型嘅梳！
又撞正減價，所以就買左呢把梳返香港試啦！
返到香港試落就覺得梳嘅時候好舒服，
好似按摩緊頭皮咁，
大家得閒記得要梳多Ｄ頭，
因為梳頭可以促進血液循環，會無咁易甩頭髮，
而且頭髮生長嘅速度都會快Ｄ。
呢把梳我仲比咗同行位朋友試下，
可能係大梳嘅關係，佢同我都覺得用完把梳梳頭之後頭髮滑咗。
呢把梳價錢非常抵買，大約幾十蚊已經有一把。
香港專業Ｄ嘅梳都已經要百幾蚊，
所以大家經過開嘅可以去試下！
另外就係呢個雀仔形狀嘅夾仔
之前自己都買過一Ｄ士多啤梨形，車厘子嘅都買過，
但感覺太細路女，
所以當我見到呢款夾仔時就覺得好好，
大家試想下係屋企掠緊衫嘅時候，
夾衫見到好似一隻隻雀仔係度飛緊咁，
咁樣做家務都會覺得好開心
返屋企做家務時見到Ｄ咁靚嘅家品，
自己都會做家務一路感覺好開心。
而呢個雀仔形狀嘅夾仔都好抵買，
十幾蚊左右已經有一大包！
之後我就去咗另一間專賣文具, 家品嘅舖頭睇,
買左兩個沖涼嘅刷刷
點解會買呢? 好似相入面灰色長型果個…香港都有啦!
其實香港係有呢類款，
但顏色就無呢種顏色啦！
香港多數得白色，鮮粉紅色同鮮粉藍色，
顏色太女仔, 感覺又太膠，
呢隻色我覺得中性Ｄ，
而且本身自屋企嘅設計都無咁colourful嘅嘢，
所以當時一見到襯到色就即刻買啦！
而另一個大家見到麵包形狀，
形狀好得意，沖涼時見到都會沖得開心ｄ！
而且價錢都好平，十幾蚊已經有個。
大家見到上面呢張相，
我印象係Facebook見過唔少人 post 話買呢個 bra top，
話好好，可以改善「寒背」問題同埋有豐胸嘅效果。
我見口碑咁好又多人買，
岩我經過台灣西門町一間好大大型, 有三四層高嘅舖頭，
入面有賣女性用品, 化妝品, 護膚品, 食物, 就算廚房用品都有得買，
咁岩又見到呢個 bra top!
叫「美華泰流行生活館」
地址: 台北市中華路一段88號
初時第一次睇我無諗過買呢個 bra top，
因為一摸上手覺得佢個 pad好厚，
覺得太誇張，
雖然自己無嘜事業線，但都唔洗咁強勁。
所以行完之後都無去買。
但之後因為有朋友托我去買，
先知道原來個 pad係可以拆出嚟，
咁就買咗啦！
呢個 bra top 視乎大家需唔需要一個豐胸嘅效果，
如果要而自己本身又唔算豐滿嘅話，
佢個 pad 嘅厚度其實直接著佢都已經可以接受，
不過本身豐滿嘅話我就覺得有ｄ誇張啦！
我都試過幾日，佢都屬於一個好似著咗吊帶嘅 Tube Top，
係一個好舒服，好輕嘅 bra。
同埋佢嘅物料其實都好好，
雖然好似好厚身咁，但質地上都係好透氣，唔會焗，
如果大家想試嘅話，
我都覺得大家值得一試嘅！
不過如果本身要承托力好好嘅 Bra 嘅話，
我諗佢呢方面就可能唔太足夠啦！
另外，呢個 bra top 我見西門町街邊嘅地方就賣 NT499
而我去呢間舖頭只賣NT399，
有黑,白兩隻色，有細碼至大碼，
吊帶方面都有唔同嘅款式。
如果平時當佢普通底衫都係唔錯嘅，
加上價錢都算平，所以大家不妨可以買嚟試下。
之後我就去到間叫佳格服飾店嘅舖頭
地址係台北市萬華區昆明街112號，
呢間係一間好有法國味道嘅舖頭嚟嘅!
上面呢兩支香水係佢嘅自家製香水，
味道聞落好 fresh，聞到感覺好舒服，
其中一支味道仲好似 RALPH LAUREN 嘅 ROMANCE，
另一支味道就好似 BB 爽身粉嘅味道咁！
而價錢方面都係好抵買。
舖頭仲有好多價錢好平好抵買嘅指甲油！
行程中我行開新光三越，
見到一個我好鐘意嘅日本牌子 – HOUSE OF ROSE。
以前都係日本見過佢嘅產品，
呢次係台灣見返佢地嘅產品其實無之前包裝得咁靚，
價錢仲比日本貴少少，
不過如果大家無咩時間去日本，自己又鐘意又去開台灣，
都可以去呢度買嘅！
我因為太耐無去日本，本身自己又鐘意Classic Pooh，
呢次見到有Classic Pooh 嘅系列就買咗啦！
而上面呢包係檸檬味嘅 Bath Ball，
用完之後仲會有個公仔係度，
真係好得意架！
而呢個牌子除咗Classic Pooh 之外，
仲有好多唔同系列嘅 hand cream, Lip care…之類，
價錢都幾平。
大家行開呢附近都可以買佢嘅產品當手信送比朋友，
都係好好嘅選擇嚟架！
之後仲要介紹一間文具店，
叫久大文具連鎖店，
地址係台北萬華區中華路一段152號地下1樓
係呢間文具店度我買咗兩個透明格仔盒，
呢兩個盒有咩咁特別？點解我會介紹呢？
係因為我買呢兩個盒只用咗 70蚊台幣！
價錢非常抵!
講到呢度….其實我只講咗自己想分享嘅 1/3 咋!
嚟緊我仲要再同大家分享我呢次台灣 Trip 有關食嘢嘅地方，
衫，化妝書，地方…..
大家到時記得再留意啦!
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup
