Manly Beach

網誌

廣告

Manly Beach是悉尼的必遊景點,這個海灘對著太平洋,海岸線仿如沒有盡頭,海水呈深藍加深綠色,九、十月時的風浪比較大,所以有很多人愛到那裡滑浪。

其實悉尼都有一個和Manly Beach齊名的Bondi Beach,但Bondi Beach較商業化,相反Manly Beach四周只有高尚住宅區,感覺格外寧靜。
我們做夠6日工(每日4個鐘)就有一日假期,今次我們就決定去Manly Beach。
多數人去Manly Beach都會選擇從Circular Quay坐半個鐘頭船,但飛機司爸爸教我們行山去!
他知道我們想去Manly Beach時,講到眉飛色舞,說沿途景色很美,是悉尼必行的山路。
好,其實我最關注的問題是:「要行幾耐?」
飛機司爸爸答:「要行2至3個鐘。」

我聽到要行2至3個鐘之時,已經好想打消呢個念頭,我在香港十年都唔行一次山,我只是想舒舒服服去海灘,為何偏向高難度挑戰呢?
說時遲那時快,飛機司爸爸已經好雀躍地上google world教我們行山的路線,而且search了所有巴士的時間表,說:「你們就好啦!有得去行山!風景真的好靚!(講了幾次)如果我明天day-off的話,我都想一齊去呀!」
我難敵飛機司爸爸的盛情,翌日,我們安慰自己:「其實都好呀,來到澳洲就當然要試下特別的旅遊路線啦!」
前往方法:
1)去Wynyard火車站出面的巴士站.
2)上會經The Spit的車:169/179/180.

3)同司機講,要在The Spit Bridge之前那個站落車.
4)落車後過馬路,過The Spit Bridge的另一邊.
5)留意右手邊,會有一條小路,那就是行山徑的開始~

經過個幾小時的車程,我們到了一個叫The Spit的地方,走過一條好多車行的行車天橋後(好危險呀),就有一條好隱閉的山路,走入了這條叫Manly Scenic Walk的行山徑後,已經無得後悔!點解講到咁嚴重呢?因為我發現個牌上面寫住:「全長10km!完成時間:4個半鐘!難度:Hard!」
我都估飛機司爸爸對腳長過我一倍,他的完成時間(2個鐘)未必可以作準,現在不出我所料啦!

這條山路渺無人煙,一隻人影都無,初時都幾靜!不過好彩有石屎路、有橋,沿路的指示亦好清晰,基本上不會迷路。不過,當我以為條路好易行的時候,方發現前面有無窮無盡的梯級,以乎,我們要上山去!好彩的是,這是沿海的行山徑,只要望向右手邊,就可以見到勁藍的海和feel到勁涼的海風,可算是用汗水換來的慰藉!

當我們行了大約個半鐘,突然又變返落山的路,沿著樓梯走下去,我們竟闖入了一個無人的沙灘!這個沙灘附近有些超級豪宅,我想這個沙灘可能屬於他們的吧!但因為個海太靚啦,水又清,個天又夠藍,雖然無得落水玩,但都要留倩影~~~~

嘗過這個甜頭後,苦練終於來臨,因為之後我們即將進入被列入scenic walk的national park,那裡的路好難行,沒有石屎路,而且好大機會會見到好多野動物!突然,Katrina話見到有蜥蝪,我(無親眼看到)仲好冷靜咁話:「實有啦!」誰知,蜥蝪陸續有來,而且好大條、好肥美,剩係條尾都有成呎長,最恐怖係牠們全部眼仔碌碌望住你,又唔怕醜,望都唔緊要,但係唔好阻住條路嘛!

我在national park總共見到8隻大蜥蝪,其中有一隻更失驚無神出現在我腳前!
雖然在national park的範圍內都有見到遊人小貓三四隻,但大部份時間都係得我們倆,有時又會聽到草叢入面有怪聲,過程都幾動魄驚心!

行完national park,我們只完成了三分之一的路程,真係想大叫「救命呀!飛機司爸爸!」但見到一片深藍色的海,我也覺得值得!之後的路,我都唔想再提,總之就係又餓(只食了一條蕉和一個包)又辛苦,最後,我們完好無缺到達Manly Beach,但,已經行了4個半小時!
都OK,和大會設定的時間一模一樣!

其實如果FOR愛運動的人,行山去Manly Beach、坐船返市中心,確是一個不錯的選擇,因為沿路會見到好多好靚的風景,加上源源不絕的海風,這個方法可以從第二個角度欣賞Manly Beach,不過,如果怕蜥蝪的話,還是做足心理準備啦!

你可能也喜歡

There are no comments

Add yours