６款夏日粉底試用

夏天一到，好多品牌都推出左好多新粉底
去迎合返呢個咁潮濕焗熱既天氣，
今次有同事Yuki同Christy分別試試六款新粉底，
其中一款係BB cream黎，
不過我地都歸納佢為其中一款粉底試下，
今次會試下呢幾款粉底既質感同感覺，
亦會用眉筆畫係手再用粉底遮黎試下個遮瑕度，
當中都有唔少驚喜架，而且亦好適合夏天用，
不過每款粉底都適合不同既膚質用，
大家要留意自己既需要去選擇啦！

01 Dr. Hauschka / Foundation $290
(Made in Germany)

天然、有機化妝品，不含香料、礦物油及防腐劑等，
新配方可有效均勻膚色，肌膚展現完美無瑕，
採用最優質的成分和天然礦物，共有五款色調，
並加入紅石榴精華，澳洲堅果油和椰子油，同時滋潤和保護皮膚。

呢款粉底係比較杰身既creamy狀質地，
開頭都怕會好黏笠、厚身，
但發覺好易推均勻，滋潤得黎感覺好幼滑，
推開後會變返爽身，效果亦好自然，呢點都幾驚喜，
佢既遮瑕度屬中高度，
面上既大毛孔、紅印、黑眼圈都唔見左7-8成，
而且可以做到均勻膚色，
係一款好適合夏天用既產品，敏感皮膚都用得架。
＊適合乾性至混合性皮膚使用

02 CLINIQUE / anti-blemish solution BB cream SPF40/PA+++ $300
(Made in Japan)

舒緩暗瘡護理BB Cream質地輕盈透薄，
oil free，shine free配方打造自然啞緻粧感，
可遮蓋暗瘡、暗瘡印及粗大毛孔等瑕疵問題，
且提供強效紫外線防護，清爽持久長達12小時。

呢款有色bb cream用前要搖勻，
質地就好似防曬液既水液狀咁透薄、水潤，
本身以為佢既遮瑕度會麻麻，
點知上面後好似美圖秀秀左咁！無左9成瑕疵！
不過呢款只得3隻色，我揀既色係白左，
所以睇落更加好似做左effect咁。
我自己屬混合性皮膚，而呢款oil-free配方感覺比較乾，
有乾紋或甩皮地方亦會較顯眼，
建議混合性皮膚使用前可先用較滋潤既護膚品打底保濕
但油性肌膚就十分適合，可以長效控油，
加上高度防曬，亦係一款好適合夏天既粉底。
＊適合油性肌膚使用

03 ENPRANI / Pro-blending Found Serum + Magic Actor SPF30/PA++ $468
(Made in Korea) *盒裝連concealer 但這次不作試用*

特殊製成雙效容器，結合柔滑粉底及嫩膚精華，
為肌膚注入蛋白質及水潤元素，
維持高度遮瑕力，可緊貼皮膚表面，
使肌膚柔滑光澤，呈現如雞蛋般嫩滑效果。

呢款粉底好特別，係由serum＋粉底兩溝而成，
要先溝勻顏色先上面，
粉底質地滋潤但唔厚身，好易推同貼面，
上面後感覺潤澤，膚色均勻，帶有珠光感，
遮瑕度比前一款更加高，屬最高遮瑕度，
可以遮蓋9-10成大小毛孔、紅印同黑眼圈，
連深色既雀斑都可以遮到，
難怪呢款粉底有「雞蛋粉」之稱！
不過呢款粉底都幾潤身，上面後要加返碎粉先得，
極乾皮膚就應該岩岩好啦～
＊適合極乾皮膚使用

04 bare minerals tinted hydrating gel cream SPF30
(Made in USA)

含有超卓既抗氧化效能，可以防止細胞產生氧化物，
避免膠原蛋白及彈性受到破壞，
能預防肌膚鬆馳等。

我自己屬於混合性偏乾皮膚，
最近面上生暗瘡留下較深色紅印，
而且鼻位偏紅，
最岩就係用黎試粉底啦~!
呢個屬於啫喱粉底狀，好易推開，
質地好薄，搽上去無乜粉感幾自然，
感覺亦唔會太笠身，
做到均勻膚色，但色斑同紅印都隱若見到，
黑眼圈位置需要另加遮瑕膏，
鼻翼位遮完仲見到有少少紅。
遮瑕度屬中至低，岩一啲皮膚唔算多瑕疵既朋友用。
＊適合中至油性肌膚使用

05 Shu uemura 清爽持久粉底液 SPF 30 PA＋＋＋ ＄400
（Made in Japan)

呢款係嶄新零油份粉底液，而佢加入左三重粉末複合物，
可以好快吸收汗水同油脂，帶來好持久既妝效。
當中亦加入左薄荷葉及石榴萃取物，
為皮膚帶黎清爽舒適既效果。

呢支粉底入面水同粉體係分開，
用前要先搖勻
質地係水液狀，質地好薄，
而且一上面就變得好清爽，
均勻膚色無問題，
眼圈大約遮到一半，遮瑕度屬中度，
妝感都好自然，
但中至乾性皮膚既朋友係用佢之前就要做好保濕，
唔係就會覺得乾架啦！
上完呢個粉之後，鼻翼甩皮位變得更明顯，
如果有呢個問題既朋友，就建議係上粉既時候係按壓方式上，
千期唔會再用粉卜拖，唔係就更加易甩皮架啦！
＊適合油性肌膚使用

06 MAC pro longwear nourishing waterproof foundation $340
（Made in Belgium)

呢支粉係有防水功效，好岩夏天大汗淋漓既時候用，
遇到落雨同淚水都唔會溶妝，
可以打造持久無瑕既妝容。

質地較creamy,容易推開，
原本聽到呢支係防水粉底就好擔心會好乾，
但效果都幾驚喜，
感覺唔會太笠又唔會太爽身，
遮瑕度屬中至高，面上大部入既瑕疵都可以遮到，
on top係眼圈位國印多層都可以唔洗再落遮瑕膏，
雖然佢有好好既遮瑕度但唔覺得好厚，
對於我黎講都算幾驚喜。
多瑕疪既朋友都可以考慮下佢，
薄薄加多層就可以當埋遮瑕膏使用。
＊適合中至混合性皮膚使用

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup