首爾搜購衣飾攻略

May 17 2015

上星期出trip去左首爾工作，今次撞岩生日時間去做野，
頭尾5日，不過去回程都係晏晝機，
所以夾埋都冇左2日，去睇景同shooting又用左1日半，
剩返既工餘時間先有得去行下街shopping買野。

今次既拍攝地點喺梨花洞壁畫村，
呢度真係勁勁勁多香港人！
我地趁平日去拍攝，
無諗過周圍都係講廣東話，
反而好少本地人。

成個拍攝過程都好順利，
有睇開我地blog既朋友都應該見過呢位韓國model，
佢係我地既御用model黎架，
最近幾次出trip都係搵佢，
佢勝在天然、又好多style都carry到，
加上性格乖巧，好得人鍾意，
上年11月去shooting佢仲親手diy左條手鏈比我，
今次我都有準備到禮物送返比佢，
成個過程都好開心呀～

完左所有拍攝，先有時間shopping，
我建議既攻略就係專攻東大門就得喇！
因為其他好多地方(弘大、梨大等等)既野東大門都有齊，
集中啲主攻一個地方就更加慳時間！
平時大家都應該有行東大門，
好似係批發市場U:US、APM LUXE同APM呢啲地方，
建議星期五晚同星期日晚去就最好，超少人！
可能人流唔多，啲sales姐姐變得好殷勤，好好service，
如果多人，佢地真係唔show你。
今次買既野唔係話好多，
只係我平時瘋癲購買程度既1/3，
以前我就喺U:US買衫多，
估唔到今次喺APM lUXE同APM買得仲多，

因為U:US好多麻質衫，我自己就麻麻地。
同大家分享左我買左既飾物先啦，
大家都知我好鍾意買耳環，
今次都係主攻耳環！！
全部都喺APM / APM LUXE地庫買。

呢一類得意又好特別既耳環之前都有買過，
我都有介紹過比大家，就係叫wooly bully呢間小店，
今季佢地出左好多新耳環同袋，
雖然價錢唔平，但我都忍唔住買左幾對！
佢啲款夠晒特別，香港好少有，又唔會同人撞。

我仲買左呢啲通花lace船襪同短襪仔，
唔只日本有，韓國都好多，
而且款式都好靚，又唔貴。

另外喺隔離啲鋪頭都有買到野，
除左耳環，仲有眼鏡、手鈪，
尤其果幾款手鈪，手工好靚，
好似有brand既款咁，即刻買左幾個呀～

而呢條珍珠鏈我本身都無諗過買，
不過望真啲，佢既珍珠每一粒都有一個抓托，
好特別，所以最後都係買埋！
以上既價錢我就真係唔太記得，掛住買買買，
大概每樣百零蚊左右，都可以接受既。

今次最估唔到係買左好多睡衣！
真係去左咁多次都無諗過！
全部睡衣都係喺apm 3/F一間專賣店買，
睇相都見啲款好fancy～
香港真係比較少呢一類，
就算有，有brand都比較貴，
佢地既pattern，手工都好好，只係百幾蚊，
除左唔同pattern，仲有長、短袖、背心、one piece款等等，
我show出黎呢度其實只係其中一部分哈哈。
不過提提大家，所有睡衣都係free size，
有少少蝦人著，我都係岩岩好，
如果微胖既朋友可能未必岩喇。

入到去第一樣睇中就係呢件白色晨褸，
毛巾質地，又滑又舒服，

而且好薄身，唔怕太焗熱，
平時晨褸都係偏大件，而呢件既size唔會太大，
香港靚款可能都要５百幾以上，
呢件就３百零蚊左右，即買！

出街衫方面，都買左廿零件，
都唔算係最瘋狂啦～
今次就唔show晒比大家睇喇，
因為大部分都係常見既款式，
價錢都唔貴，大約30,000won以下，
好多都仲有特價添！

好似呢條pattern村姑裙，20,000won左右，
我自己一向都好鍾意呢類衫。

而呢件黑色衫，都係10,000won左右，
好抵，detail位又做得靚～

呢度都只係冰山一角，
呢類薄身既衫要係30,000won以下先考慮買，
大約百幾二百蚊就有一件啦～
呢邊好多衫就算sale緊都係季頭出既款，唔會過時。
我另外仲有買左件好正既trench coat，
都係30,000won左右，
可惜買完返轉轉想幫朋友買時都已經賣晒，
所以都係唔post出黎引大家喇～
韓國除左shopping買野，
仲有好多好好味既餐廳，
下次會分享一下今次trip食左咩野，
記得繼續留意我下次既分享啦！