零食推介

Dec 30 2014

唔知平時大家會唔會鍾意食下零食呢？
有時口痕痕或者做野做到攰，
食下零食就精神番曬！
我地workshop都有個零食籃，
Janice時不時就會買下零食比我地食，
之前都有同大家分享過芒果乾、齋雞粒
同超群曲奇餅都係我地班同事既最愛黎架。
今次睇下我地有咩心水零食推介比大家啦！

Janice:

Post 呢個零食真係暴露咗自己嘅年齡喇，
鐘意食呢款糖嘅朋友應該同我差唔多年紀又或者比我仲要大D添!
以前細細個嘅時候，呢種糖嘅價錢非常平，當時自己嘅零用錢唔多，
貪佢當時嘅包裝夠細包，唔會食食下就放埋一邊唔食，
仲可以慳錢買其他零食!
呢款糖帶少少酸，有D似檸檬味，
佢係一種粉狀嘅糖，放入口唔夠2秒就會溶化晒，
佢嘅酸味令人感覺好醒神，
所以宜家行過見到有得買嘅話，我都會買D返屋企食下!

另一款要推介比大家嘅就係呢包魷魚條，
呢包魷魚條係朋友早前去西貢買嘅，朋友話呢包魷魚條好有鮮味，
所以買咗包比我試下，而我自己本身都好鐘意魷魚呢類小食!
一打開呢包魷魚條已經聞到好大陣魷魚絲味，食落覺得真係真材實料，
製作時唔會烘到魷魚條好乾，食落時仲有少少軟身同煙煙韌韌嘅感覺，
平時一般嘅魷魚絲唔會有呢種鮮嘅味道!
因為呢包魷魚條可存放嘅時間都有一段時間，
每次食之前我都會放入焗爐2﹣3分鐘，
因為焗完出嚟，D魷魚條熱熱地又軟軟地，食落感覺更好!
所以大家平時去開西貢可以去買包魷魚條試下！
（呢間舖頭仲有好多其他食品㗎）

Irene:

呢個糖可以話我每次去日本都會掃半打返嚟！
假如大家都好似我咁，成日大肚婆上身，
好鍾意食酸濕嘢，或係梅類嘅產品都like，
呢個糖就一定啱你！

以我食過咁多隻梅糖，
呢一個係最能夠做到，好似食緊粒梅咁嘅效果，
咸咸酸酸咁，非常開胃，
一食第一粒就會想食第二粒！
我係香港都見過賣水貨店地方有，
不過價錢實在貴得好離譜，貴原本成一半有多！
所以大家有機會可以去日本時買一包試吓，
包你食上癮！

Yuki:

相信唔少人對金梅片都唔會陌生，
酸酸地甜甜地，
日常口淡淡或者病左無咩胃口，
食佢就最好喇～
唔覺唔覺食下食下又一樽。

好記得以前有個包裝係綠色金色鐵罐裝，
果隻既味道係更加酸，更香梅味，
不過宜家好似已經無出，又或者好少地方先搵到。

呢隻係第二隻我覺得ok既，
惠康就有，9蚊2樽，袋出街”嗒”下糖之選。

Christy:

759可以話係近年其中一間最受歡迎既零食店鋪之一，
入面有好多唔同款既日本零食，調味料同罐頭賣，
價錢十分相宜，做埋會員買野就次次都有折，
我就成為左常客，次次都去掃好多零食番黎！

呢包薄脆芝士餅係我朋友之前係日本買比我既手信，
當我食曬果下真係有啲失落，
點知就比我係759發現到佢既蹤影！
一包入面有10小包獨立包裝，
唔洗驚一次食唔曬啲餅好快就林左，
芝士味好濃，唔會似有啲芝士餅咁得個餅面有少少味，
岩曬我呢啲瘋狂芝士迷！

好薄身，非常香脆，
次次買完都食唔停，
不過呢隻餅好多時會斷貨，
不過最近我見到city super都有得賣呀！
但價錢會貴少少，大家可以去格下價啦。

雷品：

Janice:

雖然今次係講零食為主，但對我嚟講泡菜都算係零食嚟嘅，
因為平時悶悶地嘅話都會拎出嚟食下，又或者當作餐前前菜。
我試過好多唔同牌子嘅泡菜，係香港好難搵到一款岩我自己口味嘅泡菜，
以前係百佳買到一隻紅色盒包裝嘅泡菜味道唔錯嘅，
但可能來貨批次問題，最近食到覺得味道怪怪地，
所以都不斷試試其他牌子。

因為見到呢盒泡菜上面寫住”World Wide No.1 Korean SalesNo.1″，
價錢又唔係貴，所以就買咗嚟試，點知一試就非常失望喇!
買返屋企打開蓋時留意到呢樽泡菜顏色好淡色。
平時我去韓國食到好味嘅泡菜顏色多數比較鮮色嘅！

另外，入面嘅汁都好少，所以盒入面比較上嘅泡菜都比較乾身，
而味道方面，我都唔係好鐘意。
感覺味道酸酸地之外，仲有少少發咗醇嘅酒味，感覺真係幾難食，
雖然好浪費，但最後呢盒泡菜我都係掉咗，
往後我一定唔會再買呢盒泡菜食喇!

最後都講句喇，人人口味都唔同嘅，
所以上面嘅意見就純粹比大家參考一下。

Christy:

banana chocolate cake

點解零食中都會有雷品呢？
無錯！雖然口味既野人人都唔同，
我覺得唔好食既野，可能你會覺得好食，
不過我就覺得呢包野充滿住誤導成份！

佢叫自己做banana chocolate cake，
但我咬完一啖發現入面竟然係無chocolate既？
一啲朱古力都無，點解要叫banana chocolate cake呀！

佢唔可以話難食，不過如果你係以為佢入面有朱古力而買既人(例如我…）
你就會好失望架啦！
而且佢味道都幾甜，唔食得太甜既朋友就要考慮清楚先買啦！

Irene:

土耳其軟糖

(圖片取自互聯網)

呢個都好耐之前試，所以唯有網上搵圖俾大家睇！
自己本身好鍾意試新嘢，
之前有試過土耳其雪榚，覺得好正，
點知有次行行吓citysuper見到有賣土耳其糖，
心諗應該好似雪榚咁唔錯，又見到個包裝又幾靚，
就買咗盒返屋企！

打開個盒就好似圖中咁，好多糖粉，
本身自己expect個口感係好煙韌，好chewy感覺，
但完全唔係！
係軟身好多，而且放入口會融成一粒粒，好似沙咁！
口感非常差！
另外味道上，自己覺得怪怪，
以為係水果味，但原來係玫塊同果仁味，
不過食落一啲都唔似！

Yuki:

呢個櫻花味jelly係有朋友去完日本買返黎既手信，

見佢個樣靚靚咁，入面jelly仲有朵櫻花，心諗應該幾好味。
同埋本來我對櫻花味都唔抗拒，
因為我曾經食過Häagen-Dazs既櫻花味雪糕，
甚至係櫻花味crepes，都覺得唔錯、仲幾好味添！

不過呢個jelly真係非一般口味，
食完之後個個面口都變晒，可以列入十大禁食品之一。
佢個味竟然係似藥水味，諗返起都打左個冷顫！
個質感仲好似食緊膠咁，可想而知係幾咁中伏。
如果你地有機會去日本試櫻花味既食品，都係小心為妙～

Karen:

呢包糖購自日本，見平平地(唔使$10)就買嚟試下，
諗住普通一包糖唔會難食得去邊嘅，
而且桃味都應該非常穩陣。
打開聞到好大陣桃味，好似唔錯，
形狀好似粒方糖咁，但係一咬落去就覺得出事！
味道好甜，係正常嘅桃味，但係質感超奇怪，
完全冇軟糖果種煙韌，似係溶咗嘅糖，
一粒粒咁，但係又唔係乾身嘅方糖咁，
可能“smoothie”就係咁解，總之好古怪，
諗住食埋佢，但係咬咬下都係頂唔順。
Workshop個個同事試完都覺得超難食，
一致認為係雷中之雷嘅零食！

如欲取得更多第一手美容及扮靚資訊
可瀏覽Girls Talk Main Blog：

Girlstalk Blog
或 Like我們的Facebook專頁：
Janice Lam Makeup Workshop Facebook