遊覽南法小鎮(上）

早前去左10日歐洲，
今次出trip去法國，其實都係以做野為主，不過平時都好少放假，
所以今次做野前都抽左少少時間去遊覽幾個南法小鎮，
成個trip只能用一句總括，就係「貴人出門招風雨」！
我去到邊，啲雨都跟住走，所以都無咩mood行街，
所以都唔同上年咁買左咁多野啦，
今次主要都係觀光同食野為主，
第一日去到果邊本身諗住行下museum但又比人勁打尖，
所以最後都係行下小巷小店同埋勁食野！
今次想同大家分享番去左既餐廳，當中有好介紹架！

Nice (尼斯)

第２日就同朋友去左Nice，
身邊好多朋友，就連外國朋友都一致推薦呢個地方，
咁岩我又有位朋友喺當地study，
所以就plan左去呢度玩喇！

呢度係屬於舊城區內既海邊，
雖然天陰但都有泳客，
由於呢邊所有灘都係石灘，
見住泳客上岸時好似做緊腳底按摩咁。
我自己都係鍾意沙灘多啲！

本來一場黎到，我都好想落下水，
呢度水質好好，好清又好藍，
但係天陰陰，比想像中清涼，所以最後打消左呢個念頭。

呢張相係我地去前幾日前個朋友影比我地，
見到真係好興奮！！
不過去到都幾失望，
遇著又落雨，又大風，做唔到户外活動啦！
而呢張就係我地走果日影既，
走果陣就即刻變左碧海藍天囉，唉……

題外話～大家見到我長期著住呢件Burberry既乾濕外套，
呢件真係我今個旅程既救命外套，
因為佢好擋風又好防水，
個幾日都落好大雨，就算拎住遮都會濕曬，
番到酒店發覺除左件外套之外，入面既衫都完全無濕過，
所以建議大家出trip一定要必備呢類既乾濕外套呀！

之後我地轉移左去行街，呢度比我既感覺好似外國版古裝街，
不過都係以遊覽為主，無買過野，
呢度都好易行，唔怕盪失路，而且有google map就更加唔使怕！

呢度好多小店同埋傳統野食賣，
不過勁甜！
唔係太岩我，
周圍行下就已經好寫意。

我成日都覺得巴黎好似深圳羅湖附近，

其實坦白講，應該話仲危險過羅湖呀！
因為身邊真係太多朋友比人偷野搶野，
去過巴黎既朋友都知，
身邊既朋友都會叫你小心比人搶野！
其實都想share番比大家聽，
而家D賊偷野既手洗真係層出不窮，
所以大家要小心啲！
好彩我都未試過比人偷野，
只係之前都試過比吉卜塞既乞兒嚇過下！
大家呢個時候真係要鎮定，
如果佢地知你驚既話，就會成班黎搶你野架啦～

我有朋友試過由巴黎機場搭車出市區，
因為個度有條高速公路成日塞車，
而附近有好多單車黨會扑玻璃搶野，
我朋友就將手袋放係膝頭上面咁就出事啦，
啲賊真係好狼死，

所以我建議手袋放係腳底就比較安全啦～

去到旅客區，老實講吉卜賽啲人都知道你唔係當地人，
佢地通常一家人行事，可能會拎張地圖扮問下你野，
其實已經派左個小朋友摷緊你個袋啦！

之前又聽到朋友講去間餐廳食野，
啲賊好鐘意一班人行事，
佢地又會倒杯野係你身，當你好慌忙抹緊既時侯，
又乘機偷你野啦～
我建議大家要買個細袋仔跟身，
用黎放貴重物品，
而我自己既裝束都係將個袋放係件外套入面，
再將貼身要用既野，
例如化妝品，紙巾等等放係金色個shopping bag入面，
就算比人偷左都唔會心痛啦～

去到巴黎都建議大家興奮之外都要提高警覺呀！

最好唔好去到太夜或者去好靜既地方，
唔好以為好nice既外國人一定係好人，
而且佢地鐘意帶埋小朋友犯事，
因為小朋友就算比人捉到都唔會拉，
所以啲賊先咁倡狂，
係當地報警又好麻煩，
所以真係小心財物呀！

不過今次黎到Nice安心好多，relax好多，
唔怕比人偷野搶野，可以好好享受。

Nice其實好細，呢度既名店亦相對較細同少，
如果真係想shopping既朋友都係去Paris比較好。
呢邊用一日享受陽光海灘，一日行下小巷睇下野，兩日就已經行晒。

去到幾日都落雨，我地化悲憤為食量，
決定勁食！！

因為呢邊好近意大利，約一小時車程就到，
所以附近都好多意大利餐廳，
pizza、pasta果啲…
不過今次黎到反而想食海鮮！特別係生蠔！

呢間餐廳叫LOVE，但係唔關個名事，
只係見到佢menu有生蠔所以揀左佢。

唔知點解去旅行都特別快肚餓，
我同朋友兩個order左3-4人份量，
但最後都食晒！

第一樣推介就係生蠔！
我地order左一打，around二百蚊左右。
本身我自己唔鍾意美國蠔，嫌太creamy，
法國蠔鮮甜好多，又滑，
完全唔膩！
食既時候加少少檸檬汁就已經夠，
唔需要並他醬汁。
真係超過正！
如果afford到比較貴價既餐廳真係好ok，
我地食完已經上左癮！

另外我地點左到法國必食既青口，同樣都好鮮味，仲一啲都唔韌！
鵝肝配麵包同無花果醬個口感亦都好好，
唔會感覺膩口，全部都比我地食晒。

不過呢邊天氣都凍凍地，低過15度，
所以都想叫個熱食，最後揀左份牛扒，
估唔到呢度既扒勁juicy！好好食！
推薦比會黎Nice旅行既大家～

LOVE
地址：13 Rue Massenet (angle rue de France),Nice,France

（真實圖片）
今次我地去Nice無book酒店，我地係airbnb度租Apartment,
如果下次再黎我都會再係airbnb度book,
因為真係好舒服，設備好齊全，有廚房有雪櫃，
好方便～
大家見到相入面有啲亂，
其實都係太攰唔想執自己野所以先咁亂～
兩間房都好大，價錢仲平過酒店，
如果兩pair人去，除番開個價錢就真係抵啦！

（網上圖片）

大家見到真係同網上張相一樣咁靚咁乾淨架～

網址：http://www.airbnb.com.hk

Cannes (康城)

第３日去左康城，
大家都聽得多康城影展，
我自己都係第一次去，由Nice搭火車去原來好近，
不過一到步已經勁大雨，
所以都完全無影相，
以下既相係上網搵返黎。

（網上相片）

初時以為年年都有影展，
個地方應該好大好靚，
不過其實呢度好細，兩個幾鐘已經行晒，
係好普通既小鎮feel，觀光ok，
但如果太多行程，就可以skip唔去。

（網上相片）

Monaco (摩納哥)

而康城另一邊就係好出名既摩納哥，
又係一個小時就已經去到，
呢度最出名就係賽車同蒙地卡羅賭城！

我原本以為會見到好多豪華裝修、富豪、名車…
但呢度比我感覺好似澳門。

一落車既地方已經好熟口面，
係好多車手撞果個彎，賽道既地方，
不過呢邊既野都好舊，無好新時代既感覺。

海岸邊泊左好多遊艇，感覺好似淺水灣。

之後去左賭場，初時又以為會好似las vegas咁，
點知原來好細，得一忽仔係賭場，
澳門仲更加豪華同新淨！
其實真係無咩特別，
當然黎旅行都可以睇下呢類景點，
不過就有少少失望。

Saint-Paul-de-Vence(聖保羅)

留係Nice既最後一日，
我地就去左呢個地方，
係Nice搭巴士去大約45分鐘度就到，
其實呢度係一個好出名既旅遊景點，
好多本地既旅客都會去觀光。

係地產公司見到呢個touch mon，
我都覺得值得一讚，
因為我地太鐘意睇下樓市情況，
呢邊一間house已經係香港一個床位既價錢…
價錢平，地方大，環境又好，真係好正，我自己都想係個度住呀！
因為外國小鎮舖頭好細，佢地就將所有放盤既資訊放係個touch mon度，
就算佢地收左工，我地都可以隨時睇到，真係好方便～

平日我地去墓地都唔會亂影相，
不過呢邊既墓地係好似公園咁，
亦有好多名人被葬喺呢度，
好似係好出名既法國畫家Marc Chagall都係葬喺呢度。

之後我地就周圍去行下小鎮小巷。

行到去當地一間酒店入面食lunch。

呢間餐廳真係極力推薦！
好好味！

呢度既前菜、甜品都係一流！
我地３個人order左兩個餐，岩岩好，
所有食物都好精緻，
如果比較大食既朋友可能就要一人一個餐啦～

左上果個無花果甜品，加埋餅底同其他材料，
口感非常之好，餅底又夠鬆脆，
建議大家黎到可以試試佢地main course既鴨，
一啲都唔韌，好食！
不過呢度食野都唔平，
黎食野就真係要準備定銀彈啦～

Hôtel Le Saint-Paul
地址：86 Rue Grande, 06570 Saint-Paul-de-Vence, France

今次就同大家介紹住咁多先，
下篇將會繼續同大家介紹Paris有咩值得去既地方啦～