週末市集

放假當然要周圍去玩！
行街睇戲厭太悶？行山又太體力勞動？
咁就可以周圍去下跳蚤市場或手作市集，
睇下人地賣既精品同DIY作品，
再喺附近搵間cafe坐低同朋友傾下計，
都係一件簡單快樂既事黎架。

上星期日我就去左元朗錦田一個市集，
估唔到果度都幾多野賣。

開頭以為要入村先見到，
原來好方便，只要搭西鐵去到錦上路，
落左電梯，就已經見到架喇，
正正喺西鐵站出面。

呢度市集賣既野都好特別，
你諗到，諗唔到既野都有，
比我感覺好似去左台灣果啲夜市咁！

當我行到去呢個賣afternoon tea 杯、碟、架既攤檔，
真係忍唔住要即刻入去睇！
可能你地會話，實好貴啦，
但其實一套杯碟架套裝（6隻杯+6隻碟+1個架）都只係3百幾蚊，
而且質料仲唔係太差，
我自己都睇中左一套，
女仔必去呀！

另外仲有啲賣民族飾品既檔攤、
賣懷舊零食既攤檔、
賣有機食品既攤檔等等。

好多大人會帶埋小朋友黎，
撈金魚、玩彈珠機，吹肥皂泡，
見佢地個個都玩得好開心。

仲有一個攤位，
相信小學生（男仔）真係不能抗拒！
就係模型車大賽！
仲有ranking架，好pro咁，哈哈，
成班小朋友都好比心機好投入！

行完呢個市集之後，我就行左入村入面喇～

因為入面有個錦田紅磚屋，
聽聞係另一個特色市集，所以就去埋睇。

我用左五分鐘就行完呢個磚屋，
其實都有少少失望，
因為唔係咁岩少男少女黎睇，
如果可以大執一下入面既鋪位，
應該可以吸引到更多人去。
網址:http://www.yl.hk/rbh/

返出去已經開始黃昏，呢邊既景原來都好靚～
而且無高樓大廈，空氣都好啲！

下次再去其他特色市集，再分享比大家睇啦。

如欲取得更多第一手美容及扮靚資訊
可瀏覽Girls Talk Main Blog：Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)