自製乾果零食
之前參加咗一個event，
event裡面有提供一啲乾果嘅食物，
食過之後就覺得原來呢啲乾果食物都好好食架喎。
因為自己成日返工，公司又冇雪櫃，所以平時都好少食生果，
其實食生果對身體都好啲有益啲，
於是就諗如果自己都有部乾果機，
咁就可以生果當零食，隨時隨地都食到生果，
又唔使成日食啲冇營養又唔健康嘅零食，
整咗仲可以拎番workshop食，
諗住自己一個人住，屋企都有位擺，所以愈諗就愈想買。
其實買之前都做咗啲資料搜集嘅，
行咗百老匯、豐澤都唔見有得賣，
以為唔係好普及，所以唔係咁多地方有得賣，
有次行行下商場見到有部機，初時以為係蒸爐，
發現裡面擺晒生果，有啲似係乾果機喎，（其實果部就類似我而家果部）
入到舖頭一試之下，唔知係因為生果烘乾時間唔夠耐定咩原因，
我就覺得好似烘得唔係好乾，
而且果部機實際嘅size大過一個大容量嘅電飯煲，
咁我就考慮到擺放位置問題，
同埋價錢差唔多要$900，唔算平，用途又唔係咁多，
始終體積好大，所以本來一心諗住買，但最後都冇買到。
好彩果陣冇買到！因為之後行另一個商場，
應該係吉之島嘅電器部裡面見到另一部乾果機，
初時售貨員話係買電器送嘅贈品黎，
但係我而家冇電器需要買，
要買嘅之前都買晒，以為唔會有零售啦，
再問另一位售貨員，佢就話有零售嘅，
其實已經試咗用呢部機四、五次，
以$270呢個價錢黎講，
我覺得呢部機值100分架！
第一價錢真係好平，雖然佢烘乾嘅程度未去到好似喺街買嘅乾果咁乾身，
但係for自家製嘅要求黎講，已經好OK喇！
另外，而家天氣都比較潮濕，
都建議大家整完之後可以放入雪櫃，保持乾爽度。
之前喺啲網站比如beecrazy，logon或者citysuper
都見過一啲專業嘅乾果機(上圖)，
成幾千蚊一部，可能烘乾速度會快啲，或者烘乾能力好啲，
但如果係自己用嘅話，我買果部機其實都綽綽有餘。
以我少少嘅經驗，建議大家切嘅厚度唔好太薄，之前試過切得太薄，
好似咬緊張紙咁，口感唔係咁好，
切大概2-3mm度個質感就會好啲，厚身啲咬感都好啲。
如果小朋友唔鍾意食生果，家長們可以試試整成乾果，
整乾咗其實都幾甜架，好似食緊糖咁，
所以我覺得無論味道同口感，小朋友都應該會鍾意嘅。
除咗整蘋果、橙之外，仲可以整菠蘿、芒果、香蕉等，
呢排天氣潮濕，用黎烘乾果仁都得架。
照計平常唔會太多人會買呢部機，
但如果屋企有小朋友，或者自己鍾意食零食，
最緊要屋企又夠位嘅話(因為都幾大部)，可以考慮下。
呢部機勝在係膠，唔會太重，熱度唔太高，就算小朋友掂到都唔驚“辣”親。
我諗唔會太多人買嘅，應該冇咁快賣晒，
如果大家有興趣就可以去吉之島家品部睇下喇！
如欲取得更多第一手美容及扮靚資訊
可瀏覽Girls Talk Main Blog：Girlstalk Blog
或 Like我們的Facebook專頁：
Janice Lam Makeup Workshop Facebook
（版權所有，未經同意不得轉載。)
