秋日新粉底
最近好多品牌都出左新粉底，
今次我同同事Joan就挑選左5款粉底出黎試用，
試下唔同質地，遮瑕度各方面既效果，
因為每個人對粉底既要求都唔一樣，
所以無話邊隻粉底係最好，
只有適唔適合自己，
如果你都想揀一隻自己岩用既粉底的話，
就要留意以下介紹啦～
Christy：
屬於混合性偏乾皮膚，
T字位會出少少油，
兩頰有色斑同少少暗瘡印，
對粉底期望：
有高coverage,
保濕得黎唔好太笠，
有少許控油效果更佳。
Joan:
屬於混合性偏乾皮膚，
皮膚容易敏感泛紅，有輕微粒粒，
而且眼圈偏深，
對粉底期望：
保濕之餘一定要高遮瑕度，
最好透薄啲唔好太厚！
CHANEL LIFT LUMIERE SPF 15 （＄520/30ml 4色）
呢款粉式含有Liftoptic 光學視覺複合物，
呢種智能成份可以將光線折射到所需位置，
而透過全方位散射光線，
係視覺上撫平皺紋。
另外，入面仲含有緊緻聚合體可以撫平膚質，
做到提升、緊緻效果。
其實呢支粉底係第2代黎，
第1代大約係4年前推出，
推出果時Janice都幫過佢地event做makeup demo，
Janice本身都好鐘意用佢嘅粉底出job，
遮瑕度高之餘又易推，
今次就睇下第二代有咩分別啦！
外形方面其實一模一樣，
只係舊裝(左)用10，20，30，40分色號，
而新(右)嘅就係05，11，12，20咁分號！
一直都有用開Chanel嘅粉底液，
今次粉底同樣地有Firming功效，
一聽到都覺得好吸引，
佢嘅質地比較水潤，顏色偏自然粉，
上粉後好貼面而且有亮澤，
雖然皮膚狀態麻麻地又有粒粒，
但粉底搽左上左去都無甩皮情況，
7成紅印都遮到，但可能眼圈太深，
如果要完完全全遮哂我個眼圈我諗都要加返少少遮瑕膏了！
Christy:
我自己之前都用過Chanel粉底，印象唔錯，
最近唔夠訓個樣都殘D，所以都鐘意高coverage既粉底液，
呢支對我黎講就唔太夠遮瑕度，
均勻膚色OK，不過鼻翼偏紅位置需要靠番遮瑕膏了，
Eve Lom Radiant Glow Cream Foundation SPF30（HK$690/10g）
呢款粉底加入了強效既護膚成分，
包括專利 BerryFlux Vita™（提煉自覆盆子幹細胞）、
蘆薈、維他命B3等，做到「化妝同時護膚」，
並會令到皮膚更具光澤既效果。
Joan:
Eve Lom呢隻係Creamy狀質地嘅粉㡳，
質地非常滋潤，要配合碎粉定妝，
係暗瘡位上粉都無甩皮現象，
而且遮瑕度偏高，
紅印斑斑都遮到8成，
由於Creamy質地都會偏厚身滋潤，適合秋冬天同瑕疵比較多嘅人使用！
Christy：
呢隻Creamy粉底光澤感幾好，
好滋潤，呢個天氣用加番碎粉會更持久，
遮瑕度好高，紅印同斑差唔多幫的遮到8,9成
我ontop唔再加遮瑕膏都OK，
感覺唔會覺得好厚，好易推開，
岩曬乾性同成熟型皮膚使用。
Make up for ever Ultra HD Foundation $380
超高清無瑕粉底液含獨家4K Complex配方，
有效修飾毛孔、遮瑕、保濕、提亮同均勻膚色，
多達20種色調，容易選擇適合自己嘅粉顏色！
分別有偏紅(R)同偏黃(Y)tone色
大家可以參考返以上色表！
Joan:
Make up for ever粉底一向都係高度遮瑕，
呢隻粉㡳質地比較清爽，
對於皮膚偏乾嘅我黎講有少少甩皮現象，
但遮瑕度超高，
薄薄一層已經遮哂大部分嘅瑕疵！
適合油性混合性皮膚使用！
Christy:
Maybelline pure mineral bb super cover SPF 50 PA++++
（＄109/30ml)
含有純礦物防護配方，玉蜀黍成份及維他命E，
幫肌膚表面形成防護層，
抵禦微細污染物，同時抗氧化，
增強肌膚抵禦力。
Joan:
Christy:
Maybelline經常都有佳作，
今次呢個粉底就係其中之一，
夠遮瑕力，好水潤又易推，
不過又唔會好笠，
唔會現乾紋，毛孔都遮曬～
上面效果同大品牌有得揮，
效果以呢個價錢黎講算幾驚喜，
不過佢得兩色揀，
如果好似我咁中等膚色可以揀2號色就好自然啦～
唔多budget既朋友就可以考慮下佢啦！
Skinfood pore fit cushion bottle $295
呢支噴霧粉㡳加入左冷凍技術，
可以幫皮膚打造零毛孔，
零油光既清爽韓妝！
呢個設計都幾特別，要用粉卜禁落個樽度，
D粉底就會好似噴霧咁噴出黎，
所以記住唔可以就咁禁落去，一定要用埋個粉卜，
唔係就會整污糟架啦～
Christy：
呢個粉底一上面感覺好特別，個粉底係凍既！
就好似將個粉卜放完係雪櫃拎出黎咁～
韓國既粉底都偏白，呢支既色號上面對我黎講都係偏白，
光澤感幾強，對我偏乾皮膚黎講，
佢都唔算好清爽，我覺得有少少笠，
而家用加番碎粉就比較好啦～
遮瑕度OK，可以均勻到膚色，貼面度一般。
Yuki：
一按呢個粉底既時候真係嚇左一跳，
好強力既壓縮噴霧噴左出黎，
所以一定要用粉樸壓住先按。
佢呢款粉底好特別，唧完出黎好冰涼，
上面果下感覺好似放左粒冰喺面咁，
但佢既味道就唔似平時粉底果種咁，
反而有少少似止汗劑既味。
如欲取得更多第一手美容及扮靚資訊
可瀏覽Girls Talk Main Blog：Girlstalk Blog
或 Like我們的Facebook專頁：
Janice Lam Makeup Workshop Facebook
（版權所有，未經同意不得轉載。)
