秋冬風格小髮飾

網誌

唔知大家有無留意今個秋冬既飾物trend呢?
我自己就覺得女仔出街點都要有啲小飾物做下點綴,
加上近排追睇《平凡不簡單校閱女孩河野悅子》,
石原聰美每集5-6個打扮都非常吸引!
當然啦,唔係人人carry到佢咁誇張既裝扮既⋯
所以今次想同大家分享幾個秋冬必備髮飾元素,
即使係文青簡約風既你都可以睇睇架~

元素一:幾何圖案

今季大熱幾何圖案,帶點復古味道,
好岩一眾文青女生配襯斯文造型,
好多韓國女仔都中意。

元素二:燈芯絨質地

冬天真係不少得燈芯絨質地既產品!
厚實間條紋理,一見到就覺得係冬天代表之一,
小編之前去韓國都見到好多燈芯絨既衫褲,
而今季既髮飾更係以燈芯絨為主,
最常見就係髮帶/頭箍,平價韓店A.LAND都有好多,
唔知大家有無想入手返一兩條呢?

元素三:髮釵

呢類好似舊時髮釵演變出黎既髮飾,
現時係超級流行!
一開始喺日本出現既時候就只有簡單形狀,
但宜家就已經出左好多特別既款式,
好似係貓貓、和風珍珠,
都比人感覺好lady同特別架~

元素四:大蝴蝶結髮圈

唔知點解女生同蝴蝶結總係有說不出既情意結,
今季就出左好多絲巾大蝴蝶結既髮圈/髮帶,
配合簡單編髮已經好有時尚感,
有唔少女生仲會將佢綁喺手袋,帶出另一種時尚味道~

元素五:特別髮飾

日本潮流總有有一半唔會依照主流走向,
因此會發現唔少日本先有既特別髮飾,
今季都大熱流蘇飾品,而用毛毛球織成既流蘇髮圈,
實在是超級可愛啊!
另外既鐵絲髮帶,唔單只可以用作髮飾,
亦可以加上帽子DIY,突顯個人風格。

而以下呢款真係第一次見,
係小型彈弓髮飾。
一粒粒加上頭髮上面,能夠突顯編髮既美感,
即時仙氣UPUPUP!

***髮帶編髮教學***

睇完今季流行元素,我諗大家都想買完戴得靚靚,
所以就搵左幾款髮帶編髮教學,
只要幾個steps就可以做出fashion感!

同場加映:變化多多領帶

又返番韓國先~~
雖然唔係髮飾類別,但由於近期真係睇到好多靚既領帶,
所以都想同大家分享下!
呢類領帶用黎襯衫超級正,
尤其係好喜愛素色衫既朋友,
帶上領帶即時有型有格。
領帶仲可以有多款綁法,每種都有唔同感覺,
小編覺得款款都好好睇~~~

自己最近都入手左一條雙色格仔紋,
中間有金屬扣,襯白色衫好靚~

今次分享到呢度,唔知你地又有無睇中邊款?


你可能也喜歡

Recommended