港九美食巡邏
我地workshop同事除左係shopping精,
仲係為食鬼,經常周圍去搵好野食,
我自己本身都鍾意周圍去試新野,當然都有中伏既時候,
今次會介紹幾間最近去食過既店(都有啲唔係新既),
西式、日式、韓式、甜品都有,
究竟有邊啲係好食?邊啲係中伏?
快啲拉落去睇下啦~
~LAM LAM 脷 篇~
店名:I Cremeria
地址:銅鑼灣記利佐治街11-19號名店坊1樓
首先帶大家去左食甜品先啦,
女仔就最鍾意賣相靚既食物,尤其係甜品,
對於女仔黎講,就算正餐食到幾飽都會有第二個胃容納,
一個又靚又好味既甜品就更加唔可以錯過!
前排名店坊新裝修後,除左有log-on加盟,
仲有門口隔間既呢間雪糕店,新開張正日咁岩經過就試左喇~
雖然佢個原個蜜瓜芭菲真係好吸引(真係用一整個蜜瓜整成!),
但係兩個女生實在食唔到咁多,而且價錢係$180!太貴!
所以最後就要左呢一款白玉餡蜜紅豆芭菲,雪糕係抹茶x北海道牛乳,
抹茶味道香濃,牛乳味同樣好香,餡蜜、白玉都好chewy,
入面仲有啲chips,口感好豐富,以$56黎講其實都算ok,
不過唯一一樣要改善既問題就係雪糕太快溶。
遲啲有機會再去試下佢既蜜瓜先得!
店名:Lab Made Cafe
地址:銅鑼灣登龍街1號金朝陽中心2期地下B號舖
相信唔少人都有試過Lab Made分子雪糕,
我自己本身對分子料理真係麻麻,
因為試過唔少地方既分子甜品都只係雷聲大雨點小,
味道、份量同價錢完全唔成正比。
不過Lab Made係暫時唯一一間我覺得ok既分子甜品,
價錢around $40,有兩球,都算抵食,
味道就通常有4款比大家選擇,每個月會轉一次,
我今次食既呢一個口味係流沙奶黃包,之前聽人講話呢個味好食,
結果都無令我失望,奶黃口味香,雪糕都好夠滑,
咁岩2月情人節見到人地叫左限定玫瑰園,賣相勁靚!唔知味道係點呢?
我去呢間係cafe黎,有位比大家坐,仲有咖啡同糕點賣添架。
店名:三河屋
地址:紅磡明安街14號寶石戲院大廈地下D舖
呢一間店其實都開左好耐,
係我以前返大學成日去食既日式小店,
我自己都好耐無食過,
前排突然好想食鰻魚飯,就返左去紅磡食喇!
當日點左鰻魚飯同燒鯖魚,水準仍然都好好!
先講鰻魚飯,鰻魚仍然都係珍寶級咁大條,
燒得好香,好肥美,又唔膩,
燒汁唔多,但岩岩好夠晒送飯,
米飯仍然都係用返珍珠米,大大粒,
就算係女仔,食下食下都好快食晒一大碗~
另外條鯖魚真係超讚!
夠熱又夠大條,肉質好滑,個皮燒得岩岩好,
加埋檸檬汁同醬油就perfect!
以前都好似無點過呢個,
真係好好味呀~
價錢方面夾埋好似百零蚊左右,
日本野黎講唔算貴,最緊要係好食。
店名:maru restaurant & bar
地址:尖沙咀金馬倫道2-4A號利達行4樓
尖沙咀真係勁多韓食店,一條街都成十幾間,
不過呢間就唔喺韓國街果邊,都係經朋友介紹下先去食既。
我自己本身都好鍾意食韓食,
泡菜、年糕、炸雞、紫菜卷、石鍋飯等等,全部都好正!
呢間餐廳除左可以散叫食品,仲有韓式BBQ燒肉架。
當日都見到唔少人BBQ,勁香~
不過我同朋友兩個BBQ太奢侈,都係等下次多人先去。
雖然兩個人,但我地都點左好多野食,
有紫菜卷、石鍋飯、芝士蛋卷、辣汁芝士雞塊,
點菜後先黎6款任添既前菜,味道不過不失,
紫菜卷卷得好實淨,味道都好好,
而石鍋飯黎既時候仲係韓國老闆親自招呼,
係一位好高大有型既OPPA!(講明先,無相架)
聽朋友講,佢仲識中英日韓等幾種語言添。
之後黎既芝士蛋卷勁大份,大失預算,
我同朋友食到最後都係要打包走,
上菜時中間夾心既芝士仲係熱同流心,好好味!
最後就係辣汁芝士雞塊,
辣汁好辣好過癮,雞塊都好滑,芝士又好香,
我地兩個都掃晒呀~
呢間店既質素唔錯,有機會都想再encore,
價錢方面每人平均2百幾,我覺得都可以接受,
如果叫多啲朋友去食就會抵好多喇~
店名:Corner Kitchen Cafe
地址:上環荷里活道226號地下
我自己趁放假時都會周圍走,而最近偏愛行上環,
因為果邊好多小店、咖啡店,比人好悠閒relax既感覺。
呢一間coffee shop喺荷里活道附近,
有次去睇賣vintage物品既pop-up store時經過,
見到好多外國人都喺度嘆咖啡,而且聞到好香好香,
所以之後再去既時候就入左去試下喇!
我自己唔係話太識飲咖啡,
不過呢度既latte上面層奶泡同下面既咖啡都好滑,
我好怕飲latte上面層泡厚到好似cappuccino咁,
呢度真係沖得岩岩好,味道又唔至於太過淡或者苦澀。
至於個omelette,原來係有芝士餡架!
仲有煙肉、火腿、洋蔥等等,
食落好香口,又唔會太過油膩,
店名:OPPA Cafe Bar Restaurant
地址:尖沙咀金巴利道G/F&1F
店名話明叫OPPA,當然係有韓國OPPA啦!
呢間OPPA店正正喺韓國街入面,
賣既係近期大熱芝士排骨,仲有熔岩芝士飯。
睇相都知我二選一揀左芝士排骨,至於點解唔兩樣一齊點?
因為真係好貴好貴好貴!一份排骨加埋一都300蚊喇!
到底係咪咁多人講到咁好食?你問我既話,我會比負評,
就算有OPPA拎住火槍喺你面前燒芝士,都加唔到分。
因為啲芝士只係喺熱緊果時溶得比較勁,
第一舊排骨就捲到芝士既,之後果啲已經捲唔到,
芝士極速乾晒,結果排骨還排骨,芝士還芝士,
雖然排骨味道係ok,不過個份量真係太少。
我見隔離枱份熔岩芝士飯同樣都好細份,
兩個女仔share可能都唔係好夠。
明明之前上網睇過韓國當地既芝士排骨好似唔係咁,
希望下次試到正宗好味又抵食既芝士排骨啦~
店名:三田製麵所
地址:銅鑼灣登龍街1號金朝陽中心2期Midtown地下D號舖
同Lab Made Cafe相隔幾個位既呢間沾麵店就一定今期最紅食店之一,
喺日本有19間分店既呢間沾麵連鎖品牌,
最多人讚就係佢地既香濃原味豚骨魚介高湯湯底同彈牙麵質!
我都唔執輸就去試試,(又係銅鑼灣,無辦法太近公司)
當晚我都排左一個鐘先入到去,
因為入面都幾細,只係得大約30個位,
初時以為得沾麵揀,原來都有拉麵同其他小食,
我就梗係試沾麵,有辣同唔辣,沾汁同樣係濃豬骨魚介湯,
麵底可揀小、中、大,同價。(我揀既係中size)
如果揀左辣就會好我個碗汁咁有辣油,
其實食落就唔係好辣,但就好香,用黎吊味一流,
不過個汁唔係好夠熱,敗筆1。
講返個麵,我自己其實就比較鍾意幼身拉麵,
佢呢個係闊麵,其實都無緊要,
問題係個麵好黏身,沾左湯之後好少少,但都有少少糊口,
會令人感覺容易膩同飽,敗筆2。
另外就係食完之後可加鰹魚湯落沾汁度溝淡當湯飲,
其實我自己就麻麻,感覺好似飲緊味精湯,
如欲取得更多第一手美容及扮靚資訊
可瀏覽Girls Talk Main Blog:Girlstalk Blog
或 Like我們的Facebook專頁:
Janice Lam Makeup Workshop Facebook
(版權所有,未經同意不得轉載。)