每個男跑手都想有個徐濠縈

因為每次跑步，其實最重要的環節係跑完後的活動，因為跑步時出盡奶力, 莫講話講嘢, 就連氣都吸唔切, 所以每次跑都周身酸軟, 雙腿發痺雙眼凹崁之後, 最想就係跟剛才一起跑步的伙伴坐在一起, 把酒當歌一蛊兩件又好吞個豬扒飯又好, 邊吃過痛快邊講番頭先練跑練山時响邊度PK, 响邊度作抽, 幾時想跌WATT邊度見到個靚女之類之類……..要完成這餐飯才叫為一課練習或一場比賽劃上完美句號, 因為分享是一場練習/比賽的重點。

多次見過男跑手的失望表情, 不是他們跑得唔好, 而是每次跑後收到的奪命追魂call, 例子包括:
1. 練習後食食吓飯, 友人收到電話, 佢一聽, 跟住答: “依家行緊去部車度準備開門! ” 收線後當然大家都唔敢comment只係若無其事繼續吃飯), 還記得當時我哋餐飯, 其實只吃了一半。
2. 明明約好練習後一起去邊度邊度食什麼, 練習後, 友人打電話諗住約老婆出嚟, 點知, 老婆一句話: “我都係唔想出嚟”(呢句係憑友人面上的表情估既), 就係咁, 連嘢都未食涼都未沖, 佢就咁就揸車返咗屋企喇!

回到家中, 未能跟唔跑步的另一半分享跑步感受已經不是味兒, 精力亦同時處於低位, 跑爆咗更加係食唔落飯而只想瞓覺, 但這個時侯, 另一半就係剛剛精神奕奕咁起身化完個靚妝準備出街shopping睇戲食飯，男跑友只有無奈地跟住另一半出街, 睇戲都還好, 起碼可以瞓吓覺釣吓魚, 要行街就係真係攞命, 你知道跑完步比完賽雙腳係幾咁攰「屎忽筋」又勁痛之際, 仲要响人來人往的商場慢行, 真係好陰公豬!
各位唔跑步的女士, 其實很多男跑手都係好認真練習的, 而每次練習, 練兩個鐘, 其實佢哋唔係真係跑兩個鐘, 當中仲包括事前的拉筋warm up, 跑步後的拉筋cool down和吹水, 還有跑完一課長課後, 瞓個晏覺真係會精神爽利好多。所以話呢! 既然你畀得老公出去跑步兩個鐘, 不妨再寬鬆一點畀多一個鐘, 起碼可以沖完個涼同跑友吃個飯吹吓水，甚至你都要食飯的話, 不妨踏出一步, 跟他一起跟跑友們吃飯, 比起你的追魂call來得令另一半舒服和尊重得多。

還記得有次冷好心咁同友人講, 你下午先跑, 不用咁早出來吖, 佢即刻成毎彈起, 然後答: “唔好….我攞咗一日permit架喇” 佢講起已申請permit成功時, 眼中仲閃光。
又想起曾跟一個男跑友傾開, 我話你不如把你辛苦練習嬴回來的獎牌送給另一半, 係一件好sweet既事, 可惜他答: “她只會覺得呢個獎盃係垃圾!”
所以話呢! 我相信每個男跑手心中都希望有個徐濠瑩, 起碼步速唔同, 心境也一致。