【簡單溫馨系列】拍拖千祈唔好拍到咁⋯

網誌

拍拖耐咗,愈嚟愈淡,抑或,愈嚟愈親密?

當9成情侶都愈嚟愈淡,敵唔過時間嘅洗禮,分手收場,但就有1成,竟然可以逆線向上,愈嚟愈享受兩個人嘅時間。

所謂二人世界,就係乜嘢都要一齊做,少咗對方就唔得。

Text, Iamge: 莎比亞

我唔敢講,我同女朋友冇淡,當中一定有改變,愛情已變成習慣,但唔緊要,因為想對方喺身邊,都變成咗人生中,不可或缺嘅一部分。

如果你發現自己,開始有以下特質,就要反省下⋯⋯

當你同朋友食到一間好好食嘅餐廳,你會覺得如果同佢一齊嚟食就好喇⋯⋯

當你同朋友睇到一套好好睇嘅戲,你會覺得如果同佢一齊睇就好喇⋯⋯

甚至你同屋企人/朋友去旅行,去到一個好靚嘅景點,你會覺得如果身邊有佢就好喇⋯⋯

無時無刻,生活中每一樣細節,都想同佢分享。人生每一樣大小事,都想有佢參與。

我同女朋友,好好彩,曾經一齊面對過好多人生重要時刻。

我哋係大學同學,同一學系,去同一個國家Exchange、去同一間學校一齊實習、當然,都係同一年一齊畢業。兩個人之前嘅拍拖生活,就係一齊通頂做功課。

畢業後,生活大有改變,唔同嘅工作將我哋分開南北半球,令我哋好珍惜兩個人相處嘅時間。

唔單止係物理上拖住手嘅實質相處,而係心理上都要真係「喺埋一齊」,但愈大愈難,因為面對嘅處境好唔一樣。

我唔會真正明白佢教書有幾辛苦;佢唔會了解我畀上司鬧嘅時候有幾難過。共同建立嘅二人世界,只剩低兩個貌合神離嘅獨立個體。

有冇試過,你好格硬咁問對方嘅生活,佢好激動咁講完一輪,但你只能夠「哦⋯原來係咁。」完全冇同感。

你可能會懷疑,對方同自己係咪已經唔夾?

但直至某日我發現,找不同,不如找相同,你會好過得多。

我哋食同一碗拉麵會覺得好好味、我哋睇戲會喺同一個感動位眼濕濕、我哋拖住手仲會覺得唔想冇咗對方⋯⋯

世界好大,但只想陪你一個。

仲係好想日日見到你。

拍拖千祈唔好拍到咁,因為⋯⋯會好幸福。

你可能也喜歡

Recommended