尋味首爾(2)

Jun 10 2015

今次講返轉頭同大家繼續分享美食，
買衫就真係無咩好講，不過有一點可以提下大家，
去批發市場時要搵志同道合同一style既朋友去，
唔可以好似去行boutique咁慢慢照慢慢揀，
睇岩款知道自己著開咩size就即刻買，
同款兩件以上就已經可以買到，
如果唔係人地會同你講唔零售架～

返番去美食，首先要介紹間幾特別既，
大家去韓國相信都係食酸辣野、韓燒果啲，
但我同朋友就去左食粥，
我諗都無人去到會諗過去食粥，
醬油蟹果啲生野我自己又麻麻，
所以試啲同平時唔一樣既野。

呢度價錢唔貴，每鍋粥7,000-10,000won，
有2-3碗左右，仲係大碗既，兩個人share都得，
我地點左三款，
分別係素菜人蔘粥、海苔蠔仔粥、泡菜海鮮粥(辣)，
全部粥底都好綿，又好足料。

素菜人蔘粥真係有一大條人蔘，好濃人蔘味，
上面加左啲紫菜碎、芝麻既配料，
平時我地煮粥都應該唔會落芝麻，
原來加埋都幾match，而且好香，
其他粥都有晒配菜架。

海苔蠔仔粥係用新鮮海苔，一絲絲咁，真材實料，
個鐵羹比平時果啲大，啲蠔就好似個羹咁大，超大隻！
而且份量都好多，70蚊左右真係勁抵，
味道好鮮甜，清清地，好好食。

叫左兩個淡既粥，所以我地就想試下濃味既，
泡菜海鮮粥係辣粥，都幾辣，
唔知係咪所有韓野都要加芝士，
呢個粥竟然都有芝士，
香港就一定唔會咁樣整，
我地趁個粥熱就攪勻佢先，等芝士溶埋入去，
攪完啲水分少左，就好似醬汁+稀飯咁，
完全唔似食粥，似芝士泡菜飯多啲，都幾得意，
入面既海鮮都好足料，有蝦、蠔等等，
如果鍾意食韓式辣野就可以試試。

明洞同弘大附近都好多粥店，
你地有興趣都可以搵下～

之後分享下喺新堂站#7號出口附近既韓式餐廳，
呢間朋友食過，今次再帶我地去，
呢度係所有野都係用蠔整，可以話係全蠔宴！

呢度好韓國傳統餐廳既怖置，
但勝在價錢夠平，
由東大門搭的士去都係5分鐘左右，好近。
我地行完東大門都夜晚11點幾，
呢餐係dinner+宵夜，
因為太夜，餐廳都無咩人。

我地3個女仔點左4樣野，
蠔餅、湯、石鍋飯、鰻魚。

個蠔餅真係太大塊，
好似pizza hut普通批個size咁大，
上面有蘿蔔絲、韮菜等配料，
當然唔少得仲有芝麻，
平時香港食蠔餅蛋漿多過料，
呢度個餅係料多過蛋漿，
一夾起就散開晒，
味道都ok，價錢係好平。

石鍋飯入面既蠔好大隻，好鮮
我自己就唔鍾意食美國大桶蠔，
反而呢啲好好食。

另外個湯加左芽菜同韮菜，
清清地又鮮甜，幾好。

鰻魚大大條，夠肥美。

（網上圖片）

呢間柳家雞店以前都有分享過，
喺明洞、梨大、弘大都有，
之前去親都係食辣雞飯，
今次去到出左新野－－辣雞鍋。

呢個辣雞鍋可以extra加料，
好似係圍邊既芝士、年糕、芋頭蓉年糕…
又係芝士，食到我肥左個碼返黎…

成日睇pizza hut廣告拉起啲芝士絲，
今次終於試到，
啲芝士真係多到拉到起絲，剪唔斷，
不過味道就唔會太濃，
加埋辣雞，好惹味！