學生分享天地﹣Christy: 考取City & Guilds證書分享
新既一年又到啦！
回想起上年都算幾充實，
除左可以加入workshop工作，
我亦都參加左advance同City & Guilds課程！
上完C&G課程先知比我想像中既好唔同，
想知有咩唔同就記住睇落去啦。
想得到City & Guilds國際證書都唔係話咁易架！
分別要通過一個筆試＋兩個實操考試。
上第一堂既時候導師Mona就派左好大疊筆記比我地！
我當刻都呆一呆，
就好似番左去讀書既年代咁！
MISS上堂時會同我地講解下筆記內容，
考試規矩等等。
筆記既內容都好多元化，包括美容化妝專業守則，
皮膚認識、了解骨骼同肌肉知識等等。
骨骼同肌肉果part實在讀得有少少吃力，
始終畢業之後biology既知識已經唔太記得！
要記番每舊骨同每舊肌肉叫咩名真係叫曬救命架。
不過對皮膚了解既等等知識，
好彩我地上專業化妝班既時候已經有詳細講解過，
所以都好易記曬入腦。
除左講書外，導師亦教左好多新技巧，
例如係點幫客人敷面膜、
漂染眉毛同漂染眼睫毛等，
所有手勢都要好正確，
呢啲技巧對我地黎講都非常新鮮，
因為之前都未接觸過呢類知識，
同學們都好心急影相同抄低筆記，
驚死會唔記得！
國際既實操試要求十分嚴格，
特別係衛生方面更加係極嚴格！
所以上堂既時候Miss都不斷提住我地要留意衛生問題，
例如所有化妝棉都要先消毒先用得，
唔可以用手直接「撩」啲skin care出黎，
又或者化妝掃係唔可以直接掂落化妝品度，
全部都要用刮棒放入玻璃碗入面先用得，
而凡係任何用品跌左落地都唔可以再用番等等
（所以大家都好驚跌野，哈哈～）
雖然剩係衛生方面都有好多野要記，
不過衛生確實對化妝師係好重要，
如果日後客人見你化妝掃好骯髒，
對手又骯髒就幫佢化妝既話，
人地下次就唔會搵你架啦！
每逄校內考試Janice都會親自監考，
同學都會超緊張！
而係C﹠G實操試當日大家更加係份外緊張，
因為除左有Janice在場之外， 仲有兩位考官在場監督考試，
Workshop同事亦好落力為同學打點做準備，
各同學都自動自覺好早就到學校準備，
張枱亦擺好曬陣。
同學既衣著亦有嚴格規定
要著全黑衣服，頭髮要扎好夾好，
亦要化番個精神既妝容添，
同學們都好乖做到曬要求架！
而實操試要求一小時內要幫model 落妝、
洗面、搽skin care化日妝＋轉晚妝。
所以點解Janice平時上堂成日要催大家要化得快啲，
出到去化唔到就唔合格架啦，無人會等你架。
大家平時都比Janice鞭策得多，
所以都好順利係限時內完成考試呀！YEAH！
除左筆試同實操試之外，
同學們亦要交一份功課先叫完成，
平時上堂前Janice都會叫我地做定功課，
不過當然C﹠G既功課都有詳細規定應該點做，
要將幫model每個清潔，敷面膜、化妝既step影低放入portfolio，
所有step要好清晰架！
呢份功課亦要做得好詳細。
除左影相亦要作文字上既紀錄，
今次我地都學識左點填客人療程紀錄表。
進行每個step前我地都會填一張，
寫番低model膚質，準備工作同時間上預計等。
呢步對我地之後既工作都好有用架！
例如新娘試妝可能成年前己經試左，
新娘亦可能對某類產品會敏感，
過左成年後真係咩都會唔記得曬，
如果有呢份紀錄表係手就會清楚啲啦。
所以話做呢份功課係一啲都唔可以馬虎架！
如果黎緊想考C&G證書既同學就要努力啦 ！
如欲取得更多第一手美容及扮靚資訊
可瀏覽Girls Talk Main Blog：
Girlstalk Blog
或 Like我們的Facebook專頁：
Janice Lam Makeup Workshop Facebook
（版權所有，未經同意不得轉載。)
