女朋友話：你偷食真係傻

我初時聽得唔係幾清楚，一聽到佢話「我有個朋友」，就即刻自然反應咁話：｢妳朋友就係妳！」

「你終於認你偷食喇！？」佢。

「⋯⋯」當我知佢講緊乜嘅時候，即刻解釋：「冇呀⋯我冇⋯⋯」

Text, Iamge: 莎比亞

女朋友嘅說話，總係帶住弦外之音，佢同我分享呢個朋友嘅故事，其實係想警告我：你唔好偷食呀，你一定會畀我捉到。

我好醒目咁同佢講：「放心啦，我已經有個咁好嘅女朋友，仲邊會偷食？所有女仔都引我唔到！」

佢答：「但我個朋友都好好⋯⋯」

我：「係咪佢唔夠靚呀？」

佢：「好靚之餘，身材仲好似Model咁。」

我：「哦⋯⋯咁我唔知喇，對呢樣嘢冇咩經驗。」

佢：「對『有靚女朋友』冇經驗？」

我：「痴線！對偷食呀！」

女朋友慢慢再解釋，佢話個女仔嘅男朋友覺得佢唔夠好，出面個女仔對佢溫柔好多，又唔會鬧佢，又識煮飯，同埋幫佢揼骨⋯⋯

我：「妳朋友係咪好港女㗎？又野蠻，又要有樓有高潮嗰啲？」

女朋友擰擰頭：「一啲都唔港，性格好過我好。」

我：｢咁真係好好喎⋯⋯」

講咗咁耐，重點終於嚟喇，女朋友語重心長咁話：「你千祈唔好偷食呀，你覺得出面啲女仔好啲，係因為未知道佢哋嘅唔好⋯⋯」

「慢慢你就會發現，佢哋仲惡過我，仲殘過我，仲野蠻過我⋯⋯」

「但唔會有我咁了解你，唔會幫你慳錢，唔會好似我咁咩都百分百支持你⋯⋯」

「冇咗我，你一定後悔呀。」

女朋友一輪咀講完以上嘅說話。

「放心啦，我唔會偷食。」我攬住佢，畀啲安全感佢。

當我以為件事告一段落，隔咗幾日，佢又話：「我有個朋友，佢男朋友最近偷食畀人發現⋯⋯」

我有少少懷疑，呢個朋友根本唔存在，只係女朋友講出嚟嚇我，好似稻草人咁令啲雀仔唔敢偷食。

「放心啦，我係一隻冇腳又冇翼嘅雀仔，只可以留喺屋企食。」

————————————–

【更多文章】
FB: 莎比亞
Follow IG睇拍拖Sweet相：sapeiar