女友一定要知 「男朋友經期」

網誌

「畀我一個人靜下⋯⋯」

久不久,男人就會同身邊嘅人講呢句說話。

就算平時有幾開朗,都會突然粒聲唔出,妳問佢咩事,佢只係會話:「冇嘢」。

妳嘅反應有兩個可能性,一繼續追問、二怪佢咩都唔同妳講,而兩者都會令佢更加反感。

面對呢個「男朋友經期」,其實做法好簡單⋯⋯

男人總會有啲自間,突然情緒好低落,覺得自己好廢好垃圾好一事無成,所有負面嘅形容詞都出晒嚟。

呢個時候,妳一定覺得佢好需要支持、好需要人安慰,好需要人陪佢傾下心事,因為當妳自己唔開心,會好想男朋友了解妳,氹下妳,主動關心妳發生咩事。

但男人正正相反,佢只係需要妳唔好理佢,佢話想一個人靜下,妳唔需要覺得係咪自己唔夠好,所以幫唔到佢。不過,其實任何人佢都唔需要,因為幫到佢嘅只有佢自己。

佢會喺腦入面不停反省,不停諗下應該點做,好似睇武俠故事咁,欲練神功,就入深山閉關。所以,低潮中嘅男人,係封閉咗自己,妳格硬強入,只會兩敗俱傷。

「咁要畀佢冷靜幾耐?」

答妳唔到。

可能突然間佢就會話:「我冇事喇!」然後又重新努力過,但又有可能從此一蹶不振,陷入人生低谷。

換個角度嚟講,有時妳唔開心,覺得男朋友唔關心妳,可能佢用咗自己一套,諗住「畀妳一個人靜下」。

如果妳問,一個男朋友唔開心嘅時候,最想女朋友做啲乜。

首先嗰段時間,女朋友要識得照顧自己,唔好為佢再加麻煩;另外就妳盡情自己開心,唔使一齊愁眉苦面,唔使怕「你唔開心,所以我都唔好太開心喇」,因為見到妳過得好,都會令佢有番動力,如果連拍拖都做得唔好,會進一步打擊佢自信。

「男朋友經期」多數嚟自工作壓力,對自己嘅失望,妳唔使太擔心,因為佢心底裡點都會知道,妳係企喺佢嗰邊。

妳好,佢就好。

你可能也喜歡

Recommended