夏季新娘大變身－個人造型(2) 瑰麗輕熟女VS森林仙子風

我地既最喜愛個人造型獎，
total會有6位變身主角，
上篇打頭陣介紹左其中兩位model，
(重溫：http://www.girlstalk.hk/blogs/?p=25543)
今次會繼續有另外兩位主角出場！
而後日都會有最後兩位主角介紹，
大家睇完我地三篇介紹先投票都唔遲架。
之前既group shoot投票仲未截止，
未玩既朋友花少少時間去投票啦～
(夏季新娘大變身－有獎遊戲－：
http://www.girlstalk.hk/blogs/?p=25509)

第三位變身主角係Nicole，佢現時喺醫院工作，未婚，
佢自己就鐘意襟睇、classic既造型，
自然簡約既妝容同髮型設計，
希望第時睇番啲相都唔覺得老套。
雖然佢都未試著過婚紗，
不過就比較喜歡elegant、女性化既款式。
Nicole外表感覺比較成熟，
我地都有了解過佢既想法，而且想襯返佢本身既氣質，
所以幫佢打造左兩個分別自然同優雅感覺既造型。

Nicole本髮量平均，不過要做更多造型就要另外加假髮片，
而第一個造型係較成熟但非常簡約，
配合自然卷曲頭髮，
加上銀色閃石頭飾，帶出整個乾淨又清秀既氣質。

其實Nicole係經朋友介紹黎參加我地既大變身，
佢平時比人感覺都係好斯文有禮，
所以我地今次更加想突出到佢既知性美，
影相時只係略略教佢擺pose，
就已經出到好好既效果，
Nicole膚色偏白，所以妝容方面就揀左橙色x玫紅色tone，
令佢睇落更加瑰麗，增添幾分女人味。

第二個look就換上一條性感少少既deep V貼身婚紗，
配合一個較plain既低髻，
收起長髮既Nicole更加能夠帶出輕熟女既美感，
加上鮮花頭飾同網紗，
成個感覺就好似歐洲既古典美人feel，
而Nicole自己都話無諗過自己可以有呢一面，
仲話好鍾意呢個造型添！

除下網紗，可以見到簡約妝容亦能帶出女性味道。

第四位變身主角係昭彤，係岩岩考完DSE既學生，
佢係一個好精靈、開朗既女仔，亦都同我地有說有笑，
佢頭髮好長，亦好多髮量，去到背部中間，
所以好快就諗好點樣設計佢個髮型，
為左配合返佢既年齡、性格，
第一個造型都係以清淡為主。

上篇都有提過我地既髮型班導師呀Jan即場整左好多鮮花飾物，
第二日佢都用左小雛菊整左花圈，
我地仲用返前一日既皇冠營造森系感覺添。
由於昭彤有小小國字面型，
所以我地都有重點幫佢修飾面型，
營造可人小顏鵝蛋臉。
小顏鵝蛋臉襯all back髮型好適合，
梳高頭頂頭髮，再整理好全頭髮絲，
睇落就會更加利落、順滑，
髮尾位置我地就整左內向心形彎度，
放喺胸位置就令成個感覺更自然喇。
佢自己亦好喜歡呢個造型，
因為佢話頭髮放落黎顯得面型更加細。

昭彤膚色亦係偏白，所以妝容方面就揀左粉橙tone，
如果想化得更少女感覺粉橙tone真係唔錯架，

加上眼底既閃令眼線，睇落眼睛就更水汪汪、圓大。
由於佢本身輪廓都幾標緻，所以只要喺中央打亮返，
就可以令面型更加立體啦。

第二個妝容真係好有森林仙子既感覺。
雖然佢自己好少留意婚紗、妝容、造型等等，
不過佢就唔太鍾意太濃既台式妝，
今次呢個妝容佢自己就覺得岩岩好，
影相出黎效果好自然。

我地幫昭彤整左個微曲髮再紮三手鬆辮，向右邊放，
而左邊就留返一條曲髮放返落黎，
令整個感覺平衡返，營造蓬鬆效果，
喺頭髮上加小花、皇冠，令成個造型變得更加仙女感覺。

大家唔洗咁心急投票住！可以留意埋另外兩位主角既介紹，
再mark定自己最喜愛造型，
之後我地會開post比大家投票，
係芸芸投票者之中，我地會抽一位幸運兒得到豐富既獎品添～

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup