回購率100﹪便宜好物
好耐都無同大家分享過便宜又好用既野啦！
相隔左一段時間，
唔知一班shopping精同事又買左咩平靚正既野呢？
今次除左有化妝品，仲有美髮同落妝產品既心水推介，
而且價錢都係相當抵買，
又再一次證明平野都絕對有佳作，
事不疑遲，即刻同大家分享啦～
Heavy Rotation / Eyebrow #02 Natural Brown $69
（SASA有售）
眉粉同眉筆我都鐘意揀日本牌子，
因為顏色比較自然，
而且唔需要買得太貴，
效果同大品牌唔會差得太遠～
好似Heavy rotation呢款眉粉都係佳作。
好多朋友都問用眉筆好定眉粉好？
眉筆可以畫出sharp啲既線條效果，
如果眉型已經好出，
只係想補下眉色就可以揀用眉粉。
新手都建議用眉粉比較易控制，
出黎既效果會soft啲。
呢盒有深、中、淺三隻色，
淺色可放於眉頭位置，
而眉尾就可以用深色畫番，
條眉就已經好靚啦～
有啲眉粉好易碎，代表個粉壓得唔夠實，
粉質好散，上眉都會唔持久。
而呢盒眉粉朝早畫完，夜晚成條眉都完整係番度。
持久度真係唔錯。
佢入面附送左支掃仔，
斜角果邊可以用黎畫眉，
都幾好畫，唔會太硬或太軟，
如果無眉掃既朋友都可以用住佢畫。
而另一邊佢就預你用黎打鼻影，
不過我就嫌佢太細支，打得唔夠靚，
我會用番自己支專業鼻影掃。
好似我呢啲扁鼻既朋友就需要打番個鼻影，
皮膚白既朋友用淺色果格打就ok,
皮膚深啲既朋友就可以淺色溝少少中間既啡色黎打，
效果都好自然。
或者將深啡色放於眼窩位置，
可以加深眼部輪廓，望落去眼部會深邃啲，
易眼腫既朋友都可以試下。
一盒眉粉可以有幾個用途，真係幾方便。
Heroine make / jewelry eyecolor #04 Rose Garnet $89
（SASA有售）
一講起Heroine make，
相信好多朋友都用過kiss me紅色果支眼線筆，
我差唔多身邊既朋友都有用過，
而佢既睫毛液我都用過好幾支，一樣係又平又好用，
所以對呢個品牌留下唔錯既印象，
當我行街見到佢出左眼影時都即刻好想試下。
包裝背面會有教學，
教大家化一個簡單變色眼妝，
用盡每一隻顏色！
之前都提過我好鐘意酒紅色眼影，
所以今次都揀左酒紅色呢盒試。
盒入面左上角果格係令令地既eye base黎，
平時我上眼影時都會另外搽eye base，
因為會上色啲同持久啲，
呢盒有埋真在太方便啦～
粉質都算滑，呢個價格黎講絕對可以接受，
閃粉唔會太大粒，都幾有光澤既感覺。
上色度好好，好出色，唔會好飛粉，
輕輕一層已經係我圖中咁既效果，
所以大家千期唔好太重手～
出黎既效果同大牌子差唔遠，
呢個價格黎講可以話無咩好挑剔，
我覺得可以值得一試。
FAIRY DROPS MASCARA $110
（SASA有售）
女仔一生都在尋找一支岩自己既睫毛液，
我都試過好多款唔同既睫毛液，
例如MJ，Maybelline都唔錯，
不過沒有最好，只有更好，
見到呢款睫毛液評價唔錯，所以都買左黎試下～
平時我啲睫毛都幾易drop~
而佢除左做到好纖長同捲曲效果之外，
令我最驚喜既地方係佢真係唔會drop！
最近懶得濟成日無落妝就訓著左（大家唔好學..)
第二朝訓醒發覺啲睫毛仍然keep住捲曲，
無drop到…….
同埋佢防水能力都幾好，唔會溶，
落妝既時候用eye makeup remover就好易落到，
佢已經成為左我近期不可缺少既妝物之一啦！
Bifesta / Cleansing Lotion $59
（SASA，萬寧有售）
相信大家都有睇過bifesta呢一款落妝水既廣告，
「一抹卸妝」入晒腦，
睇右邊就未必知道係邊枝，所以我就專登影返個包裝，
見到張相應該知道係邊枝啦～
可能大家都好想知道佢既卸妝實力，
今次就會試一試比大家睇下！
我之前都用左一段時間，
就算夜晚返到幾攰都可以好快落晒成個妝，
慳返唔少時間架。
我會以唔同彩妝做測試，上手後再落妝，
一齊睇下以下既結果啦～
最後試埋一隻防水既眼影，
敷後抹左兩、三次就完全乾淨，good！
實驗證明佢既卸妝能力真係唔錯，
而且佢標榜落妝後唔需要要過水，
其實唔過水皮膚都唔覺乾，真係幾好～
如果係比較難落既眼妝建議用返眼部專用果款，
如果一般妝容就一枝搞掂啦，
價錢都只係$59蚊，抵買！
LUCIDO-L / Argan Rich hair treatment oil $69
（SASA，萬寧有售）
最近無咩時間去做treatment，
頭髮又變到一堆草咁，好易打kick又好旱，
所以我都好鍾意試唔同既髮尾油，
今次介紹比大家既係呢一款Lucido-L既argan oil，
其實呢個牌子既其他髮型產品都唔錯，價錢又平，
呢一枝60ml都只係$69蚊，一個字－抵！
佢既盒身上有４個用法建議，
無論濕髮、乾髮(造型前)、用電髮棒前
或用黎整理曲髮線條都得架。
大家都見到before既頭髮真係好蓬鬆、乾旱、毛燥，
以我既長髮髮量，要按兩至三泵先夠，
喺手掌中心推開後搽落乾髮表面同髮尾，
來回均勻搽晒，摸到頭髮都一樣清爽，唔黏笠，
如果夏天怕會太油，用佢就岩晒，
用後明顯貼服左同柔順左，而且可以改善打kick情況，
之後用電髮棒都唔會再出現飛飛髮～心水推介！
如欲取得更多第一手美容及扮靚資訊
可瀏覽Girls Talk Main Blog：Girlstalk Blog
或 Like我們的Facebook專頁：
Janice Lam Makeup Workshop Facebook
