化妝箱工具大揭秘（一）
係街見到啲人拖住一個個篋都會以為係自由行，
其實都唔一定既，
就好似化妝師出親job都要拎咁多products，
無個篋幫手就真係拎唔掂啦！
下面呢個咁靚既篋之前都有係facebook同大家分享過，
其實係Janice之前去SOGO買既戰利品,
唔只個顏色好靚個內籠都裝到好多野好實用添。
入面會再有大大小小既化妝袋將啲產品分門別類,
排得整整齊齊,搵起上黎就方便好多啦
其實帶咁多products出去未必會用得晒，
咁點解每次出job都要帶咁多野呢?
因為出job既時候好可能要係當日先見到model真人，
事前亦唔清楚佢係咩膚質，
又或者工作前冇reference，當日先知要化咩妝，
如果啲products要用起上黎無預備到，
比人既感覺就好唔pro，
到時都無人可以幫到你架！
所以寧願帶多少少，以備不時之需。
好多人都想八掛下化妝師個篋入面有咩法寶，
個個都以為化妝師用既全部都係貴野，
其實當中好多平價產品都唔差架，
最重要係品質要好好，
以下提及嘅都係Janice用咗好多年，
而家都繼續keep住用嘅產品嚟架。
不過化妝師用嘅產品有啲會專業少少，
平時自己化妝未必適合，例如實色eyeshadow、
creamy狀嘅嘢、打陰影光影嘅產品等，
對一般只係for自己化妝嘅朋友嚟講可能會較難handle架。
我而家就拎Janice個化妝箱出黎,
同大家share下佢會將咩愛用既products放入去啦。
**Skin Care**
大家都知道skin care呢part係非常重要,
我地會帶定唔同類型既skin care for各類型既皮膚，
包括乾性皮膚，油性缺水皮膚，中性皮膚等等…
而size都盡量拎旅行裝,或者用個樽仔裝起就唔洗咁重啦!
帶出job既skin care安全起見就要用比較溫和既產品，
以清爽同極滋潤為主，亦會帶定一啲防敏感產品，
因為有機會遇到model本身係敏感性皮膚，
或者突然間敏感嘅時候作為急救之用。
Skin care主要都係for保濕滋潤為主，
所以會揀cream狀到lotion狀質地，
而Gel狀嘅serum或者gel cream有機會起擦膠碎，
所以都會盡量避免架。
遮眼圈最驚就係搽完concealer會裂開！
所以滋潤型既eye cream亦都好重要，
帶定滋潤少少既eye cream就實無死架啦，
如果眼底真係極乾又有勁多紋既話,
用左面Kiehl’s 呢個eye cream就啱晒！
之前見過一啲外國model眼底極乾，
乾到好似乾旱地區先見到果種龜裂紋都可以做到即時滋潤效果，
另外亦有eyebalm，質地會再厚身啲同潤身啲架。
噴面水亦係急救好物之一，
妝前妝後都用得到，
可以做到即時急救補水架，
所以一定要有一兩支係身邊。
乾性皮膚可以揀右面既水油噴霧；
而油性皮膚揀左面既純水噴霧就可以。
呢支Eight Hour cream係每個化妝師都要有一支傍身嘅，
上堂既時候成日都會用到，
呢支係多用途既萬能cream，
可以用黎當潤唇膏，
或者用黎溝粉底用都得，
咁當然都要好有技巧先得啦！
而化creative妝就好常用到佢啦，
可以當佢係用得係面同身既膠水，
同時亦都好容易卸除。
我地上Advance班就係用佢黎化閃粉妝架啦。
除咗skincare會帶多幾樣之外，
Janice都會帶好多唔同質地同function嘅makeup base架。
以上分別係超潤身嘅、水劑清爽嘅、調膚色、
遮毛孔同有光感嘅base。
Make up Base就要根據客人既膚質同需要黎揀番，
有珍珠底色既base可以令皮膚望落去更加有光澤,
紋都會淡啲架,
揀岩個base妝都keep得耐啲啦。
雖然平時都有好多品牌sponsor，
但係有啲品牌嘅產品香港未必有得賣，
因為可能未必適合香港天氣用，
好似左邊covermark呢支極潤嘅makeup base咁，
香港就冇得賣喇，要喺泰國買，
所以每次去泰國都會掃貨架！
Janice已經用咗14年喇！
質地好潤身，搽完佢上粉好貼，超乾皮膚就啱晒！
中間就係Lancome既遮毛孔base，
如果要化靚女妝影大頭相，
毛孔一定要隱形啦！
用完佢就算影close up相都無問題，
毛孔會即刻say byebye。
如果想面部有多啲光澤感，
就可以用右面果支含有珍珠光澤既primer，
光暗位會突出啲，
出黎就會好有立體感啦!
講到面部既立體感其實係好重要,
所以化妝箱入面一定要備有令身既base
搽完影相出黎既效果都會差好遠,
單單係令身base已經分為好幾種,
包括分為帶閃粉, 珍珠色,幻彩色等等,
我地會視乎個妝想要咩效果黎揀要咩效果黎揀用邊一款。
**Foundation**
出Job既時候會帶多幾支唔同質地或效果既粉底出去,
而大家都見到每種粉底都有2-3支,
通常會帶深,中,淺三隻色,
可以自己溝色用(拎唔到全部色號出街,會重死!)
深淺色既粉底可以用黎做埋面部光暗影位,
望上去就更加有立體感啦!
呢幾款粉底都各有特點，
分別有透薄、高coverage、滋潤度高，
富光澤感嘅粉底，配合唔同人嘅需要。
好多人問邊隻粉底好，
其實要問咗自己有咩需要先，
要對症下藥揀番適合自己嘅粉底。
等我逐一同大家講下啦！
如果瑕疵唔多，想貼薄自然，
均勻膚色嘅可以揀Armani，
質地好透薄，男士都適合架。
想要自然效果，睇起嚟面部好有光澤感、
又好滑嘅可以揀Lancome，
皮膚偏乾，瑕疵相對較多嘅
可以揀潤身質地、中度Coverage嘅Chanel，
如果皮膚極乾，瑕疵較多
可以揀Dior或者Maquillage Creamy嘅粉底。
有時化Skincare妝，
皮膚要好似瑭瓷肌膚咁嘅啞緻感覺就會用ipsa喇。
大家都要注意粉底嘅出產地，
有啲國家嘅品質會比較優勝，
法國同日本出產嘅粉底texture就好好喇。
大家可以留意下，
大部分粉底都係呢兩個國家出產架。
而色tone方面揀番象牙tone就穩陣啲喇。
去揀粉底嘅時候可以留意下色號，
如果寫住Beige或者BR,BE，
多數都係偏黃tone嘅粉底，
以後大家就識揀啦！
**Concealer**
遮瑕膏要溝色嘅話就難少少，
所以會帶多色啲，唔會好似粉底咁只帶深中淺色，
亦會帶唔同牌子，唔同質地嘅concealer，
杰身、厚身、潤身嘅都會帶備，
因為唔止會遮深色素，
斑、癦、痣、胎記甚至紋身都需要遮架。
好多化妝師都鍾意自製palette,
可以將自己鍾意既色批曬落同一盒度!
揀色既時候就非常方便啦!
上圖呢個24格既盒就用左黎放concealer啦,
好多同學都對入面既遮暇膏好有興趣,
其實都係Janice自己訂番黎架!
呢盒Estee Lauder既白金遮暇膏好滋潤，
用佢黎遮眼底就一流,
岩曬眼好乾眼紋又好多既人用!
出job一定唔可以無左佢呀!
**Loose Powder**
碎粉定妝呢part亦都好重要,
model影相好有可能會影幾個鐘,
想個妝keep得持久啲就一定要落碎粉啦,
一般會帶兩至三隻色，
以貼薄為主，唔可以太乾，
較常用一啲淺色，搽上面變透明色嘅碎粉，
M.A.C同NARS兩款都好透薄，上眼都唔會乾。
平時用喺眼同面嘅碎粉，
Janice都鍾意分開用兩種唔同質感架。
而化妝箱入面最不可缺少既其中一樣,
一定仲有化妝掃啦,
老實講句，化妝品入面平野都有好,
但化妝掃就真係一分錢一分貨架。
幫客人用既化妝掃絕對唔可以吉面啦,
會令model覺得唔舒服！
唔同形狀、毛質、毛質比例都好影響一支掃嘅quality，
佢地既型狀大小已經係好重要,
大家見到剩係眼影掃已經有好幾支唔同既size,
每支都各有特點同功能架!
唔同既掃化出黎既感覺都會有唔同,
所以出job一定要有set好齊全既化妝掃先得。
Janice話初頭幾年做化妝師揀化妝掃冇咁高要求，
只係買啲有品牌嘅掃，諗住有保證，
直到早兩年被Shiseido邀請參觀佢地嘅掃廠，
對化妝掃開始有認識，
就開始自己研究，去唔同既掃廠度睇，
再研究下唔同毛質適合做咩掃，出嚟有咩效果，
最後自己訂番嚟用。
身邊嘅化妝師朋友同化妝品牌嘅朋友
都有喺我地workshop度買掃，仲讚不絕口添！
呢set白色抦身既掃係咪好靚?
其實係Janice親自設計架,
係暫時只有一set嘅自家製化妝掃。
暫時仲未有得買呀!
其實呢set掃Janice已經試咗三年幾喇，點解要試咁耐？
因為要試下quality，耐唔耐用，形狀適唔適合大家需要等等，
咁嚴格嘅測試真係需時去試清楚架，
呢set掃如無意外應該出年年頭會面世喇！
大家密切留意啦！
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup
（版權所有，未經同意不得轉載。)
