拍拖後估唔到嘅 低能相處之道

大概係一齊低能。

Text, Iamge: 莎比亞

你會發現，對方係意想唔到咁低能。

拍咗耐咗，有時悶悶哋，大家都會無啦啦問大家一啲古怪嘅問題。

女朋友當然會問：「如果我有日死咗，你會唔會即刻識第二個？」

諗都唔使諗，我即刻答佢：「梗係唔會啦，一生只愛妳一個！」

輪到我，「如果有個女人包起我一日，100萬，妳畀唔畀？」

女朋友答：「畀！但係個女人要醜過我。」

我再問：「如果係靚㗎呢？」

「唔畀。」

「但係一日就有一百萬喎⋯⋯可以去旅行、可以即刻買樓，咁都唔畀？」

「唔畀呀！點都唔畀！掉返轉有個有錢佬要包我一日，一千萬，你畀唔畀？」

「唔畀。」

「可以去旅行、可以即刻買樓，咁都唔畀？」

如是者，有時傾親偈，都會有種「我哋到底傾緊啲乜⋯⋯」嘅感覺。

意想唔到嘅「問答環節」，我哋仲會有九唔搭八嘅對話。

我：「今晚食咩好？」

佢：「唔知呀⋯⋯」

我：「日本嘢？」

佢：「唔喇，唔想食生冷嘢！」

我：「咁煩㗎，隻揪囉！」

佢：「好，揪囉！」

然後，兩個人攬起上嚟⋯⋯

又有一種「我哋到底做緊啲乜⋯⋯」嘅感覺。

看似低能，唔好睇小情侶間嘅無聊細節，其實好有意義。

所謂認真就輸了，有時一齊低能下，先係兩個人相處嘅皇道。唔記得邊個講過－「幽默係對抗憤怒嘅最好方法。」

捨人牙慧一下，喺愛情嚟講－「低能係鬧少啲交嘅方法。」

舉個例，有時感覺到女朋友真係有少少躁，如果我再忍唔住火上加油，實又世界大戰。

佢：「講！你係咪同呢個女仔有路！！！」

以前我會好唔耐煩：「妳唔好再亂諗嘢啦！妳知唔知自己好煩呀！」

依家我會話：「係呀係呀！隻揪囉！」然後又再攬住佢。

人大咗，老喇，鬧交好攰，寶貴嘅時間唔值得再浪費喺無謂嘅爭吵上。

所以，認真就輸了，有時一齊低能下，悶悶哋一齊笑，嬲嬲哋又有個落台階，咁先係兩個人相處嘅皇道。

————————————–

【更多文章】
FB: 莎比亞

Follow IG睇拍拖Sweet相：sapeiar