低成本幸福法：踩其他女仔

次次同女朋友出街，尤其夏天嚟到，總會喺街上遇到一啲著得性感嘅女仔。

你一個唔小心，望咗半眼，視線停留咗喺佢身上超過0.5秒，女朋友就會即刻黑面：「你望咩呀？」

無啦啦又激嬲咗佢。

但終於比我搵到個可以逃過一劫之餘，仲可以氹番女朋友嘅做法⋯⋯

Text, Image: 莎比亞

首先，你要明白點解當你望女仔，女朋友會嬲。

原因係，佢覺得你心入面會將兩者比較，你一望佢，即係覺得佢索過你女朋友。

就算你冇咁諗，女友都會自行同啲女仔比較。

所以，你要做嘅只係好簡單，盡快搵出對方嘅缺點。

假如，對方有對長腿，你就話：「個樣一啲都唔得，妳靚好多囉！」

假如，對方有豐滿身材，你就話：「谷出嚟㗎啫，好Cheap囉！」

假如，對方個樣唔差，你就話：「化妝啫，落咁妝一定好醜。」

好喇，再假如對方有齊以上三點，你就要話：「一定係整出嚟㗎啦，呢啲樣真係唔得⋯⋯」

講呢幾句嘅同時，你必須攬住女朋友，可以嘅話，講完之後𡃶佢一啖。

聰明嘅女朋友，當然知道你只係為咗氹佢，但唔緊要，只要你講，佢就會信，佢就會覺得安心。

曾經我試過一次，唔知嗰日前發咩神經，有個女仔行過，我竟然無啦啦講咗句：「就算佢素顏都應該幾靚。」

個女仔係咩樣，我已經唔記得，但女朋友就到依家都記得我講過呢一句。

以上呢個方法係短期急救性質，如果長遠嚟講，即使有靚女行過，女朋友都唔會唔開心嘅方法，就係日常間讚多啲女朋友，令佢份人有自信啲，知道自己喺男朋友眼中係完美。

咁樣嘅話，你就可以任意咁望女仔了。

講吓笑啫⋯⋯

————————————–

【更多文章】
FB: 莎比亞
Follow IG睇拍拖Sweet相：sapeiar