令人驚喜的小店
講起九龍城，大家一定諗起泰國菜，
但係今次我就想同大家介紹一間“小店”。
無錯！餐廳名叫“小店”，但實際上店內面績一啲都唔少，
仲好闊落添，其實小店有兩間鋪位，
另一間就正正喺對面街，果間就真係比較小一啲嘅。
上一次我係去細鋪嘅，已經係好幾年前嘅事喇，
今次就嚟到大舖試一試。
呢度裝潢唔算好靚好特別，
但都有啲掛畫，門仔，街燈，有少少歐洲feel嘅。
今次朋友點咗一個set dinner，
依文士燴羊扁意粉，
我叫咗煙三文魚忌廉汁意粉，
再另加牛油薯茸菠菜焗田螺同澳洲生蠔。
呢個牛油薯茸菠菜焗田螺真係好魔鬼！
減肥人士食咗有無限罪疚感。
對住超香嘅牛油味薯茸，我完全抵抗唔到。。。
平時對菠菜零興趣，夾埋薯茸同田螺食都幾OK。
初初見到呢個包平平無奇，
只係同平時西餐嘅餐包有啲唔同，
我地仲話，點解個包咁嘅樣嘅，
但咬咗一啖之後就想食多個。
佢有好香嘅香草味，加上我最愛嘅牛油，好味！
多數好貴嘅西餐廳先有特別好食嘅包，
估唔到呢度都可以食到。
至於主菜方面亦好唔錯，
朋友話個羊啱啱好，
唔會煮得over或太生，
但唔食羊嘅朋友可能會覺得羶，
我就覺得OK，羊係要有啲羶味先香架嘛。
我最想講嘅係呢度連配菜都唔會求其，
我個煙三文魚忌廉汁意粉最好食唔係煙三文魚，
而係意粉同啲配菜，蘑菇、青椒紅椒完全唔會輸比主角。
食西餐有個甜品作為結尾先至完美嘅！
而呢度嘅甜品都好出名，尤其是心太軟（呢度叫朱古力布甸跟朱古力汁）!
重頭戲就係佢！
真係要趁熱食晒佢！（其實唔使5分鐘已經清咗。。。）
呢個係我食過最好味嘅心太軟！！絕對係誠意推介呀！
去開九龍城真係要試下呢個甜品！
埋單$390，唔係好平，但唔算貴吧。
仲有一樣想讚嘅就係餐廳服務，
員工好有禮貌，連老闆（我估係老闆）都好nice，
話說臨走果陣，門口地下濕咗，
老闆再三提醒我地，幫我地推住門，
「唔好意思，地下有灘水，小心小心，多謝晒！」
雖然係好細微嘅事，但作為客人都會覺得窩心，
而且真係唔係間間餐廳都做到囉。
下次有機會再同大家分享其他美食啦！
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup
（版權所有，未經同意不得轉載。)
