一個「中秋節」的故事

有人曾經問我：「點解中秋節要食月餅？ 」

我就答佢：「因為嗰時無西餅，又冇Cova，又冇大羅柚《法國高級品牌- Dalloyau》，又冇性安娜《 聖安娜先啱– 笑😄》；咁啱咁Q，個月光又喺個天空上邊又大又圓又靚，啲中國古老甜燒餅又係圓形，嫦娥個老公又掛住佢，觸景傷情，所以嫦娥個老公咪叫嗰啲餅做月餅囉」！《笑😄》

如果大家有聽過「嫦娥奔月」嘅故仔，都知道嫦娥喜歡食水果和甜燒餅。如果冇聽過「嫦娥奔月」嘅故仔，唔緊要，我略略講畀你聽：

嫦娥個老公叫 – 后羿，係個好叻嘅射箭手。

喺好耐以前，地球天空上有十個太陽，熱到嗌救命，熱到水都無得飲。所以后羿就射咗九個太陽落嚟，剩低一個。後來后羿自知自己殺咗「虎身大仙-西王母」九個仔《即係9個太陽》，特定要去昆侖山向「虎身大仙-西王母」贖罪。

「虎身大仙-西王母」當時表面冇乜嘢《后羿唔知咩叫做最毒婦人心 – 笑😄》，反而好敬佩后羿嘅勇氣， 並且賜佢一瓶『長生不老藥』《即係今日嘅botox – 笑😄》，同時話畀佢聽，喺八月十五號之前飲咗佢，可以做神仙！笑😄

以前啲人真係單純啲，冇諗過神仙都會「跣」鑊你金！笑😄

有一次后羿帶徒弟出去打獵時，蓬蒙《后羿的所謂好兄弟》便走到后羿家中，威脅嫦娥交出嗰樽『長生不老藥』。怎知道嫦娥因唔想蓬蒙攞到這樽藥，索性自己飲咗佢《我靚好過你靚 – 笑》。可能份量太多，嫦娥立刻O/D，即場飛星做神仙《即係瓜咗柴升仙–笑😄》

後來后羿知道成件事後，好傷心。之後叫啲賓妹《sorry「丫鬟」先啱 – 笑😄》喺後花園嗰度攞嫦娥鍾意食嗰啲嘢出嚟，拜祭下佢，希望佢會返嚟。之後其他村民聽到呢件事之後，都喺後園度，遙祭嫦娥，祈求她吉祥平安，早日一家可以團圓。

後來「月母」知道呢件事之後，准許嫦娥每年嘅《農曆》八月十五到凡間找后羿相見。

所以月餅暗示一家團圓，圓滿的意思，亦都係一種寄寓親情的食品。所以送月餅給親朋好友，是一種祝福。拜月光亦都係表達自己對神的敬仰。拜過月光啲水果和月餅，亦可以一家人一齊食。

咁喺邊度拜月光好啲呀？

西暦： 10月4日《星期三》

時間：晚上10:30-10:45《今次用咗刻家奇門做，所以只得15分鐘》

方向：向正西

祭品：香燭三支、月餅《唔好用冰皮月餅》、合桃、蘋果《貴啲嗰種》、葡提子《貴啲嗰種，大粒、定細粒你自己鍾意 – 唔好諗邪 – 笑😄》、香蕉《大碌啲嗰種 – 笑😄》、一對椰子《optional》

做法：在吉時內點香、並且祈求及講出：求月母娘娘賜福，早日可成家立室，人月兩團圓。

希望大家中秋節快樂，並誠心祝福，有情人終成眷屬。單身男子和女子《攣直都好》，早日找到自己心愛嘅伴侶。