【簡單溫馨系列】如果你有呢種女友 就好好咁珍惜

網誌

我對女朋友並唔係太好,成日黑佢面,又會對佢呼呼喝喝。

當然,佢都一樣,無啦啦會突然狂鬧人,講嘢Mean得令人想即刻分手。

但畢竟都一齊咗幾年,咩時候溫柔體諒,咩時候可以放縱一下情緒,女朋友都識放識收。

而有一個原因,每次我諗起,就算幾嬲,對愛情幾絕望,都會即刻覺得好窩心。

Text, Iamge: 莎比亞

好多幸福嘅愛情故事,並唔係兩個人一直有幾甜蜜,而係一齊跨過最難捱嘅日子-例如追尋夢想。

女朋友,會因你而轉變。

佢會變得同樣熱血-握實拳頭同你講:「我信你一定得㗎!」

佢會變得同樣任性-攬住你喺你耳邊講:「鍾意就去做啦!我實支持你!」

而最重要,佢會變得同你一樣不設實際:「就算幾辛苦,我哋都一齊去實現。」

不設實際,因為夢想無限,但女人青春有限。追一個夢,熱一次血,要付出時間、心機,金錢,但佢依然選擇鼓勵你,支持你,任你追遂自己嘅目標,陪你行你想行嘅路。

「點解妳會咁傻,咩都支持我?」

「因為我鍾意支持你。」

可能你會搵少咗錢、可能你會少咗時間陪佢,但佢從來都唔計較錢,一個人可能會悶小小,就忍耐一下,期待每次約會見到你。

演員捱出成就多謝老婆、偉大嘅科學家獲諾貝爾獎感謝老婆支持、每一個男人成功後亦感激默默喺背後嘅女人。

「冇佢,我冇今日。」

成功定失敗,畀自己一個限期。面對現實,有時唔到你唔放棄。

佢只需要你記得佢,曾經無怨無悔支持過你,無論夢想能唔能夠成真,講一聲多謝,佢就足夠。

如果你呢刻未有夢想,但當有一日你同佢講你嘅諗法,女朋友就會回應,「我實支持你」。

愛無條件,而佢嘅支持,亦都係無條件。

————————————–

【更多文章】
FB: 莎比亞
Follow IG睇拍拖Sweet相:sapeiar

你可能也喜歡

Recommended