做個識趣的老人家

婚嫁企劃


好友CK致電來:「喂,有冇屋可以平租三個月?我媽媽家裝修,搵唔到屋,佢就會搬來我家,到時我驚有血案發生呀!」我本來以為只是說笑,但回心一想CK平日生活慳斂,如非必要不會亂花錢,於是勸說道:「唉,我都知係慘啲,不過兩母女冇隔夜仇,都係三個月,你咪忍吓佢囉!」怎知CK認真地說:「上次佢過嚟住咗一個月,日日同佢嗌交,你知嗎,我試過企係馬路邊有衝動就咁衝出去呀,自己係街行行吓都係咁喊,唉,你唔明o架啦。」
我怎會不明白,我有這麼的性格,你會認為我媽是省油的燈嗎?尤其我有「人質」在媽媽手上,衝突就更多了,幸好媽媽跟我都是善忘的人,吵鬧完很快便不記得。不過跟老人家相處的確很考學問,尤其奶奶,相識才幾年,要我乖乖唯命是從,恕我著實辦不到,遇着不啱聽的只好充耳不聞,已是我的極限(換轉是我媽一定一句頂十句),所以自問是個不合格的新抱。朋友都笑,三十年後,我都會像一眾媽媽囉囉唆唆,也一定是個野蠻奶奶……..,「己所不欲,勿施於人」,所以特別立下規條,叮嚀自己老了也要做個討人歡喜的老人家。


1. 尊重私隱,切忌偷聽兒子的電話、偷看他的SMS,甚至偷閱他的email。(私隱老公不獲享有。)

2. 兒子約出街吃飯,切勿推搪,更千萬不要說:「無端端做咩鬼要出街食,多味精呀,返來屋企食仲好啦。」(咁掃興,極有可能無下次。這一點,我應該不會犯,因為我不懂煮,也喜歡出街食。)

3. 無論被帶到哪裡吃飯,也不要反對或嫌棄,就算不好吃也不要彈三彈四,埋單後也不要問價錢。(表現寬容大方,是做個識趣老人家的基本要求。)

4. 工作時間非急事不要致電兒子,不要老是問:「今晚返唔返來食飯?咁聽晚呢?又唔返,去邊呀?」(試想想自己忙到厠所都冇時間去時,阿媽打o黎說些芝麻綠豆的小事,你會有咩反應呢?)

5. 兒子送的禮物,首先不要問價錢,就算不喜歡也要表現歡喜。(情況跟老公用相同價錢不買Chanel買了個Bally手袋給你一樣,也要笑住收咗先,否則極有可能無下個。)

6. 不要厭棄兒子的女友,不要老是跟兒子的女朋友過不去。(請記住陪你終老的人是你老公,不是兒子,而且於多數的情況下,你都一定會輸給那個女人,要鬥下去,最終受苦的只會是兒子。)

7. 不要在兒子面前投訴他老婆或女朋友,更千萬別說一些刻薄的說話。(要得到別人尊重也要先尊重自己,而且投訴o黎做嘜呢?唔通你天真到以為阿仔返去會責罵老婆嗎?到頭來只會令兒子不快。)

8. 兒子自己的家愛怎樣裝修怎樣布置都不干媽媽事,他沒問不要給意見,更不要老是說這個不好,那個不對。(間屋是他住不是你住,老是批評只會令人覺得討厭麻煩。)

9. 小朋友的生活只有父母有權決定,對於孫兒的教養不要意見多多。(除非兒子將子女交給你照顧,那自然得跟從你的方法,否則Grandma的角色只是陪玩、縱壞。)

10. 千萬不要妒忌兒子送貴重禮物給老婆或女友,更不要要求兒子送你相同價值的禮物,這樣只會苦了兒子。(哈哈,這是天理循環,你去問吓老公或男友送過啲咩俾阿媽,再睇吓自己呢幾年來收過啲咩,係咪無得再投訴啦。)

11. 千萬別要求或妄想兒子結婚後,跟你同住。(簡單一句:要你跟奶奶住,你會接受嗎?)

12. 不要老是批評別人的生活,不要拿兒子或孫兒,甚至新抱,跟人比較。(年代不同生活自然不同,老了也要緊記,而且知足常樂,媽媽有時會跟我說:「阿邊個嗰女俾半份糧阿媽做家用呀。」我會說笑的說:「係呀,可能佢日日俾個女打,你唔知呢。」潛台詞是:對別人當然是說好的一面,但可能有壞的一面別人看不到而已,媽媽也很識趣,通常會笑著答:「點會啫。」。)
我也不知道自己到時是否真的可以做到,我只知道做個識趣的老人家,是讓人願意親近的最佳方法。

常見問題

開始需要籌備婚禮要留意什麼?

首先,要訂一個結婚的好日子,即看2022結婚吉日/2023結婚吉日; 訂好後就可以開始看場地,疫情下輕婚禮場地成為了不少新人的首選,即看人氣輕婚禮場地推薦;之後再可以開始看看婚紗,有時間更會有名牌婚紗限時加$1多1件優惠,詳情請看

婚禮開支要預幾多?最新人情公價又是幾多?

首先,我們可以留意婚禮籌備超實用規劃Checklist,看看還有什麼需要準備。之後再看準新人必學11大節省貼士。最後,就是留意最新的人情公價

你可能也喜歡

There are 10 comments

Add yours
  1. Hilda

    我希望到時我都做倒, 不過2,3,5,8,9,11& 12, 我一定做倒, 哈哈, 不過可能第時要打電話比你同你傾下…..

  2. Jovi

    hi michele,基本上我覺得大部份我都做到,我一定唔會係偷聽人講野,睇人sms,email個d人,even老公我都唔會..哈哈…不過pt. 6 就好難講,如果個新抱好唔掂,人品有問題,我諗我會提醒下個仔既…哈哈…不過當然唔會勉強拆散…btw…我連仔都未生得出…想得太多了..哈哈..

  3. dana

    這全是方便新抱的規條吧?大概係你以而家既處境寫既。但試問你生兒育兒,又點會唔掛住佢呀?當你要求老人家識做,你都要識做囉我覺得……我覺得佢地覺得個仔俾個新抱搶左有d寂寞在所難免,都生存左咁多年,想任性少少等個仔就下自己有mea唔岩先?做人最好設身處地。不過你大概都係想人認同你,所以你可以唔接納我意見。

  4. michellelau

    Hi dana,

    我當然接納你的意見, 其實我是以作為子女的看法而寫, 從未想過身為新抱的身分, 因為有很多事情也是發生在我媽身上, 我不是責怪老人家, 也明白父母的處境, 可是有時的確會令子女很為難很不開心.
    而且自問非孝順女, 天理循環因果報應下, 自知未有資格要求兒子將來會孝順我, 所以才有需要定下規條. 而我認識的朋友中, 也有很多是100分新抱, 我是真心敬佩她們的.
    而我更需為我奶奶澄清, 以上情況很少出現在我身上, 因為奶奶生活很精采, 節目很豐富, 比我們還要忙, 才沒空理我老公同我, 所以並沒有帶給我煩惱.
    (不過, 其中的1, 2, 3, 11都是我媽教我的.)

  5. Hilda

    Hi Michelle
    (不過, 其中的1, 2, 3, 11都是我媽教我的.) – 你媽已過來人身份同你分享,
    “而且自問非孝順女, 天理循環因果報應下, 自知未有資格要求兒子將來會孝順我” 我都不是一個孝順女, 自從上次媽媽同老公意見不合, 直都現在我心都有條刺, 但可以點, 一個係我亞媽, 一個係我老公, 佢地大家都在不同的生活環境下生活, 走在一起一定大家有意見不合, 咁我只有選擇見少d, 所以我第時會做人奶奶同埋外母, 我一定要提醒自己要做個識趣/可愛的奶奶/外母, 咁先唔會另自己仔女辛苦, 老公成日同我講老時只有我倆在一起, 唔好望仔女會同你住, 我就話咁你一定要對我好d, 如果唔係你老左行唔倒冇人扶你去飲茶.
    有d長氣, 唔好意思!

  6. Angela Cheng

    其實最難做係做磨心o個個, 就係你個仔/女囉!點解身為父母要子女如此難受呢?所以我很同意michelle 的說法,如果能謹記的話,家庭關係會融合得多。
    我覺得當子女長大後父母最大的課題係要學放手,子女會有自己的想法,父母已經不可以全權控制子女。但放手係很難的,可能做到嬤嬤級也未必完全放手。
    子女尊重父母係應該的但是問題係父母真的有贏得那份尊重嗎?尊重也包括接受兒子的選擇,我覺得父母可以表達對子女配偶的意見,但去到哪個程度呢?是否要令到大家都不快甚至難堪?子女尊重父母係出於愛所以才容忍包容,父母的意見亦然,但父母很多時都得寸近尺。這樣只會把兒子推遠罷了!為何不做個識趣人見人愛的老人家呢?
    如果能避免衝突的話,子女自然會多親近父母

  7. michellelau

    對呀, 係我身邊既朋友, 主要都係同自己阿媽意見不合而唔開心, 奶奶無論做咩,都唔會令個新抱唔開心, 因為大不了咪唔理佢, 但阿媽就唔可以唔理. 尋日又有另一個朋友話我聽同阿媽嗌交嗌到喊, 雖然我地唔係孝順女,但都一樣好愛自己既媽媽or 長輩, 橫蠻唔講道理, 只會令關係變差, 所以我希望我可以做到唔為難仔仔既媽媽啦.


Post a new comment