荔枝角．美孚 3大呃Like小食加賞花

Text | Pan
Edit | Kingyo

荔枝角至美孚屬工業區與住宅區，予人印象死板悶蛋；若不在該區居住或上班，相信大家最多只在搭車時跟它們擦身而過。近期不少人都開始慢慢發掘區內食買玩新熱點，由工廈變身的文青蒲點至活化古蹟文物館，原來區內可尋。

01 特色鮮果糯米糍
食來食去都係芒果味？好似呢間小店咁，本身係水果店，後來老闆靈機一觸，用其他水果入饌糯米糍，結果為芒果糯米糍再帶來新噱頭！益力多芒果、抹茶 芒果、朱古力芒果及黑糖芒果等不同口味的糯米皮，包手掌咁大的芒果肉；

另外仲有不餡的水蜜桃及榴槤味，坊間的確少見，加上每日限定發售，難怪常有有街坊排定隊等開賣，大家要留意供應時間呢！

香蕉糯米糍 HK$12 /榴槤糯米糍 HK$30 / 芒果糯米糍 HK$26 (各兩件)
王孖記菓子
時間：9am-7pm
地址：荔枝角青山道475號地下 A 舖
查詢：55929088

02 熱爆車輪餅
台灣小食車輪餅，外層鬆軟內餡香濃，可惜老是紅豆餡，好容易食到悶。而最新本地小店就為車輪餅加入新點子，開發另類口味如紫薯、芝麻、奶茶、香芋及抹茶等，撞出新意大受歡迎。

採訪當日，記者眼見街坊要排定隊等開閘，而且更是即叫即製熱辣辣,口味也是每日開賣前才公布，不時更新款式，只要十蚊就買到神秘感與新鮮感，仲可以呃 like，抵!

車輪餅小姐
時間：12am-2:30pm; 4pm-9pm( 周五休息 )
地址：美孚新村吉利徑19號50B7號舖
查詢：66871093

03 微甜紫薯蛋糕

近期興食紫薯，而這間開業不久的泰式 café,其鎮店之寶的紫薯蛋糕就同店內紫色裝潢襯到絕，賣相夠精美，味道亦不錯，香 濃薯味但卻不過甜不過膩，對怕肥的女士們來說是零罪惡感呢。單件唔夠喉的話，不妨原個訂購兩百蚊一磅。店內甜品超過三十款，綠茶蛋糕亦是記者心水之選；甜品以外，店內其他主食如炒金邊粉、海南雞飯及薄餅等亦夠惹味。

Ultra Violet
時間：11:30am-11pm
地址：荔枝角長義街9號 D2Place2樓 V2號舖
查詢：27436303

文化館悠閒賞花
位於美孚的饒宗頤文化館，環境清幽舒適加上入場免費，老中青都愛來館內蹓躂半日，沉醉鳥語花香的氛圍。目前正值春天花開時分，館內所種植的兩百株宮粉羊蹄甲樹都在陸續盛開，由門口、內園中區一直伸展至山坡，叢叢綠葉中有一抹粉紅，朵朵在枝頭上爭艷，隨便站在樹旁按下快門便能輕鬆拍下佳作。

而最新開張的樂茶雅舍亦不要錯過，室內相連畫作展館，幾十款 紅、白、黃及青茶等可選，一邊呷口茶，一邊欣賞四周的字畫佳作，很有詩情畫意呢！目前正在舉辦「 紅牆花蹤 ——饒宗頤文化館花節2016 」，而四月十日更有潮蒲饒館及手作市集兩大活動，絕無悶場。
饒宗頤文化館紅牆花蹤
日期：2016年2月至4月
開放時間：8am-10pm( 星期一至日 )
地點：九龍青山道800號饒宗頤文化館
交通:港鐵美孚站 B 出口、 九巴31B,32,35A,36B,40,286X 均可達
查詢：21002828

網址：www.jtia.hk

延伸閱讀：

▲荔枝角工廈新生 隱藏美食14道

▲美孚 爆餡 車輪餅 + 街坊勁讚美食15道