率先試 Le Café Habitat PARIS 當自己屋企hea

只聞樓梯響的歐洲家品名店 Habitat終於響香港重開，貫徹品牌的歐洲簡約風味，但相比歐洲各國的Habitat較細間好多，產品選擇較少，有點失望，惟有焦點就放了在全球首家Habitat餐飲概念咖啡店 Le Café Habitat PARIS之上。可能因只開業一星期唔夠，即使是lunch time來到，仍可以有窗口位坐，一個人霸張四人枱，一邊是藍天綠油油維園草地景，另一邊擺滿家品的display好似開放式廚房，聽着悠閒的法國音樂，好似去咗法國人屋企。響香港買得起呢度啲家品，都買唔起咁大間屋擺到咁靚，一於fait comme chez moi (法語：當自己屋企咁！)，響度hea番夠本！

 
響銅鑼灣餐廳望到呢個藍天草地景，消費平均每人要$100以上，呢個View都值回票價。

可能因仍在試業階段，連廚房的進度都係行「法式」，雖然店子坐不到三分一人，上菜和店員反應都是法式慢節奏。

同屋企人住未必可以隨心所欲買呢類北歐風餐桌，來呢度食吓嘢，坐咗當買咗！

坐窗口位一邊係靚風景，望另一邊有點像置身超大靚靚開放式廚房。

NextPage>>睇完環境，係時候睇吓有乜食嘞！

講明主打現代法式輕食，以all day breakfast,炸魚薯條同三文治為主；飲品選擇亦不多。呢杯Lavender Latte ($48)，特別加入薰衣草糖漿，香味唔太濃易入口唔會似飲薰衣茸body lotion，不過因為奶味太強，完全飲不出有咖啡味。

Egg Benedict (Ham) ($78) 62度慢煮蛋配芝士和煙火腿，底層係英式muffin，流心蛋配半溶芝士極完美， 絕對手工之作，雖然等咗十五分鐘，但也值得。

甜品我揀咗比利時窩夫配朱古力泡泡及雪糕烤果仁($68)，睇個名覺得好正，店員話要等十五分鐘，等！結果擺到上枱俾個樣嚇一嚇，硬住頭皮一試，發覺朱古力配烤果仁香口不膩，泡泡質感唔會漿住個口，內裏包住一塊薄身waffle同雪糕，其貌不揚但出奇美味，分量極大，建譏兩人share！

如果只係想嚟hea吓！可以叫杯咖啡配件cake，每件$38有好多選擇，店員心水推介係Earl Grey Creme Brulee，茶味香濃。

Rasberry & Chocolate Mousse ($38)味道清新，配紅茶最好。

NextPage>>一場嚟到，梗係逛吓睇吓有乜精選家品！

原本色配深灰餐桌跟金屬腳餐椅不像一套卻出現搭配，枱面配淨色餐具，典型簡約歐洲現代時尚風格。

近年北歐風在家品界大行其道，相信這隻可愛碟子一定大受歡迎。

天藍色沙律盤，在餐桌上極易配搭，能融入在不同的風格之中，簡約高雅。

單坐位布梳化，放在書房最適合，仍未有自己的書房？就來這個「示範單位」坐坐吧！

Habitat概念店

地址： 銅鑼灣香港銅鑼灣告士打道311號皇室堡15樓全層

電話： 2310 1964

營業時間： 每日早上11時至晚上10時

網址： www.habitat.com.hk

延伸閱讀

▲飲水思源 MADERA CAFÉ

HTTP://GOO.GL/YHGC9H

▲COCOTTE 初秋新餐牌 食時令法國菜

HTTP://GOO.GL/6CXDVB

如欲率先接收資訊，請讚好我們的FB專頁並於「已讚好」選單設定「搶先看」，多謝支持。
More Facebook :https://www.facebook.com/morehk.hk