Coffee重提往事選擇啞忍反被老公指責 面對低谷全靠「瑜伽」救了自己
Coffee林芊妤如今成為瑜伽女王,人氣YouTube之一,其實過往她曾經歷高山低谷,當年「殘廁Gathering事件」令她陷入人生谷底,除了與無綫解約更受多人言語攻擊。日前她上陳敏之的YouTube頻道盡訴心中情,表示當年曾被的士司機當面斥:「嗰時唔知見佢瞓過幾多男人!」不過選擇啞忍的Coffee反被老公指責,認為她應要為自己發聲,將來才有能力保護自己的兒子。
原文刊於:東方新地 圖片:陳敏之YouTube頻道、Coffee IG
Coffee坦言瑜伽救了自己
Coffee林芊妤離開無綫後向外闖,殺出新血路成為瑜伽老師,亦因為拍攝瑜伽教學片段成為「百萬YouTuber」,搖身一變成為爆紅KOL,很多人都說是當年的「殘廁Gathering事件」令她重生,Coffee為陳敏之的YouTube頻道拍片接受訪問,表示其實是「瑜伽」救了自己。
Coffee聽盡侮辱說話
Coffee表面上轉型成功有不少支持者,但她亦受到不少抨擊,她在節目上說自從2014年發生了「Gathering事件」,至今仍然會被Haters攻擊,出言侮辱,甚至以「妓女」去形容自己。對冷言冷語她早已習慣,Coffee說以前無綫會叫藝人無論發生咩事都唔好出聲,以前她會照做,不過現在極度反對這句說話。
的士司機一句說話令Coffee捱鬧
Coffee曾經因為沉默啞忍,面對委屈依然選擇硬食:「有一次我同老公搭的士,個司機認唔到我,我戴住口罩,佢就講:『咪好似嗰個Coffee咁囉,你睇嗰時,一件咁嘅事,依家紅到咁喇,嗰時我唔知見過佢瞓幾多男人!』我心諗,真係咩都可以講得出㗎喎……落車後我老公問我點解唔反駁佢,我話算啦,佢都唔係邊個,唔通同佢嗌交咩?咁我真係冇吖嘛,佢邊度睇到我同男人瞓呢?結果返到屋企老公就臭罵咗我一頓,因為佢好嬲,佢話點解你唔保護自己呢?點解唔為自己企出嚟,但我習慣以前發生嗰件事都係唔出聲由佢過咗去就算。咁佢個重點就話,咁你點保護你個仔?當你個仔喺度讀書嘅時候佢都會面對呢啲人,你係咪要佢同你同一樣嘅方法去對人?」
自爆曾被前男友家暴
Coffee自小受到父親影響,「打者愛也」的思想根深蒂固,節目上她自爆一句「以前啲男朋友想打我就打我」,其後她接受訪問時承認被男友打的事真實存在,不過是在入行前,因為初戀乜都唔識,男友管得她好嚴,是個控制狂,有時她與朋友打籃球,男友有懷疑就打她,動手後又會下跪喊晒,解釋因為太緊張Coffee才會出手,當時Coffee父親都話男友因為太愛她緊張她,所以Coffee逆來順受,到長大後才知不能接受。