林鍾一戰 林鍾一戰

「林鍾一戰」暫定9月開打!林作EQ高、轉數快回應鍾培生口戰 獲網民轉風向支持

網絡熱話

富三代鍾培生與林作「林鍾一戰」蘊釀多時,終於宣告打得成!近日鍾培生就在自家淺水灣道豪宅大搞「林鍾一戰」記者會,向公眾交代拳賽舉行的各項細節。而鍾培生與林作首次碰頭就火藥味甚濃,未打先口戰,不過有網民就表示記者會後對林作改觀,更讚揚他高EQ轉數快。

原文刊於:東方新地 |圖片來源:鍾培生YouTube截圖、鍾培生IG

「林鍾一戰」暫定9月開打 記者會火藥味甚濃

鍾培生和林作今日舉行「林鍾一戰」記者會,公布拳賽暫定9月中舉行,以賣飛形式,屆時還會有四至六場拳賽,除了「林鍾一戰」外,還包括有亞洲職業拳王級選手及網絡紅人等,並安排有top band、藝人等演出。

鍾培生 林作 記者會
鍾培生在記者會前先po一張酷爆相,表示準備好見記者﹗圖片來源:鍾培生IG

鍾培生:「要打到佢抬住離開個台﹗」

「林鍾一戰」記者會先由鍾培生發言,他指自己打拳時手腳不協調,雖然曾參與拳擊比賽,但已超過年多沒有做運動,身形肥了不少,鍾培生話:「相信林作係我咁多對手中最水皮的一個,我會用盡心血去打低佢,雖然佢重磅過我,呢個唔係重點,但我會喺台上揼佢啦,羞辱佢啦﹗令佢好難落台,要人抬落去﹗好多人問我,我打開拳會唔會恰佢㗎?我係A side(主辦)恰佢咪恰佢囉﹗相信今次係近呢幾年香港最大嘅盛事﹗我會將林作呢個liittle piece of shxt變咗big piece of shxt﹗」

鍾培生 林作 記者會
記者會全程,鍾培生全程嬲爆爆,對住林作一臉厭惡﹗ 圖片來源:鍾培生YouTube截圖

林作知道鍾培生身高167cm即應戰

林作發言時不改嬉皮笑臉個性,鍾培生不時忍唔住中途鬧林作,一開始林作九唔搭八話:「今日我來只係想帶一個訊息,香港始終避唔開分裂,一左一右,一係投畀鍾生,一係投票畀我林作,遲吓整一個公投﹗」鍾培生忍唔住鬧林作:「收皮啦你﹗」林作繼續:「今日我係代表香港嘅老百姓,呢場係普通人同權貴嘅比賽,希望得到大家支持,一百萬對我嚟講好重要,譬如話可以醫到一個病﹗」鍾培生插嘴:「醫番你個腦﹗」林作又話依家輸贏都得到一百萬,令他感到特別起勁:「經過雙方談判,對方高度係167cm,呢個身高好敏感,咁打啦﹗以我體重屬中量級,我承諾上台唔會交行貨,會打低佢﹗」

鍾培生 林作 記者會
林作一臉輕鬆,更貫徹嬉皮笑臉,佢強調「識講笑唔代表唔打得」。圖片來源:鍾培生YouTube截圖

鍾培生寸爆:「本來我想搵殯儀館贊助﹗」

鍾培生指如果認真打,十秒可擊倒林作,我成日講係要fxxking break him﹗不過唔會咁做。」有人問鍾培生會否打死林作?鍾培生表示:「有我介紹畀佢嘅向師傅同佢操,依家應該唔會,不過我本來想搵殯儀館贊助,依家應該搵輪椅贊助﹗」林作不停表示自己好有信心,鍾培生即話:「你冇我,你一文不值﹗」有記者問到林作未有拳擊經驗,可有壓力?林作一臉自信話:「我出名乜都上手快,做嘢又係,足球又係,運動細胞呢啲嘢係冇得改嘅,因為才華任何地方都係我嘅擂台﹗」鍾培生再度忍唔住爆:「收皮啦你﹗」

鍾培生 林作 記者會
林作發表時,鍾培生多次忍唔住插嘴寸林作。圖片來源:鍾培生YouTube截圖

鍾培生多次被林作激嬲

鍾培生再次中斷林作發表:「我幫大家問你,你啲自信邊度嚟?照鏡時有冇覺得蒙羞?」林作話:「我想畀普通男士或女士睇,如果我得,你都得,我簡直係人生勵志例子,或許我哋做唔到富三代人﹗」鍾培生再插嘴:「好簡單,佢嘅價值就係被人打﹗」林作一臉得意話:「我林作成世人最大成就係今日﹗多謝鍾生畀呢個機會我﹗」鍾培生即話:「 大家記者zoom近啲睇吓呢pat嘢可以對我做啲乜?如果佢喺台上面出陰招,look at me, I’m fxxking champ. 」

鍾培生 林作 記者會
大會安排二人合照,林作繼續笑,反之鍾培生全程嬲爆爆﹗圖片來源:鍾培生YouTube截圖

「林鍾一戰」台上互寸火花四濺,合照時本來大家各企一邊,大會司儀又一再強調不會有握手環節,安排林鍾企埋一點,二人其後應記者要求擺出對戰甫士,全程鍾培生嚴肅笑唔出,反而林作不時忍唔住笑,形成強烈對比﹗

鍾培生 林作 記者會
林作應記者要求擺出拳甫士,不過鍾培生只係chok住怒睥林作。圖片來源:鍾培生YouTube截圖
鍾培生 林作 記者會
鍾培生一直cool到爆,同林作無厘正經,形成強烈對比。圖片來源:鍾培生YouTube截圖

記者會反令網民對林作改觀

在整個「林鍾一戰」記者會中,林作多次被鐘培生中斷發言,鐘培生更不時用以「piece of shxt」來形容對方,但未見林作受挑釁牽動情緒,仍然一貫嬉皮笑臉,不時更會自嘲形式回應對方:「多謝鐘生睇得起我,個100萬對於我嚟講好重要」、「我嘅成就就係唔需要有成就都可以坐喺呢度」、「我好感恩derek(鍾培生)咁睇得起我,係我人生最大嘅成就。」。

圖片來源:YouTube截圖
圖片來源:YouTube截圖

 

網民:「林作EG好高」

記者會後,有不少網民都對林作表現改觀,指他EQ高轉數快,而且搞笑幽默:「雖然唔中意林作,但佢eq又真係幾高」、「我覺得林作eq好高,講嘢有文有路,反而鍾培生下下淨係識得鬧人,冇咩內容」,更有網民直言:「終於明白點解佢會追到麥明詩」。

公布合約條款:

1. 賽事為拳擊形式進行
2. 賽事以4回合,每回合2分鐘進行
3. 鍾培生出賽限重,量秤於賽事前一天內舉行
4. 鍾培生的量重在量秤時超越合約所規定重量(可於一個半小時間減至合約所指重量,如無法守約,則對手可以直接獲判技術勝出。唯雙方可在協商後依照安排比賽,超重一方須賠償對手每0.5KG港幣10,000元)。而林作則不設此限。
5. 配帶拳套為10盎司

6. 鍾培生同意無論賽事結果,均需於賽後向林作支付表演/出賽費用港幣一百萬元正(HKD$1,000,000)
7. 合約各方免除合約各方因拳擊賽事引致拳手之死亡及/或受傷的任何責任,包括但不阻於所有日後之法律追討賠償等,拳手亦承諾不能向主辦方及/或有關人士單位追討。
8. 但如林作違反合約包括但不限於無法出席賽事,則鍾培生無需支付上述款項,林作需賠償期間所有宣傳支出。

你可能也喜歡

Recommended