醜態百出！10個 搭車 遇到最討厭的缺德行為

Text | Avis

一個車廂就係一個生態，裡面咩人都有，最驚遇到缺德嘅乘客，邊幾樣令人最討厭？一齊睇睇以下10樣 搭車 時遇到既冇禮貌又會造成滋擾嘅行為！

剪指甲

仲要剪到啪啪聲，彈到周圍都係（仲有可能彈到人！諗起就打冷震！），其實指甲係會飛彈到地毯同（巴士）座位上，拍都拍唔走，清理就要逐塊挑出嚟，勁恐怖！呢個係好基本嘅衛生意識，隨地吐痰都罰千五，強烈建議交通工具上剪指甲都要罰款！

大聲講嘢

無論講電話定傾偈，好似食咗個大聲公咁，講到全車都聽到，搭一程車半粒鐘好似識咗佢成世咁，其實唔係咁多人鍾意八卦別人私隱，更希望喺車程靜靜哋養下神做自己嘢「今日晏晝食咗啲咩，公司個Richard點溝掂新嚟嗰個Lucy，關我隱事咩？」

開Speaker打機、睇片

同樣道理，靜靜地搭程車，點解又要迫全車一齊聽韓劇、廣場舞音樂同Candy Crush？世界上有個發明叫耳機，根本冇人有興趣聽其他人手機發出嘅聲音，交通工具亦唔需要有DJ點播囉。

鬥快上落車／鬥迫

永遠當條排隊線同啲箭咀係透明，未等人落車已一枝箭衝上車，以為自己參加奧運，而個位就係金牌，爭輸咗會好失望，企幾個站對腳都會斷咁。繁忙時間知道一定冇位坐，就轉移目標：排除萬難都要迫入車廂，門前得返1cm位都要迫埋嚟，同其他乘客面貼面都在所不計，唔知仲以為呢架係世界末日接走地球人嘅最後一班車……

擾人坐勢／企位

晾腳過對面個位、將對腳屈起頂住前面個椅背、坐到斜晒霸埋隔籬半個位、明明唔迫但都企正喺車門前，或永遠頂住車廂通道，喺交通工具上打橫行都未驚過，呢啲咪叫霸氣……

位霸

將手袋同隨行物品放喺座位上，得返最後一個位先不情不願拎開……都算喇！唔明點解有人硬係要坐走廊位，當有人想坐喺旁邊嘅窗口位時，就會擺出一副「咁煩㗎坐埋嚟」嘅表情。咁霸氣，點解唔自己book架巴士？咁咪可以坐晒成架車囉。

柱男/柱女

車廂內嘅扶手顧名思義係用隻手嚟扶住，而唔係成個身體挨落去！討厭之中最討厭係有人唔會理你已經緊握扶手，自顧自挨過嚟迫你放手，真係好有衝動順勢出拳……

吃濃味食物

港鐵車廂不准飲食，但小編見過有人大模斯樣食車仔麵，仲食到雪雪聲！巴士上食橙、炸雞、麥記等重口味食物亦係好可怕，甚至有人食大樹波羅同榴槤…… 救命呀！

化妝

雖然喺一個咁擠迫（同咁震）嘅環境下，由素顏化到變女神都係一門功夫，但係如果可以喺車廂化妝，點解唔喺車廂落妝、敷mask、清黑頭、脫毛……？做得晒的話ok you win，如果做唔晒，咁不如一樣都唔好做啦。

任由小朋友四圍跑

騷擾不特止，仲會好易撞到其他乘客，亂咁橫衝直撞亦都有危險，最奇係家長完全唔加以阻止，有時甚至好鼓勵小朋友跑快啲霸位！何止要贏在起跑線，簡直係贏在閘門前啦。

延伸閱讀：
▲ 【得意/驚嚇？】三大男友最憎的GEL甲 http://www.sundaymore.com/?p=356233
▲ 相由心生 從五官更了解自己 http://www.sundaymore.com/?p=305990

如欲率先接收資訊，請讚好我們的FB專頁並於「已讚好」選單設定「搶先看」，多謝支持。
More Facebook: https://www.facebook.com/morehk.hk