【藍橘子】《老老實實,鬧謝霆鋒嘅人都係妒忌佢!》

網絡熱話

我必須向大家坦白,我係謝霆鋒Fans。讀中學時幾乎每日都Loop《活著Viva》、《無聲仿有聲》、《遊樂場》…

Text: 藍橘子 | Photo: YouTube截圖 ﹑謝霆鋒官方 Facebook大嘥鬼 Big Waster Facebook | Source: 新Monday

內容由博客提供及授權轉載,不代表本刊立場

當年未有「Chok」呢個詞彙,我衷心覺得佢好有型。仲喺女人街買咗條褲腳有火焰嘅喇叭褲,無視校規留長頭髮。

每次被老師捉到我頭髮過長,我總係默默低頭認錯,腦海響起「不想聽聽話話,我有權矇著耳不須打救」嘅旋律,正所謂『表面唔忟,內心搖滾』就係呢種。

儘管我個臉形同個樣都唔襯長頭髮,但唔理得咁多,細細個模仿偶像就係咁開心,你見而家周街都係周柏豪頭,唔通佢哋臉形又好襯咩!

我每次見到有人鬧謝霆鋒都好疑惑,點解全世界都好似想佢死咁?霆鋒做嘅每一件事,都係為咗社會而發聲!對社會嘅不公平作出嘅控訴!

頂包事件展現到法律嘅荒謬,表演時結他無聲就掟爛佢,係對現實嘅無助作出反擊。至於單線solo結他…

好明顯就係一種行為藝術,香港人生活嘅路,就好似得單線結他咁窄,但佢都能夠展現出獨特嘅一面,活著去Viva,好值得令人敬佩。

你班盲目反佢嘅人,令霆鋒無興趣再唱歌,轉戰電影同幕後,一樣搞得有聲有色,仲做埋老闆。當霆鋒偶爾先喺公開場合表演幾首歌,大家又犯賤地懷念佢嘅舊歌,仲話好希望佢可以開演唱會。

不過叛逆Viva嘅佢一於少理,出現返幕前竟然係做飲食節目。「十二鋒」呢個名,根本表達唔到佢嘅形象百變,所以我覺得佢應該叫「七十二鋒」。

相信大家近日都見到,佢喺飲食節目時係幾咁有型,雖然好多人都恥笑佢煮嘢食造假,但我相信,霆鋒係想話畀大家聽,現實社會有好多嘢,即使係你親眼見到,都一樣可以係假。佢喺大陸節目如此大膽作出嘲諷,我直頭覺得佢係一個革命勇者。

講咗咁耐,其實我自己最佩服霆鋒嘅一件事,係佢真正可以「活出自己」。鍾意唱歌就唱歌,演戲就演戲,煮嘢食就煮嘢食,完全唔在乎其他人點睇佢,自己開心就足夠…

試問又有幾多人可以做得到?
就算你唱歌、演戲、煮嘢全部都叻過佢,都一定會受到大眾批評。

而當你受咁多批評,仲可唔可以同佢一樣,堅持做自己想做嘅事?

https://www.youtube.com/watch?v=Q7QMwrwi2jo

你可能也喜歡

Recommended