彭羚

復出唱一場都好!10首你一定唱過/聽過的 彭羚 經典歌

網絡熱話

##embed-label-0##

Text | Avis

最近彭羚(Cass)出山為母校民生書院唱紀念歌曲,又參與MV拍攝工作,因此再傳即將復出開演唱會嘅消息!粉絲聽到應該開心到彈起,但可惜,Cass已經一再否認,話冇再開show嘅打算…… 作為90年代香港樂壇其中一把最動聽同具代表性嘅「超級女聲」,Cass同林海峰結婚後幾乎完全退出樂壇,真係好可惜!其實復出唱一場都好吖,大家真係好恨再聽到高音甜中音準低音勁、由耳窩穿透到心窩嘅實力派歌聲~ 喺大家繼續痴痴地等落去嘅同時,不如一齊重溫下呢10首就算冇唱過(因為太難唱…可能有嗌爆過咪?)都有聽過嘅彭羚 經典歌!

讓我跟你走
http://www.youtube.com/watch?v=6wfi2RwzM2Q
「來讓我跟你走~~~ 流浪到天邊海角」此起彼落喺K房嗌爆咪都要點嚟唱!唔單止素人,唔少女歌手都有翻唱過,但又有邊個可以超越到彭羚?聽返佢呢個演唱會版本,最後高潮位升key拉長尾音嗰下,再加埋個感情收放,簡直係神級演繹呀!冇呀,香港已經冇女歌手可以做到!

未完的小說
https://www.youtube.com/watch?v=mn-KT_09fCo
未完的小說係1994年商台廣播劇《戀愛1/2》主題曲,當年都有好多人伏住收音機聽阿雪(彭羚)同阿哲(郭富城)嘅愛情故事,冇聽過劇都一定有聽過呢首歌。

完全因你
https://www.youtube.com/watch?v=fuKPx3_xVPE
電影《和平飯店》主題曲。頭30秒由彭羚清唱,已經充滿張力,直至去到「多得你用心再造我」,抑揚頓挫處理到位,震撼不少樂迷心靈。

小玩意

一講起個歌名,已經直接聯想起「結婚」,Cass sweet到爆嘅演繹,真正係用自己方法,將呢個甜蜜愛情故事用歌聲表達出嚟,聽佢唱呢首歌完全係聽覺享受!因此亦順理成章成為不少情侶婚宴必用歌曲。

漩渦
https://www.youtube.com/watch?v=uayFdlXnk2k
唔知呢首係唔係大家唱K嘅鐵膽合唱歌?明哥同Cass用最輕柔聲線唱出纏綿感覺,氣場正到爆,感覺好似同佢哋捲咗入個漩渦。事隔多年喺YY Concert上再合唱,水準依舊,精彩!

彷如隔世

「記不起 當天怎相戀已是謎,如像隔世 今天竟找不著話題」完全準確唱出情侶分手多年再重遇嘅失望心情。如果將「成世人流流長,總會愛上幾個人渣」呢句說話變成一首歌,大概就係咁……

仍然是最愛你
https://www.youtube.com/watch?v=X8dYClcGu1E
1994年一齣電視劇《再見亦是老婆》hit爆,因此呢首主題曲亦播到街知巷聞。睇返呢個MV,如果當年有萬千星輝頒獎典禮,陳秀雯應該會係視后(錯focus……)。

愛過痛過亦願等
https://www.youtube.com/watch?v=Yz0yM3QG98s
彭羚一出道已經走實力派路線,亦唱咗唔少英文改篇歌,愛過痛過亦願等係其中之一。「嬌滴滴細細粒但其實好唱得仲係巨肺」type女歌手,佢先係始祖!

無人駕駛

Cass婚後作品,用上溫婉甜美聲線演繹,聽完心靈感到溫暖~ 如果有種聲音叫女神,應該就係咁樣。

我有我天地
https://www.youtube.com/watch?v=Fgs2Bn-utVk
唔知有幾多人記得?呢首係信用咭廣告歌,當年每日總會聽到一次,但都唔會覺得悶,以前啲廣告歌,真係好好聽……

我知…… 彭羚 仲有好多好好聽嘅歌,不如大家又分享下最愛邊首~

你可能也喜歡

Recommended