周柏豪突然添丁生仔湊夠好字 老婆Stephanie 真面目獨家曝光！

原文刊於：《東方新地》娛樂組●採訪、攝影：攝影組●設計：美術組

當年天王劉德華秘密收埋女友朱麗倩，結婚生女亦唔公開，可以話係娛樂圈經典，時移勢易，藝人拍拖結婚生仔鍾意開心share，不過都有例外例子周柏豪。
周柏豪突然宣布再做老竇，在社交網公布喜訊，「我家弟弟剛剛誕生，弟弟重7.5磅，也是戴著黑色冷帽出生的小子，聲音的洪亮級數也能媲美姐姐」，周柏豪並公開感謝太太為家庭的付出﹗

周柏豪貼出三張相分享再做老竇的喜悅，分別是他抱住BB、BB小側面及周柏豪望住剛出世還在氧氣箱中的囝囝，全部都看不見囝囝的正面，不過見到頭髮相當烏黑及濃密﹗周柏豪留言感謝太太

真的真的辛苦太太了
一直要照顧家庭和芯悦 身體同時也要孕育弟弟
這種身心內外兼顧的耐性
實在是母親獨有的超能力
看著自己的小孩子
明白父母的愛從來都是無條件的
不期望將來日子如何 怎樣報答
只希望能把他們照顧好
能讓他們健康快樂 好好成長
這就是父母的心願和終生的責任
感謝我們的父母
感謝愛我們的人
感謝保佑

經常強調要保護家人的周柏豪，同女友Stephanie長跑十年先結婚，一直將女友收收埋埋更自稱單身，Stephanie廬山真面目和背景相當神秘，直至14年在叱咤頒獎禮連掃多個大獎，柏豪才首度在台上公開多謝女友:「感謝你陪我長大，經過好多難關，我會跑快些，跑到我們的終點，我愛你，多謝你的耐性！」被柏豪盛讚有耐性的Stephanie，更非常賢淑能。

周柏豪節目爆房事：我同太太十幾年，每晚都拖住瞓

周柏豪同袁偉豪兩個識於微時的好友，年前合作拍攝的節目《兩個小生去Camping》中，「雙豪」除了鬥騷肌、鬥煮藝、鬥膽色之外，更來個深情剖白，周柏豪更激罕自爆同太太由拍拖到結婚一起十多年，到現在女都生埋，但每晚仍然拖住手仔瞓覺﹗

周柏豪話因為平常不能夠正常拍拖咁拖手仔，呢啲親密動作只能留在家中，柏豪話：「我哋要拖手嘅時間就係瞓覺嗰時，我都同佢講喺街先幾個鐘，但瞓覺八個鐘都可以拖住﹗所以我同太太到依家都仲係會拖住手瞓覺﹗」袁偉豪即抵死問：「你肯定八個鐘？」柏豪即笑笑口話：「有時起身痾夜尿，七個半鐘啦﹗」

周柏豪自爆想著西裝迎接女兒出世

周柏豪除了首度公開同太太的冧豬事，仲剖白初為人父的心情，柏豪同Stephanie（朱敏君）拍拖十年、16年結婚，另一半的真面目更是相當神秘，19年尾，老婆Stephanie為他誕下6.7磅小公主，初為人父的周柏豪喜獲女兒相當興奮，但老婆靚樣繼續絕跡他的社交網。柏豪於節目大爆陪太太入產房時相當緊張，為此前一天專程去剪髮，佢又話：「我真係諗咗好耐著咩衫入產房，前一日仲特登剪咗頭髮，啲朋友同我講：『入產房要戴浴帽㗎』。我有諗過係咪著套西裝入去見個女，但係其實要著保護衣，最後揀咗件粉紅色衫，因為係囡囡嘛。」

周柏豪秘婚因有偶像包袱

「雙豪」第二集繼續晚上談心，二人邊睇《使徒行者2》邊吹水，周柏豪透露拍該劇時印象特別深刻，因為：「嗰時拍拍吓去咗結婚，但又唔可以畀人知﹗」袁偉豪問佢有冇諗過自己結婚後會令粉絲嘅幻想破滅？柏豪想也不想答：「係㗎﹗嗰陣時啱啱加入電視台，我都會諗啲投資者投資喺我身上，會唔會都諗點解我一直冇講結婚呢件事呢？我會有呢啲咁樣嘅顧忌，但係最後好彩大家都接受咗呢件事，或者歌迷都會好鍾意我嘅屋企人。」

獨家捕獲！柏豪護妻Stephanie出巡

其實專登請假一星期陪老婆生B的柏豪，自從老婆Stephanie陀B已減少工作爭取時間陪實照顧，早前，《東方新地》便獨家捕獲柏豪護妻Stephanie出巡，周太廬山真面目極罕曝光，當日二人一齊返回觀塘寫字樓，快生產的周太，得天獨厚完全冇水腫，離開時柏豪一個人抽住兩大袋服裝，不用老婆操勞，更小心翼翼傍實老婆上車，多功能老婆收服廿四孝好老公，幸福畫面羡煞旁人！

現場所見，Stephanie的確得天獨厚，即使就嚟生得仲五官輪廓完全冇走樣，就連手腳都冇水腫。