39歲胡定欣素顏直擊 出巡九龍塘享受單身生活 簽邵氏廣告女王

原文撰寫：東方新地 ｜ 圖片來源：東方新地

直擊胡定欣寡女生活素顏出巡九龍塘

現場所見，胡定欣先到商場內的食店醫肚，只花十五分鐘快食了一碗豬扒麵，然後下一站去逛家品店，見她主力搜購床單被鋪及客飯廳用品，似乎是為布置新居，一個人行了個半鐘，胡定欣拎住兩大袋戰利品離開，駕車返回港島南的香閨。

簽邵氏再發圍做廣告女王

兩年前拍完劇集《同盟》與《包青天再起風雲》後，胡定欣表示體力透支好大，想休息一下，隨即暫停拍無綫劇向外闖，拍了電影《逆流大叔》即獲電影金像獎提名「最佳新演員」，又與馬浚偉合演舞台劇《偶然．徐志摩》，視后變電影及舞台劇新人，對胡定欣來說非常有新鮮感又可以挑戰自己，有傳本來已有離巢之意的她，希望可以拓展電影市場，甚至盛傳會簽古天樂的娛樂公司，發展大計一大堆，不過無奈因疫情關係而外闖夢碎，不想原地踏步的胡定欣，最終被邵氏電影執行董事及總經理樂易玲以誠意打動，簽約邵氏並落實以部頭形式參演無綫重頭劇《白色強人II》。雖則有高人指點向南移有助感情運，不過胡定欣唔係開工拍劇就去練跑，哪有時間搵對象談情？

胡定欣投海景屋增強愛情運

向來篤信風水命理的胡定欣，近年在好友黎耀祥介紹下認識了隱世高人苗師傅，苗師傅為人低調，是娛樂圈人包括古天樂、張智霖、袁詠儀、黎耀祥、陳豪等御用的風水師。有傳經他指點，只要跟足師傅吩咐擺陣，好快就見效，所以大家都愈搬愈豪，愈住愈富貴。不過苗師傅並非話見就見，亦不是來者不拒，他只為有緣人睇風水命理，亦無特定要收多少酬金，不過搵得苗師傅的圈中人都唔會出手低。

據知胡定欣早前為了急救姻緣求見苗師傅，知情者透露：「定欣一直都住將軍澳區，師傅話嗰度會旺佢事業運但姻緣會好差，如果想快啲有拖拍就要搬去香港南區近海嘅地方，間屋望到愈多水愈好，咁樣會更加催旺桃花運，事業同姻緣都會好。定欣幾乎所有老死都住將軍澳同西貢區，其實都好掙扎，不 過為咗終身幸福，佢梗係搬啦！最終佢喺港島南區搵到個望住無敵大海景嘅單位，嗰度係豪宅區，住客都非富則貴，增加遇到筍盤嘅機率。以前定欣對結婚生仔都好有憧憬，成就愈高就對另一半要求更高，但又想好似好姊妹胡杏兒咁一搵到Mr.Right就快速拉埋兼生仔，都真係幾矛盾，定欣出年就40歲，佢好鍾意小朋友，唔想做高齡產婦。」搬屋後胡定欣更上一層樓，雖然Mr.Right仍未蒲頭，但她即告別效力十八年的娘家無綫，落實簽約邵氏在事業上再搏殺。

等足大半年堅持不改名

早前胡定欣與黎耀祥及曹永廉等一齊接受訪問，提及以風水命理增強運勢，她直認不諱表示為了搵師傅指點迷津等了大半年，不過她對改名轉運非常抗拒，她說：「我搵師傅唔會一嚟就問感情，桃花運即係觀眾緣，我會問佢點樣可以提升觀眾緣先，工作問完之後先問姻緣，師傅都叫我唔好要求咁高，呢啲都係做人小道理，係一種提醒。都有師傅話我個『欣』字有個欠字會爭啲，但我冇諗過改名，個名係長輩改嘅，唔會輕易改。」