原文刊於：東方新地| 圖片來源：影片截圖、各藝人Instagram

12位轉型做YouTuber藝人

楊千嬅6,700訂閱仍需努力

抗疫非常時期，楊千嬅反而搞作多多進取過人。繼製作經年個人紀錄片終於拍成舉行首映，亦宣布個人YouTube Channel 正式面世，仲自己做埋「 煮 」持每集打人情牌請嘉賓，自製煮食清談節目，不過仲係剛剛起步，訂閱人數未過萬。

鄭中基搞笑風格吸13.1萬訂閱

近十年愛上攝影，鄭中基早前已經有將個人作品放上網開心 share，今年三月趁著疫情大部分工作停擺之際，索性正式開設個人YouTube Channel，除咗攝影作品，其實更多係個人搞鬼日常、扮工度日、娛樂圈奮鬥回憶史，獨門搞笑風格半年已經吸納過十萬訂閱者。

周柏豪男神擁16.2萬訂閱

男神柏豪都早於舊唱片公司已經開始經營個人YouTube Channel， 早
期出新歌發布 MV，近日題材愈嚟愈廣，有得跟男神去開工、去出 trip，甚至以副駕視角一齊遊車河，當堂拉近晒距離。

G.E.M. 鄧紫棋最高點擊 MV 超過兩億

有名你叫紅到上天際、名副其實係「 國際 G.E.M. 」，G.E.M. 鄧紫棋唱腔係國際腔，亦都比其他本地藝人更早行國際線，一早已經悉心經營個人頻道、定期出Vlog、又作為新歌MV首發平台，所以至今訂閱早已超過二百萬，最高點擊 MV 超過兩億。

雨僑扮靚美容吸19萬fans

雨僑（原名廖羽翹）拍過電影出過唱片，不過論經營得最長久亦係最成功嘅，始終都係扮靚美容做 KOL。一早儲落大批忠實觀眾，加上最近做埋媽媽，話題多咗持家湊女師奶經，訂閱者明顯又增多。

林芊妤教瑜伽教到百萬訂閱者

藝人明星幫仔女開公開帳號，少不免被網友指摘當正仔女係搖錢樹，所以林芊妤喺囝囝「 伯伯 」滿兩歲時都宣布停止更新，交番個社交網絡自主權畀囝囝。 其實Coffee 教瑜伽已經教到個人YouTube Channel有過百萬訂閱者，成績好過大把巨星名人。

衛詩雅娛樂圈中牌王擁11萬訂閱

做藝人嚟講衛詩雅真係夠晒勤奮好學，考齊導遊牌、船牌、各種車牌、中醫證書等，係娛樂圈中嘅牌王，做 YouTuber 衛詩雅一樣乜都會講吓，有搵食旅遊、煮食扮靚、藝人家居、連自己生活瑣事都可以講一餐，夠貼地夠包羅萬有，反而殺出一條血路，短短時間內訂閱人數已破十萬。

湯怡4.6萬人follow健身女神兼甜品女神

一早成為IG 健身女神兼且甜品女神， 其 實 湯 怡 開 個 人Channel 開得算遲！開台後專心自己最擅長嗰兩瓣，除咗Cooking Kaka 教煮講食又請圈中朋友一齊玩一齊食，亦有WFH（Workout from Home）啱晒抗疫 timing。

陳智燊夫婦擁13.4萬訂閱收入大增

形象健康、能言善道，所以陳智燊同宋熙年係少數轉型做全職 KOL 後，收入仲遠遠多過電視台年代嘅藝人。兩公婆曾經被直擊出 job 拍片，陳智燊負責器材拍攝、宋熙年扮到靚一靚介紹產品，兩公婆口齒伶俐形象討好大受品牌歡迎，有指高峰期一個月搵超過六十萬收入！一唱一和最後再補張恩愛相 shot 做結尾，專業熟手自然受客戶歡迎，亦吸引大批粉絲訂閱。

陳茵媺live講bedtime story吸1.4萬粉絲

三年抱三、一個湊三個、面面俱圓，仲要擠到時間出嚟畀老公陳豪過二人世界，其實大把人希望陳茵媺分享人妻人母持家有道個人心得，而陳太喺上個月終於都開咗個人 YouTube Channel，小試牛刀先同班小朋友玩live講講bedtime story。

戴祖儀與4.5萬訂閱者開 live 互動傾偈

簽約星夢之前，戴祖儀已經係街頭藝人同獨立歌手，運用網上資源為爭取曝光、吸納粉絲早有自己一套，建立個人 YouTube Channel 後，順理成章可以通過平台發布自己新歌新動向，亦有得開 live 同粉絲互動傾偈。

童顏唐寧擁1.7萬訂閱者

一向喺個人IG都有分享養育一對仔女嘅單親生活，亦有分享素食有營健康生活，永遠保持正能量仲有一張娃娃臉嘅唐寧，最近都將平台移師到YouTube上儲埋一班忠實觀眾，最新短片係一向煮得嘅佢實測鬼佬教炒飯到底work唔work。