賤男

劈腿偷食家暴通通齊!盤點10個娛樂圈世紀賤男

娛樂資訊

廣告

34歲周永恒 (Roy) 藏毒家暴外遇乜都衰過,被網民封爲賤男,佢自己亦自認係人渣,不過賤男依然有女吼,近日仲入紙申請結婚㖭!講開周永恒,其實以往都有不少劈腿、甚至棄糟糠的賤男,同樣令人咬牙切齒!以下十個娛樂圈賤男你要看清楚!

撰文:東方新地|圖片:新傳媒、Instagram、微博|原文:東方新地|編輯:Casey

渣男周永恒入紙再婚

周永恒日前在網上被曝出一張「擬結婚通知書」,女方係細佢兩歲的內地女友陳𦾡 (Britni),雖然周永恒過往劣績斑斑,但未婚妻仍對佢痴心一片,喺即將結婚的消息曝光後,即晒出甜蜜婚照放閃護「夫」!

周永恒去年底同前妻趙頌茹正式辦好離婚手續,半年後就入紙申請再婚,未婚妻陳薇在婚事曝光後,即上載與周永恒嘅婚紗照,相中佢從後攬住老公,甜蜜表示:「可能我揀咗一條最艱辛嘅路,但無論如何我都會喺你身邊支持你,陪住你行落去。」

而Roy則貼上陳奕迅〈任我行〉部分歌詞:「曾迷途才怕追不上滿街趕路人/無人理睬如何求生/頑童大了沒那麼笨/可以聚腳於康莊旅途然後同沐浴溫泉/為何在雨傘外獨行」。

盤點十個世紀賤男

講開周永恒,其實以往都有不少劈腿、甚至棄糟糠的賤男,同樣令人咬牙切齒!以下十個賤男你要看清楚!

1. 極級人渣 周永恒

自認係人渣的世紀賤男周永恒與趙頌茹在2010年結婚,育有兩個女兒,不過年前爆出Roy搭上同公司拍檔、港視小花劉依靜(Ruby)!同時人渣Roy家暴阿Yu,又出口話要離婚同爭撫養權;更登阿Yu娘家家門,吐口水用粗口辱罵外父外母,並以WhatsApp恐嚇殺死妻女及自殺,涉嫌刑事恐嚇被拘捕,最後法庭裁定普通襲擊罪成,大快人心!

Roy偷食打老婆恐嚇咩都做齊,前年上ViuTV節目時疑不滿兩位女士不斷提及佢打老婆同有外遇等事,更嬲到爆粗起身走人!

阿Yu現時獨力照顧兩名女兒,一家三口過着幸福新生活!

而對於周永恒再婚,阿Yu話冇回應。

有報應!劉依靜暗指陳庭欣做小三

講開劉依靜(Ruby),近日佢曝光率奇高,原因係佢之前有個擁過億身家的彩豐行老闆楊振源(Benny),但Benny現時正同TVB姐仔拍拖,所以陳庭欣被指做「小三」搶人男友!所以唔少網民都話,劉依靜「剃人頭者,人亦剃之」……

2. 專食空姐 李潤庭

《東張西望》主持李潤庭與任職空姐的太太Crystal Wong於2011年結婚,不時在網上放閃,給人顧家好老公的形象。不過李潤庭2016年時卻被爆趁任職空姐的太太外出工作時,與小三在赤柱街頭親熱,狂摸對方Pat Pat之餘又公然激吻,偷食都唔識「東張西望」!

早喺結婚五周年紀念時,李潤庭在網上大晒與太太的恩愛合照,不過慶祝翌日就被影到帶小三回家!

 

新聞一出,李潤庭即時被瘋狂鬧爆,疑似小三身份亦迅速曝光!據知小三Tiffany已是一名人妻,育有一對仔女!消息指Tiffany老公家境不裕,兩人婚後住在元朗的豪宅區,出入更有司機接送,生活無憂!更爆的是,原來小三結婚前,竟然係與正印Crystal同一間公司的空姐!

即召開記者會

李潤庭返電視城被照肺,隨即召開記者會交代事件向家人、太太及受影響的人道歉。他說這件事完完全全係佢一個人嘅錯,所以覺得自己應該行出嚟一力承擔。

離婚 分房瞓

事情發生後,佢話老婆對佢只有「失望同傷心」。被問到會唔會離婚,佢就話自己完全沒有選擇權,因為自己錯晒,要讓老婆話事。而自己喺呢一刻絕對尊重老婆決定,話佢可以選擇離婚或者繼續在一齊。而在記者追問嘅情況下,佢先答老婆呢一刻嘅決定係離婚,而兩人雖然仲一齊住,但就冇講嘢,而且係分房瞓。有記者再次追問有關小三Tiffany嘅事,問佢識唔識何生(即Tiffany老公),佢就即時起身拆咪離開記者會。

3. 羽壇賤男 林丹

外號「超級丹」的中國羽毛球好手林丹,與前中國羽毛球代表的太太謝杏芳被稱為羽壇的「神鵰俠侶」,謝杏芳今年11月4日更為老公誕下麟兒,一家三口樂也融融。直至11月17日,林丹被爆在太太懷孕期間與2009年環球旅遊中國小姐冠軍趙雅淇到酒店密會!

林丹在房中攬實女方纖腰,更輕拍對方屁股,全程被斷正!老婆懷孕期間偷食,林丹你對得住芳芳嗎?

老婆原諒

事後謝杏芳選擇原諒林丹,神鵰俠侶重修舊好,兩人喺網上繼續不時放閃!

謝杏芳與寶貝仔~

4.疑似賤男鄭俊弘

鄭俊弘 (Fred) 在大台默默耕耘多年,直至13年在《星夢傳奇》後終於人氣急升,更在劇集《與諜同謀》同視帝羅嘉良合作。17年就被發現與合作無間的歌手何雁詩暗中撻着,男方更不時在女方大埔豪宅度春宵!

拍節目撻着

何雁詩與日韓混血兒男友Wataru分手後,一直都未有新戀情,直至跟Fred一同出埠拍攝無綫節目《這個冬天不太冷》,朝夕相對下擦出愛火!打得火熱的兩人更主唱劇集《我瞞結婚了》主題曲〈真心真意〉,拍MV時頻頻當着工作人員面前打情罵俏。另外Fred又不時去到女方位於大埔滌濤山的豪宅度春宵,更因為試過太嘈吵而被鄰居投訴!唔知玩咩玩到咁嘈呢?

鄭俊弘 有個富貴未婚妻

阿Fred同何雁詩兩人都係上位中的大台藝人,形象健康,愈來愈多機會喺不同劇集亮相,似乎有機會成為另一對受觀眾認同的情侶藝人!不過後來有報道大爆,其實阿Fred有個已經收埋三年的富貴女友,佢更在15年向女友求婚成功!女方一家無論生活定感情上都對阿Fred照顧周到但男方就唔知足去偷食,搞到何雁詩做咗第三者!

旅行女家俾錢

既然阿Fred同Beebs都打算結婚,女方家人都當正佢係女婿一樣,每次一齊家庭旅行唔係坐頭等就係商務客位,就算係旅行使費,對方都唔會問阿Fred攞番;而近年沒有工作的Beebs亦專心替未來老公打理家中大小事務,由飲食到愛犬都照顧得無微不至,似乎係個賢妻喎!

Uber出事

不過去到17年2月時,情況開始有變,阿Fred同何雁詩拍完〈真心真意〉MV後,突然對Beebs態度有變、忽冷忽熱。一晚阿Fred相約未婚妻到自己愉景灣屋企玩煮飯仔,本來話自己會9點返到,點知最後話要開會搞到凌晨四點先到家,女友一早已經瞓咗。翌日Beebs如常替阿Fred處理單據時,發現對方開咗個新Uber戶口,見到佢凌晨3點由大埔滌濤山去中環碼頭,付款人仲係一個「Stephanie Ho」開頭的戶口!

發火刪除訊息

據知Beebs即時大興問罪之師,不過阿Fred不斷強調同何雁詩只係朋友,而Beebs亦一時心軟原諒對方,之後更煲咗愛心湯去男友愉景灣寓所。點知Beebs當時就發現阿Fred冧滋滋咁同何雁詩講電話,於是要求Check電話,阿Fred見事敗就即時大發脾氣話唔俾,仲delete晒自己同何雁詩的Whatsapp紀錄,不過同何雁詩的大量通話紀錄就仍然喺度。吵完大鑊後,據知阿Fred最後承認係鍾意咗何雁詩,而Beebs亦終於睇清未婚夫的真面目!

公開戀情

事件愈鬧愈大後,鄭俊弘喺老闆何哲圖陪伴下見傳媒,先表示跟未婚妻已分手,並澄清同何雁詩只係朋友關係。但翌日事件峰迴路轉,兩人突然十指緊扣現身機場,公開戀情,你講晒啦大佬?

被封為「世紀賤男」Fred和「 好勝小三」何雁詩,兩人高調示愛後形象瘋狂插水,網民群起鬧爆。

 

5. 賤男導演 彭順

2014年5月,彭順背太太李心潔於圓方與o靚模李悅彤(Liddy) 密會,期間兩人肆無忌憚當眾拖手、啜嘴、搣胸、搭膊、攬腰乜都做齊,偷食斷正,彭順被網民鬧爆兼狂插係賤男。醜事曝光後,彭順即飛往馬來西亞箍煲,有傳心潔得悉事件後傷心痛哭!

又係老婆原諒

最後彭順與心潔就事件一起作出回應,而心潔最終選擇原諒老公,兩人和好如初。之後彭順都好似修心養性,李心潔更為老公誕下一對孖仔,二人不時在網上大晒cute 爆仔仔。

心潔為老公誕下一對可愛孖仔,哥哥叫彭濟雲,弟弟則叫彭子然,一家四口樂也融融。

6. 超級冇品 魏駿傑

魏駿傑1998年與滕麗名拍《陀槍師姐》撻着,人前人後都好似兩公婆咁,情侶關係一直維持至2007年中,二人正式分手。當時圈中人都覺得好奇怪,原來魏搭上比自己年輕廿載的重慶女子張利華,翌年更火速跟張利華結婚生女。

後來滕麗名爆魏駿傑婚後用短訊求復合,背妻再想搞前度,冇品王仲唔係你?!

不過早年張利華就被爆與前港隊單車名將鄧宏業暗中撻着,兩個人撐完枱腳去散步,男方幫張利華拎手袋仲攬埋腰,似乎關係匪淺。雖然兩夫妻曾因此事吵大鑊,不過之後佢哋已經和好如初,魏駿傑更豪擲千七萬購入獨立屋送俾老婆!

7. 劈腿色狼 郭政鴻

滕麗名與冇品王魏駿傑甩拖後,於2008年被爆與郭政鴻拍《桌球天王》演情侶,啜出真愛。當阿滕以為搵到個好男人,兩人發展迅速,成為公認一對,但原來男方一直呃住阿滕結咗婚重生埋女,阿滕又被蒙在鼓裏,自己做咗小三都唔知!直至2010年9月被傳媒影到,阿滕才知道又愛錯人。阿滕2013年時跟圈外男友朱建崑結婚,終於覓得如意郎君!

現時做個好爸爸

8. 拋妻賤男 陶大宇

一代師奶殺手最後都係因偷食而搞到身敗名裂!陶大宇同拍拖多年的太太黃寶慧搞離婚,當年盛傳介入做第三者的就係「狐妮」郭羨妮!大宇為咗呢段情放棄大好形象,成為負心賤男,可惜最後都分手收場。

最離奇係大宇曾再翻撻前妻,過住「兩公婆」嘅生活,更加衰到「o趙完唱」,指郭羨妮係娛圈蕩花,呢啲反轉豬肚的行為,各位女士,認清呢種賤郎啦!

郭羨妮一家三口好幸福

而郭羨妮則於2011年下嫁內地武指朱少杰,育有可愛女兒Kylie,一家三口好幸福~

9. 扮好男人 羅嘉良

03年羅嘉良轉投寰宇,北上大陸發展,夫婦聚少離多,感情進一步轉淡,撈家決定分居,並在08年初辦理離婚手續,正式結束28年情。有傳當年離婚係因第三者介入,撈家雖然否認,但相隔半年,撈家就宣布跟內地演員蘇岩將於九月結婚後誕下女兒,佢覓得第二春就開心,但有報道指前妻生活為供樓同養仔,一份炒蛋多士分開兩餐食,慳得就慳。

前妻大戰現任

據知在內地狂賺人仔的撈家,被老婆蘇岩要求舉家遷居香港,令一直唔想現任和前妻方敏儀同在一地的他左右做人難,當年再婚喺北京搞,就係唔想影響兩個家庭。而上年兩任太太更在網上隔空互片,火花四溢﹗

羅嘉良主演的百集長劇《創世紀》重播時,帶動長駐內地的撈家人氣回升,不過同時卻觸動前妻方敏儀神經,在社交網貼出多段留言,「怨恨是一杯毒酒……用別人的錯誤來懲罰自己,是一件非常愚蠢的事情……快樂過自己的人生,就能贏多少人心」、「生活不容易,還是要堅強的活着」等,矛頭直指當年被指介入羅方婚姻的第三者、羅嘉良現任太太蘇岩!

同一時間,蘇岩在微博激憤留長篇文字「我從不抱怨、時時感恩,不跟別人計較,……輸贏我想無須評判,也不必評判」。之後連續數天,方敏儀連環貼文回話「激怒你的人不能再激怒你」、「人生珍貴不是得到或擁有,而是能把握幸福」、「人生如夢,得也好,也只不過是過眼雲煙」似指對方要好好握住眼前幸福,因為一剎那光輝唔代表永恆,只是過眼雲煙,句句言之有物。

蘇岩則以「我有個好男人,愛我心切的女兒」用老公羅嘉良同囡囡詠婷來大晒幸福,夭心夭肺,言詞直插老公的前妻方敏儀。

10. 淫狼代表 陳浩民

陳浩民2011年時被《東方新地》拍到於橫店拍劇時藉醉狼吻陳嘉桓,又對佢上下其手,以致要攜即將臨盆的太太蔣麗莎開記招,聲淚俱下向陳嘉桓道歉!

在眾目睽睽之下,陳浩民硬拖着大肚妻子蔣麗莎上演大龍鳳不特止,短短7分鐘記者會中,浩民一哭二鬧三鞠躬四道歉,臨走時還作狀發軟蹄,要大肚妻攙扶,結果扮死狗失敗,更被網民罵個體無完膚!

悔改做好老公好爸爸

事過境遷,蔣麗莎好好生養,為陳浩民先後誕下三女一子,希望陳浩民真心悔改做個好老公好爸爸!

月租10萬天池屋

陳浩民早年已在國內崛起,去年中全家由紅磡過千呎複式單位,進駐月租10萬的何文田半山壹號的天台特色泳池屋。

全家得閒就喺天台游水,奢華到不得了…

你可能也喜歡