盤點12位圈中過170cm高妹藝人：余香凝擁逆天長腿、呂慧儀與張景淳只差1cm

原文刊登於：東方新地｜圖片來源：東方新地

12位圈中過170cm高妹藝人

劉佩玥174cm

高大有台型所以一入無綫機會不斷，其實劉佩玥媽媽都選過港姐㗎，1985年謝寧、周海媚嗰屆，不過媽咪就得162cm，嬌小得多。

呂慧儀177cm

選港姐年代已經一枝獨秀成為大熱，入電視台後又挾住長腳蟹之名入晒屋嘅呂慧儀，其實前夫黃文廸同現任緋聞對象張景淳嘅身高，都係同佢爭1cm咋！

余香凝174cm

人生得高又特別顯得有氣質啲，所以余香凝出道即被冠以文青女神，今年女神結婚了，腳長長著乜都咁靚。

林淑敏173cm

女人生得高大亦畀人感覺強悍，所以林淑敏喺《愛‧回家之開心速遞》扮演大小姐一角，都特別入型入格，因此人氣暴升。

陳嘉桓176cm

16歲已經拍戲做model嘅陳嘉桓，當時已經有176cm，高過好多哥哥姐姐。高人一等仲有個好處，陳嘉桓話早前因為太為食而肥到高達磅，不過都係睇唔出。

戴祖儀173cm

另一位高妹戴祖儀都係從小打籃球，打出高䠷健美好身材，讀書時代已經係籃球校隊，入行都有繼續打㗎，約埋緋聞男友羅天宇一齊打囉！

陳曉華173cm

18年當選港姐冠軍，連拍 《迷網》 、 《七公主》 、 《食腦喪B》三套劇後，仲獲派擔任新劇 《異搜店》 女主角，高妹機會真係多啲。

謝芷倫171cm

曾喺 《愛‧回家之開心速遞》中扮演大小姐秘書嘅謝芷倫，身高都超過170係高妹一名，原來除咗彈琴、教芭蕾舞外，謝芷倫中學一直係田徑隊中堅分子，難怪身材好過人。

劉穎鏇176cm

16年港姐冠軍劉穎鏇23歲青春無敵，陽光笑容又極具感染力，難怪拍劇機會多多，備受無綫力捧。點解生得咁高大？皆因佢5歲就開始打波，仲係籃球健將㖭！

蔡嘉欣172cm

生得高䠷又做開KOL對慣鏡頭自信爆棚，所以蔡嘉欣選港姐時係大熱，選完仲快過三甲簽約無綫，極速被安排拍劇同做 《姊妹淘》 主持。

曾淑雅174cm

外形甜美又陽光，再加上手長腳長身形標青，曾淑雅憑《3日2夜》成功入屋，話題新劇《香港愛情故事》 都有佢份。

陳楨怡174cm

今屆港姐亞軍陳楨怡由參選至今新聞多多，其中一樣就係現任富家子男友Andy係戴祖儀前度，Andy更被踢爆一向對長腿高妹情有獨鍾。