不一定農曆七月先見到「好朋友」！17位明星電台﹑酒店﹑電視城鬼故靈異實錄

Q: 有什麼Netflix、Disney+推薦及必睇劇集？

為大家整理一下截至目前為止小編追過的Netflix影集清單， 必睇Netflix電影或劇集片單 ；Disney+方面，則可以一看 電影片單推介 。

Q: 有什麼必睇劇集？

不少美劇都被稱為神劇，小編整合了一系列必看 美劇推介 。當然，不少得 韓劇 、 陸劇 、 台劇 及 BL劇 推薦。

Aug 31 2020

明星不時要出國到不同地方工作，又成日工作到到三更半夜；另外，電視台錄影廠地方大暗角多、演藝行業屬偏門禁忌又多，拍攝題材包含生死亡靈踩界也不少，新鮮熱辣就有李施嬅深宵刨劇本撞鬼事件！趁住踏入農曆七月鬼門關大開陰氣至重，以下集合了17位明星演員跟大家分享在電台﹑酒店﹑電視城等地以及拍劇期間曾遇過的怪事！

撰文、圖片：東方新地｜編輯：Cyan｜原文刊於：東方新地

17位明星電台﹑酒店﹑電視城鬼故靈異實錄

1.李施女華刨劇本撞冇面女鬼

去年大熱的《金宵大廈》叫好又叫座，自然食住個勢原班人馬拍續集。劇情奇幻、造型復古、拍攝場地都專揀歷史悠久古舊地方，因此怪事連連。第一輯拍攝時陳山聰爆 PA 見到白影飄過，今次續集女主角李施嬅夜半獨自刨劇本歎杯紅酒影張相，酒杯上驚現冇面「姐姐」倒影，李施嬅日前在IG 分享靈異相片，新鮮熱辣，不少網友睇過後大呼心寒！

2.歐陽震華被拍大髀

男休息室的受嚇者還有歐陽震華：「有次日頭未夠鐘入廠，就去咗男藝員休息室瞓覺。點知突然畀人拍醒，我好清楚聽到一聲大力拍大髀嘅聲，紮醒咗見到冇人、自己又唔郁得，可能夠鐘入廠，嗰啲嘢想叫醒我！都聽過有工作人員話有細路仔嘛，但我就未見過，嗰次之後都冇再入過去，咪搞！」

3.滕麗名移形換影

當年《真情》劇組拍攝的舊清水灣電視城6號錄影廠出名位置最入、最陰森，6廠女廁更加是全城「陰中之陰」，好多藝員都避之則吉，不過當年新加入劇組的阿滕有次人有三急，惟有硬住頭皮衝入去6廠女廁解決。該女廁共有4格、4個洗手盆和4面鏡子，明明就近選擇了第一格廁所解決，出來用第1個洗手盆洗手，滕麗名話洗手時竟然發現自己個樣出現喺最後一塊鏡中，嚇到標冷汗！

4.姚子羚撞冇腳女鬼

03年拍攝《棟篤神探》夜戲，姚子羚試過一個人在化妝間，但就見到另一個灰色 T 恤長髮女仔：「驟眼睇佢唔似藝員，又唔似化妝阿姐，以為係生面口臨時演員。我冇理就瞓一陣，突然感覺寒風陣陣，我就紮醒咗，跟住我支唇彩跌喺佢附近，我去執時唔見佢雙腳，起初我以為佢雙腳瑟縮喺凳上，我睇真啲，佢冇腳之餘，原來個樣模糊到不見五官。當時我勁驚，即刻跑出走廊比較光猛地方！」

5.林峯被消失

男休息室係電視城中最熱門撞鬼地點，離咗巢的林峯都試過：「男休息室好邪門，試過有次入去瞓覺，唔明點解夠晒鐘 PA都冇叫醒我。點知佢話入到去見我唔到喎，咁邪！自此我就唔敢再入休息室瞓覺。」此外，林峯話佢在屋企都試過被鬼壓，還見到個人影同一陣煙、還要是講國語，好驚驚囉！

6.張家輝陰森口哨聲

張家輝亦曾於清水灣電視城遇上口哨鬼，事發於半夜時分，當時佢正於四廠趕拍劇集《騙中傳奇》，突然成組人聽到廠內傳出口哨聲，即使拍攝期間亦未停過，但拍完之後睇重播，卻聽不到之前嘅口哨聲，令在場所有人都毛管戙！

7.苗僑偉見鬼畀鬼責

電視城以外，有時外地拍劇入住酒店都好驚嚇，三哥苗僑偉話試過去馬拉拍劇，酒店廁所不斷傳出怪聲，令氣「冇覺好瞓」。後來補眠至下午四點，又被黑影壓住，動彈不得，嚇到佢當晚要同保鑣孖鋪壯膽。點知更可怕嘅事陸續有來，三哥瞓到第二朝發現保鑣不知所終，一轉身想起身的時候，又被鬼壓，更見到個衣衫襤褸嘅的伯伯踎在原先保鑣瞓的位置望住他！

8.鄭伊健八個人去九人返

一向大唔透又貪玩的鄭伊健，當年試過約一班幕後工作人員黃昏時分入電視城打 war game。八個大男孩在民初街玩完離場之際，領隊鄭伊健數人頭數來數去都係九個人，當時有人以為佢「玩嘢」嚇鬼，不過換著第二個數，又是數到九個人！另一次伊健在電視城等埋位期間睡在地氈上休息，突然有盞燈由高處跌正在他身邊。伊健事後表示：「發生意外後，有位有陰陽眼嘅同事話之前見有個著住小鳳仙裝嘅女人坐喺燈槽上，盞燈冇整傷我，可能佢同我玩啦，不過我以後入廠都唔敢唔拜神！」

locker門離奇打開

去年黎諾懿主持無綫節目《懿想得到》請來老友鄭伊健重遊電視城舊地，伊健提起舊時剛進 TVB，獲派locker鎖匙及當時嘅鎖匙號碼往事時，背後的 locker 門突然離奇打開，然後伊健又乘機分享舊電視城出名猛鬼，據悉該集播出後連高層都有微言話怕影響藝人心理。而黎諾懿就話男更衣室鬼古聽得多，不過自己就未遇過，今次係第一次親身感受 locker 門自動彈開。

9.吳卓羲目睹鬼上身

03年拍劇集《英雄•刀•少年》，吳卓羲剛剛成名擔正做男主角，捱更抵夜焗住在男休息室小睡，就出事了：「因為趕戲日接夜咁拍，我同成班訓練班同學都喺休息室瞓覺。點知瞓瞓吓，隔籬個同事突然講嘢，好似鬼食泥咁，但聽唔明佢噏乜，最恐怖嘅係佢把聲變咗第二個人把聲，跟住其他人都畀佢嚇醒，成班人驚到雞飛狗走！」另一次更驚嚇，大約凌晨三、四點同一男同事在休息室睡覺，看到有個細路喺門口方向走入嚟，但當時度門是關了的，他和男同事勁驚，最後合埋眼數三聲一齊衝跑出休息室！

10.黃宗澤房燈唔著又著

Bosco 有次去馬來西亞怡保拍攝劇集時入住酒店尾房，插入房卡後其中一盞燈一直未有著燈，當地保鑣察覺有異樣，就站在房門不肯入去。傻更更的 Bosco 不以為然行入房，隨即感到周身不聚財。直到佢行近床邊時，本來開沒開著的房燈又突然發光，Bosco 頓時回頭望一望保鑣知道不對路，嚇到立即離開房間，匆忙間還留低了行李！

11.蕭正楠與林夏薇攝錄機現雪花

為了拍攝劇集《十二傳說》，蕭正楠同林夏薇要去到新娘潭、達德學校等都市傳聞鬧鬼勝地拍攝，二人異口同聲話受環境同氣氛影響，拍攝全程都覺得氣氛詭異感覺好寒，明明電話收到訊號，但係攝錄機屏幕就離奇接收不到訊號，變了雪花。蕭正楠話：「以前啲儀器好少失靈，嗰晚熒幕受到干擾，大家都唔敢出聲，都幾怪異！」即使每日裝香求順利，但劇中演員韓馬利的老公去新娘潭探班時，不幸跣腳受傷，要休息幾個月呀陰功！

12.孫慧雪細路玩波子

孫慧雪都試過在《恐怖在線》分享親身經歷：「男休息室出名好猛鬼，好多男同事話見過有小朋友，我喺女休息室都試過！有晚拍到好攰一個人喺女休息室小休，突然間聽到有細路玩波子，嗰啲『啲啲啲』波子聲由遠至近到身邊，我即時彈起身全身毛管戙！又試過喺睡夢中突然聽到啪一聲巨響，原來身旁一張休息長凳喺冇人冇風嘅情況下自己倒下，所以我以後盡量都唔去呢間休息室。」

13.張敬軒誤闖兇宅

大家睇過恐怖片都知道，好多故事都是由一班人因為好奇心驅使，誤入一些人類不應該去的地方，然後遇上重重靈異怪事！原來歌手張敬軒小時候都有類似經歷，闖入一間大屋到處影相，之後先知出事！

歌手張敬軒小時候住在廣州，佢同朋友經常路過郊外一間品字形大屋，但發現間屋長期無人住，於是好奇下與朋友試過爬入屋睇！接住發現屋裏有好多神怪擺設，於是佢同朋友影相留念。

返到屋企後，佢將相機記憶卡放入電腦將相片放大，發現相片竟滿布白色一點點。起初佢哋以為係灰塵，但放大睇清楚先發現竟然每一點白色都係人的五官和咆哮的臉！嚇到佢即時將相片刪除，再也不敢踏足那間品字形大屋！

14. 狄易達電台遇鬼影怪聲

相信大家無論睇鬼片定聽長輩講，都會知道透過相機鏡頭，可以影到一些人類肉眼看不見的事物，所以每當遇到怪事，都有人會選擇用相機鏡頭去查個究竟。同時世上曾出現唔少靈異照片，都是人們影相後先發現相中多了不應該出現的朋友！歌手狄易達也試過！

這件事可能不少網民都知道。有一次狄易達去電台做訪問，DJ幫佢拍了一張相，然後放上微博。怎料不久後網友不停轉發，原來他們發現相入面多咗個人影，他知道之後都覺得好心寒！狄易達又話有時在直播室都幾驚，因為除咗自己同DJ之外就沒有其他人，但有時聽到些聲音，也不知是誰在說話。所以狄媽媽就會給他一道平安符佢放在銀包入面，仲教佢不要「亂諗嘢」，做人要光明正大就得！