獨家！落選港姐止步12強20歲賴琦媛疑當小三？搭上內地逾億肥叔 住豪宅百萬名車出入

文：東方新地｜圖片來源：東方新地、IG｜編輯：SIX

賴琦媛落選前醜聞一大籮拜金、整容、虛報學歷

賴琦媛在《香港小姐2020》首輪面試已經在網上豪言，Benz並非名車的賴琦媛寸嘴Ivy，參選港姐以來已被指拜金、整容、虛報學歷，黑歷史一大籮，賴琦媛最終十二強止步。但似乎參加選美並唔志在攞獎的賴琦媛，釣金龜先係佢人生目標。其實早在參選期間，已曾被影到有中佬駕車接送，更被拍到她在車廂內吸煙，又伸手將煙灰煙頭散出車外，相當冇品！

賴琦媛參選2020香港小姐回顧

20歲的賴琦媛身高165cm，是一名建築學系學生，被網友爆有名車接送面試，Ivy回應：「唔明名車定義係乜，我今日係call uber坐Benz嚟，如果Benz係名車，咁我係成日坐名車﹗」

當陸浩明追問甚麼為之名車呢，她即答：「法拉利﹗」樣子甜美的妹被指有點像譚凱琪。

賴琦媛止步12強落選一事更反問十萬個為甚麼

《香港小姐2020》網上投票進入最後階段，日前再篩走三名佳麗，下周一（24日）再篩走兩名，最後十名佳麗便正式進入準決賽，在上round被foul走的是非港姐賴琦媛，素來寸嘴，落選後在社交網爆大鑊，大控訴被人攻擊，對自己落選一事更反問十萬個為甚麼？明顯心有不甘。

而賴琦媛其後在社交網先多謝投票給她的網民，然後設立問答環節，逐一在IG回答，當有網民問不明她會被淘汰時，她回覆：「十萬個為甚麼會唔會答到呢個問題？」

有網民安慰她今次失敗不要氣餒時，她就話：「我唔認為今次係失敗﹗」明顯心有不甘，對於網民問題，她不改寸嘴，問她三圍時她答「天水圍南生圍大圍。」有網民關心她會否加入娛樂圈發展，賴琦媛就咁答：「我想發育多啲囉﹗」但就明言想自薦加入無綫節目《＃後生仔傾吓偈》，又話「希望將來再有機會喺電視見到我」。

賴琦媛極速搭上肥叔叔富商

出名拜金的賴琦媛，其實參選志不在攞獎，反而更在意藉選美作跳板埋富二代身，早在參選初期，賴琦媛已經被揭同李彩樺前度金融才俊潘啓翀拍拖，不過，賴琦媛參選即飛甩男友，充滿野心要更上一層樓，之後又被拍到有中佬以60萬名車接載出入，男人在身邊車輪轉，原來賴琦媛近日再極速換畫，成功釣上內地富貴肥叔叔。據悉賴琦媛與富貴肥叔叔認識不久已打得火熱，更極速進駐男方位於何文田的豪宅同居；不過，即使成功登堂入室，賴琦媛仍未坐正！有傳富貴肥叔叔早有家室，釣到金龜是福是禍仍是未知之數！

賴琦媛肥叔叔鬼祟法國餐廳撐枱腳

9月10日傍晚，本刊獨家斷正賴琦媛與年約四十的內地富貴肥叔叔，由男方何文田豪宅寓所出發，到中環歎法國菜，當晚身穿露腰裝襯短裙晒肉腿的賴琦媛，與肥叔叔步入位於石板街酒店二樓的法國餐廳撐枱腳，一吃兩個多小時，到晚上約九時半才結伴離開餐廳，青春打扮的賴琦媛跟在肥叔叔身後，未知是否怕畀人認到，兩人步出餐廳就刻意扮唔熟，一馬當先行在前面的富貴肥叔叔，更緊張兩頭張望，二人保持住兩個身位距離。不過，當行到去暗黑位置，賴琦媛和肥叔叔已極速變成連體嬰，攬到實行落石板街，然後一齊上肥叔叔價值百萬的LandRover座駕離開。

賴琦媛扮純純兔成功釣獲億萬肥叔叔

據知情者透露：「寸嘴Ivy好進取，未夠18歲已經好鍾意落夜場蒲，咪係想搵機會埋啲有錢人身，佢同肥叔叔都係近排先識，知道對方有米，已經好主動黐埋去，同肥叔叔九月頭先正式開始，冇耐已經搬埋入肥叔叔嘅何文田豪宅同居。」雖然成功進駐富商豪宅，不過賴琦媛仍未真正做女主人，有傳富貴肥叔叔早有家室，而且非常富貴，中港兩地合共擁有逾億物業，賴琦媛參選港姐已經醜聞一大籮，今次釣肥叔叔斷正！未知賴琦媛又如何拆彈？