譚杏藍自爆遇性騷擾經歷為#MeToo發聲 孫慧雪、張秀文都是受害者！

原文刊於：東方新地｜ 圖片來源：譚杏藍YouTube截圖、IG、東星圖片、新傳媒圖庫

譚杏藍自爆曾遇性騷擾為#MeToo受害者發聲

譚杏藍最近跟網友在IG互動，設下「秘密垃圾桶」問答環節，網民可跟她分享自己一個秘密，最後譚杏藍卻發現大部分秘密都是被性騷擾、性暴力的經歷，甚至乎目睹整件事卻不敢揭發此類秘密，令譚杏藍覺得不能再啞忍，決定把收收埋埋多年的秘密公開。

譚杏藍小學被長髮男揸下體

譚杏藍指不知是樣子還是校服關係，讀書時幾乎每月一次慘遭性騷擾，當時她大約11、12歲，放學與工人姐姐行回家途中，工人姐姐在前面，譚杏藍指：「當時遠處有個男人，遠睇已經有啲怪，長頭髮飄吓飄吓，就喺行過我同工人姐姐之間擦身而過嗰一刻，佢突然揸我下體，我當時畀唔到反應，呆咗企喺度，望後面佢已經走咗，工人姐姐一路行去前，嗰一刻覺得全世界冇人明白我咁﹗」

譚杏藍憶述小巴上被掃大髀

譚杏藍上到中學可以出夜街時，有一晚坐小巴回家時因太累睡著了，突然感到有人掃她大髀，譚杏藍直言：「感覺到有隻手上下掃我大髀內側，好在冇上到去三角位，我唔識點做，唔敢擘大眼，只係繼續扮瞓覺，終於佢落咗車，我先敢打番開對眼﹗」

譚杏藍地鐵車廂被硬物撞屁股

譚杏藍讀中學時有一日放學如常坐地鐵，車廂好逼，突然感到身後有硬物撞她屁股，譚杏藍道：「因為令我好唔舒服，同真係撞到我痛，所以我用手摸住自己屁股想轉身，個人已經衝咗出去人群中，我連佢個樣都見唔到。」譚杏藍說發現自己手背上有不明液體，回家後不停洗手，覺得自己好污糟。

譚杏藍鼓勵大家若遇上MeToo經歷時，不要忍氣吞聲，要為自己發聲，因為她以自身經歷向大家分享，不知在成長階段已受到多少影響。她也鼓勵大家要保護自己，為自己發聲，並謂真真正正的香港人會幫助你，不用怕遇到時出聲無人理會。

女藝人都是受害者 張秀文慘遭廚房佬掃patpat

TVB咪神張秀文，其34D導彈身材相當火辣，加上她傻大姐性格活潑又玩得，成功俘虜大班宅男。她與阿Bob（林盛斌）主持的綜藝節目《你估我唔到》，不時制服誘惑出鏡，演出十分賣力都是工作需要。原來張秀文因為身材出眾曾遇過#Me Too事件，當時她就讀F.5，張秀文向本刊憶述時仍嬲爆：「嗰次喺屋村隔籬嘅商場，有個應該係做廚房嘅男人迎面向我行嚟，因為佢係著住白色嘅廚房衫，佢喺我身邊並排經過時，突然反手掃我pat pat，當時好嬲但又好驚，始終嗰時細個又一個人，唔識反應又唔敢出聲，我回頭望佢時，仲見到佢好得戚嘅眼神瞄一瞄我！比著依家，我一定會捉實佢隻手警告，唔會就此罷休！」

張秀文巴士上被博懵

張秀文透露還有一次在巴士站等巴士時被博懵，幸好這次身邊有個男同學，幫她出頭質問對方「做乜嘢？」才嚇倒這男人不敢亂來！兩次經歷令Sammi體會到一定要學識反抗，她亦提醒女孩子若遇到任何性騷擾事件，必定要Say No ：「女仔一定要好好保護自己，因為唔出聲反而助長呢班人更加大膽！如果唔係都唔會摸完人，仲露出得戚眼神！」

索爆人妻孫慧雪遇猥瑣男

已為人母的孫慧雪亦向本刊透露讀中學時，曾搭地鐵被猥瑣男用下體頂臀部，嚇得她花容失色，真是聽到都令人倍感噁心！

王卓淇被陌生大叔捽面珠

來自廣州的28歲TVB小花王卓淇，亦嬲爆向本刊透露，在她還讀小四時遇上猥瑣阿叔，向她施以淫手狂捽她的面珠和嘴，經歷令她留下陰影，試過有段時間不敢一個人行街。她重提事件仍表現相當憤怒：「嗰時我同另一位同學一齊，個大叔係咁捽我塊面同我個嘴，話我好得意，你知阿叔嘅手掌幾大，不過咁！我細細個已經好寸嘴，我即刻鬧佢：『阿叔，你做乜嘢！你想點！』身邊同學就即刻拉我走，自呢件事件發生之後，令我留有陰影，之後一個人放學都有啲驚，阿媽一定會來接我！就算唔得閒，都會叫工人姐姐接我！」女生被博懵已經夠慘，如果不出聲，事後回想起可能會更激氣！女神公開切身經歷，提醒大家緊記做個勇敢的女孩。

吳沚默老銅遇兩次性騷擾

TVB文青才女吳沚默，早前在IG驚爆在銅鑼灣行街時兩度遭人性騷擾，更加一度被人篤下體令她氣上心頭，事後她自責因一時心軟放過對方，表示公開事件是希望能警惕其她女孩。原來無綫多名女星亦曾有被性騷擾的不快經歷，至今提起仍猶有餘悸，經一事長一智，她們更提醒一眾女孩，要學識時刻好好保護自己，千萬不要因怕事而不出聲，有甚麼不妥切記「Say No」！

Coffee林芊妤孭小花譚杏藍做傷人瑜伽 粉絲怒轟